Марк 7 - Сыйлы Инжил бла Забур

Адамны харам этиучю неди?

¹ Иерусалимден келген фарисейле эм дин алимледен бир къаууму Иссаны къатына жыйылдыла.

² Ала Аны сохталарындан бир къауумун, харам, тюзюн айтсанг, жууулмагъан къоллары бла ётмек ашагъанларын кёрюп, гурушха этдиле.

³ Нек десегиз фарисейле эм битеу иудейлиле, буруннгуланы адетлерин тутуп, къолларын иги жуумай ашамайдыла;

⁴ Базардан къайтханда да, жууунмай ашамайдыла. Ала тутаргъа къабыл этген башха кёп затла да бардыла: аякъланы, къошунланы, къазанланы, тапчанланы жуууугъа къарайдыла.

⁵ Андан сора фарисейле бла дин алимле Анга: «Сени сохталарынг буруннгуланы адетлерин нек тутмайдыла, алай а жууулмагъан къоллары бла ётмек ашайдыла?» – деп сордула.

⁶ Ол алагъа жууапха: «Сиз эки бетлилени юсюгюзден Иешая файгъамбар тюз айтханды: „Бу халкъ Манга ауузу бла хурмет этеди, аланы жюреклери уа Менден узакъды.

⁷ Манга бошуна табынадыла; ала юйретген затла, жаланда адамланы фарызларыдыла“ деп жазылгъаны кибик.

⁸ Нек десегиз сиз, Аллахны фарызын къоюп, адамланы адетлерин тутасыз, къошунланы, аякъланы жуууу адетни эм аны кибик башха кёп затланы да этесиз», – деди.

⁹ Дагъыда алагъа: «Сиз, кесигизни адетигизни тутар ючюн, Аллахны фарызын бузууда бек жетишимли болгъансыз!

¹⁰ Нек десегиз Муса: „Атанга бла ананга хурмет эт“ эмда „Атасына неда анасына аман айтхан ёлтюрюлюрге керекди“ деп фарыз этгенди.

¹¹ Сиз а: „Атасына неда анасына: ,Сен менден хайырланырыкъ зат къурманды – алай демеклик Аллахха берилгенди‘, – деп ким айтса,

¹² Анга энди атасына неда анасына бир зат да этмесе да жарайды“ дейсиз.

¹³ Кесигиз этген адетигиз бла Аллахны сёзюн кетересиз эм аны кибик башха кёп затланы да этесиз», – деди.

¹⁴ Сора битеу халкъны чакъырып, алагъа: «Тынгылагъыз барыгъыз да Манга эмда ангылагъыз;

¹⁵ Тышындан адамны ичине баргъан бир зат да аны харам эталлыкъ тюйюлдю, алай а аны ичинден чыкъгъан затды адамны харам этиучю.

¹⁶ Эшитирге къулакълары болгъан эшитсин!» – деди.

¹⁷ Сора Исса халкъдан кетип юйге кирген заманда, Аны сохталары Анга бу таурухну магъанасын сордула.

¹⁸ Ол алагъа: «Сиз да алай ангылаусузмусуз? Адамгъа тышындан кирген бир зат да аны харам эталмазлыгъын къалай ангыламайсыз?

¹⁹ Тышындан кирген зат, аны жюрегине тюйюл, къарынына барады, андан да аякъ жолгъа атылады», – деди. Алай бла битеу ашланы халал болгъанын билдире эди.

²⁰ Дагъыда: «Адамны ичинден чыкъгъан, адамны харам этеди;

²¹ Нек десегиз ичинден, адамны жюрегинден чыгъадыла аман ниетле, зийна этиуле, тос туруула, адам ёлтюрюуле,

²² Урлаула, жутлукъ, огъурсузлукъ, хыйлачылыкъ, адепсизлик, зар кёз, аман айтыу, ёхтемлик, акъылсызлыкъ.

²³ Битеу бу аманлыкъла ичинден чыгъадыла, адамны харам ала этедиле», – деди.

Сирофиникиялы тиширыуну ийнаныуу

²⁴ Сора, андан кетип, Тирни бла Сидонну тийресине келди; анда бир юйге кирип, киши билирин сюймеди; алай а жашырылыргъа болалмады.

²⁵ Нек десегиз къызын харам нюр бийлеген бир къатын, Иссаны юсюнден эшитген эди эмда келип, Аны аякъларына ауду.

²⁶ Ол тиширыу а мажюсю, Сирофиникиялы эди; ол къызындан жинни къыстарын Иссадан тилей эди.

²⁷ Исса уа анга: «Алгъа сабийлени тойма къой, нек десенг ётмекни сабийледен алып, итлеге атхан иги тюйюлдю», – деди.

²⁸ Ол тиширыу а Анга жууапха: «Алайды, Раббий! Алай а итле да стол тюбюнде сабийледен тюшген бурхуланы ашайдыла», – деди.

²⁹ Исса анга: «Бу сёзюнг ючюн, бар; энди жин къызынгдан чыкъгъанды», – деди.

³⁰ Ол къатын юйюне келгенинде, къызындан жин чыгъып, къызы тёшегинде жатып тургъанын кёрдю.

Сангырау тилкъау сау этиледи

³¹ Тирни бла Сидонну тийресинден чыгъып, Исса Оншахарны жерини юсю бла дагъыда Галилея кёлню къатына келди.

³² Анда Иссагъа бир сангырау тилкъауну келтирип, аны юсюне къолун салырын Андан тиледиле.

³³ Исса, аны халкъдан бир жанына элтип, Кесини бармакъларын аны къулакъларына сугъуп, тюкюрюп, аны тилине тийди

³⁴ Эмда, кёкге къарап, ахтынып, анга: «Эффата!» – деди, аны магъанасы «ачыл!» – деген сёздю.

³⁵ Сора олсагъат аны къулакълары ачылдыла, аны тилини байланнганы да эркин болуп, ол таза сёлешип башлады.

³⁶ Исса алагъа муну бир кишиге да айтмазгъа буйрукъ этди. Алай а Ол аланы ненча тыйса да, ала андан да бек хапар жая эдиле.

³⁷ Эмда бек сейирсине эдиле: «Барын да иги этеди: сангырауланы эшитиучюле этеди, тилсизлени сёлешиучюле этеди!» – дей эдиле.