Марк 6 - Сыйлы Инжил бла Забур

Исса Кесини ата журтунда сансыз этиледи

¹ Исса, андан чыкъгъанлай, Кесини ата журтуна келди; Аны сохталары да Аны ызындан бардыла.

² Шабат кюн жетгенде, Ол синагогада юйретип башлады; эшитгенледен кёбюсю сейирсинип: «Бу Анга къайданды? Анга не акъылманлыкъ берилгенди эм быллай къудуретли ишле Аны къоллары бла къалай этиледиле?

³ Ол агъач уста тюйюлмюдю, Мариямны жашы, Якъупну, Юсюпню, Яхуданы эм Шимонну къарындашы тюйюлмюдю? Аны эгечлери да мында бизни арабызда тюйюлмюдюле?» – деп, кёллери чыгъып Анга ийнанмай эдиле.

⁴ Исса уа алагъа: «Файгъамбар кесини ата журтундан бла жууукъларындан эм кесини юйюнден башха жерде сансыз этилмейди», – деди.

⁵ Эмда анда бир къудуретли иш этерге да болалмады; жаланда ауругъанланы биразыны юслерине къолларын салып, аланы сау этди ансы.

⁶ Эмда аланы ийнаныусузлукъларына сейирсинди. Андан сора тёгерекдеги элледе юйретип жюрюдю.

Исса онеки сохтасын халкъгъа иеди

⁷ Сора онеки сохтасын чакъырып, аланы экишер-экишер ийип башлады эмда алагъа харам нюрлени хорларгъа эркинлик берди.

⁸ Алагъа, жангыз таякъдан башха, жолгъа бир зат да алмазгъа буюрду. Не артмакъ, не ётмек, не белибауларында ахча алмазгъа,

⁹ Алай а бош аякъ кийим киерге эм эки къат кийим жюрютмезге буюрду.

¹⁰ Дагъыда алагъа: «Бир жерде не юйге кирсегиз, ол жерден кетгинчи анда къалыгъыз.

¹¹ Эмда сизни ким къабыл этмесе эм сизге тынгыламаса, андан чыгъа туруп, алагъа шагъатлыкъгъа, аякъларыгъыздагъы букъуну къагъып тюшюрюгюз. Кертисин айтама сизге: къыямат кюн ол шахардан эсе Содомгъа бла Гоморагъа тынчыракъ болур», – деди.

¹² Ала барып, адамланы тобагъа къайтышыргъа чакъырып жюрюдюле;

¹³ Кёп жинлени къыстай эдиле эм кёп ауругъанлагъа жау сюртюп, сау эте эдиле.

Ахия файгъамбарны ёлтюрюлюую

¹⁴ Иссаны аты белгили болгъаны себепли, Ирод патчах да быланы хапарын эшитди. Бир къауумла: «Бу сууда Кёмюлдюрюучю Ахия ёлгенледен тиргизилгенди, ол себепден къудуретли ишлени Ол этеди», – дей эдиле.

¹⁵ Башхала: «Ол Илиясды», – дей эдиле. Бир къауумла уа: «Ол файгъамбарды, неда файгъамбарладан бири кибикди», – дей эдиле.

¹⁶ Ирод а быланы эшитип: «Ол, мен аны башын кесдирген Ахияды; ол ёлгенледен тиргизилгенди», – дей эди.

¹⁷ Нек десегиз Ирод кеси адам ийип, Ахияны тутдуруп, тюрмеге салгъан эди. Кесини къарындашы Филипни къатыны Иродиаданы Ирод кесине къатыннга алгъан эди,

¹⁸ Ахия уа Иродха: «Санга къарындашынгы къатынын алыргъа жарарыкъ тюйюлдю», – деп айтхан эди.

¹⁹ Иродиада уа, Ахиягъа дерт этип, аны ёлтюртюрге излей эди, алай а болалмай эди.

²⁰ Нек десегиз Ирод Ахиядан къоркъа эди. Ол тюзлюклю, сыйлы адам болгъанын билип, аны къоруулай эди. Аны сёзлеринден бек жунчуй эди, алай а анга бек сюйюп тынгылай эди.

²¹ Ирод, кесини туугъан кюнюн эсге алып, кесини ёзюрлерине, аскер башчыларына эм Галилеяны таматаларына, той-оюн этгенде тап кюн болду.

²² Иродиаданы къызы кирип, тепсеп, Иродну да, аны биргесине олтургъанланы да кёллерине жетди. Патчах къызгъа: «Не сюе эсенг, менден тиле, мен берирме санга», – деди.

²³ Эмда: «Менден не тилесенг да, патчахлыгъымы жартысын тилесенг да, берирме санга», – деп анга ант этди.

²⁴ Ол къыз чыгъып, анасына: «Не тилейим?» – деп сорду. Ол а: «Сууда Кёмюлдюрюучю Ахияны башын тиле», – деп жууап берди.

²⁵ Сора ол къыз олсагъатдан ашыгъышлыкъ бла патчахха барып: «Сен манга шёндю окъуна, сууда Кёмюлдюрюучю Ахияны башын табакъ бла бериринги сюеме», – деп тиледи.

²⁶ Патчах бек мудах болду; алай а анты ючюн эм аны бла олтургъанла ючюн, анга угъай дерге болалмады.

²⁷ Эмда олсагъатдан патчах жалдат ийип, Ахияны башын келтирирге буйрукъ этди.

²⁸ Жалдат барып, тюрмеде аны башын кесип, табакъ бла келтирип, къызгъа берди, къыз а анасына берди.

²⁹ Ахияны сохталары муну эшитип келдиле да, аны ёлюгюн алып, къабыргъа салдыла.

Исса беш минг адамны тойдурады

³⁰ Сора абустолла, Иссагъа жыйылып, не этгенлерин бла неге юйретгенлерин барын да Анга айтдыла.

³¹ Ол алагъа: «Сиз кесигиз жангызлай адам болмагъан жерге барыгъыз да, бир кесек солугъуз», – деди. Нек десегиз келгенле бла кетгенле асыры кёпден, аланы ашаргъа заманлары да жокъ эди.

³² Ала кеслери жангыз къайыкъ бла адам болмагъан жерге кетдиле.

³³ Аланы кетгенлерин халкъ кёрдю эмда кёпле аланы таныдыла; битеу шахарладан ары жаяу чапдыла эмда аладан алгъа келип, Иссаны къатына жыйылдыла.

³⁴ Исса, чыгъып, кёп халкъны кёргенде, алагъа жаны ауруду; нек десегиз ала сюрюучюлери болмагъан къойла кибик эдиле; сора алагъа кёп зат юйретип башлады.

³⁵ Заман кёп озгъаны себепли уа, Аны сохталары Аны къатына келип: «Былайы адам болмагъан жерди, энди заман а кеч болгъанды.

³⁶ Ий быланы, была тёгерекде эллеге бла аууллагъа барсынла да, кеслерине ётмек сатып алсынла. Алагъа ашаргъа зат жокъду», – дедиле.

³⁷ Ол алагъа жууапха: «Алагъа аш сиз беригиз», – деди. Ала анга: «Биз барып эки жюз динаргъа ётмек сатып алыпмы берейик алагъа ашаргъа?» – дедиле.

³⁸ Ол а алагъа: «Сизни ненча ётмегигиз барды? Барып, къарагъыз», – деп сорду. Ала билип: «Беш ётмек бла эки чабакъ барды», – дедиле.

³⁹ Ол заманда Исса, алагъа барысын да бёлюмле этип, жашил кырдыкда олтуртургъа буюрду.

⁴⁰ Сора тизгин сайын жюзюшер бла эллишер киши олтурдула.

⁴¹ Исса, беш ётмекни бла эки чабакъны алып, кёкге къарап, алгъыш этди, сора ётмеклени сындырып, халкъгъа юлеширге сохталарына берди, эки чабакъны да барына да юлешди.

⁴² Бары да ашап тойдула.

⁴³ Сора ётмек кесекледен бла чабакъладан къалгъандан онеки толу четен жыйдыла.

⁴⁴ Ётмеклени ашагъанла уа беш мингнге жууукъ адам бола эдиле.

Исса сууну юсюнде жюрюйдю

⁴⁵ Сора олсагъат Исса, сохталарына къайыкъгъа минип, Кеси халкъны ашыргъынчы, Андан алгъа ары жанына Бейтсайдагъа барыргъа буюрду.

⁴⁶ Эмда аланы ашырып, Кеси тилек этерге таугъа чыкъды.

⁴⁷ Ингирде къайыкъ кёлню ортасында эди, Исса уа жангызлай жагъада къалгъан эди.

⁴⁸ Сора аланы къалакъ тартыуда палахха тюшгенлерин кёрдю, нек десегиз жел аланы алларындан эди; кечени тёртюнчю бёлюмюне жууукъ заманда уа, Ол кёлню юсю бла жюрюп, алагъа жууукълашып, аланы къатлары бла озуп кетерге мурат этди.

⁴⁹ Ала уа, Аны кёлню юсю бла жюрюп келгенин кёрюп, ол ауангы сунуп, къычырыкъ этдиле.

⁵⁰ Ала бары да Аны кёрюп, къоркъгъан эдиле. Исса олсагъатдан алагъа сёлешип: «Таукел этигиз; Менме, къоркъмагъыз», – деди.

⁵¹ Сора алагъа барып къайыкъгъа минди; жел да тохтады. Ала кеси ичлеринде бек сейирсинип, тамаша этдиле.

⁵² Ала ётмекле бла этилген сейирлик ишни кёргенлей да тюшюнмеген эдиле, нек десегиз аланы жюреклери сезимсиз болгъан эдиле.

Исса Гинесарда ауруулуланы сау этеди

⁵³ Сора, кёлден ётюп Гинесарны жерине келдиле да, жагъада тохтадыла.

⁵⁴ Ала къайыкъдан тюшгенлей, олсагъат анда жашагъанла, Иссаны танып,

⁵⁵ Битеу ол тийреге чапдыла; Иссаны къайда болгъанын эшитгенлей андагъы ауругъанланы жатхан жерлери бла ары келтирип башладыла.

⁵⁶ Ол къайры келсе да, эллеге болсада, шахарлагъа болсада, аууллагъа болсада, ауругъанланы чыгъарып ачыкъ жерлеге сала эдиле эмда ала Аны жаланда кийимини къыйырына тиерлерин Андан тилей эдиле; эмда Анга тийгенле бары да сау бола эдиле.