Марк 3 - Сыйлы Инжил бла Забур

Къолу къурушхан адам сау этиледи

¹ Исса дагъыда синагогагъа келди. Анда къолу къурушхан бир адам бар эди.

² Бир къауумла Иссаны терслер ючюн, Ол аны шабат кюн сау этерми деп, Анга сынап къарай эдиле.

³ Ол а къолу къурушхан адамгъа: «Ортагъа чыкъ!» – деди.

⁴ Алагъа уа: «Шабат кюн ахшылыкъ этергеми керекди, огъесе аманлыкъ этергеми керекди? Жанны къутхарыргъамы, огъесе жояргъамы?» – деди. Ала уа зат айтмадыла.

⁵ Ол а, аланы жюреклерини къатылыгъына жаны къыйналып, алагъа ачыуланып къарап, ол адамгъа: «Къолунгу узат!» – деди. Ол да узатды, узатханлай аны къолу, бирси къолуча сау болуп къалды.

⁶ Фарисейле, чыгъып, Иссаны къалай жояйыкъ деп, мычымай иродчула бла бирге Анга къажау кенгеш этдиле.

Исса Галилея кёлню жагъасында

⁷ Алай а Исса Кесини сохталары бла кёл таба узайды эмда Аны ызындан Галилеядан кёп халкъ барды. Дагъыда Иудеядан,

⁸ Иерусалимден, Идумеядан эм Иорданны ары жанындан Тирни бла Сидонну тёгереклеринден кёп халкъ, Аны битеу этгенлерин эшитип, Анга келе эдиле.

⁹ Исса, бу кёп адамла Анга басынмаз ючюн, сохталарына Кесине къайыкъ хазырларгъа буюрду.

¹⁰ Нек десегиз Ол кёплени сау этген эди, алай бла ауруулары болгъанла, Анга тиер ючюн, кеслерин Аны юсюне ата эдиле.

¹¹ Харам нюрле да, Аны кёрген заманда, Аны аллында аууп: «Сен Аллахны Уланыса!» – деп къычыра эдиле.

¹² Алай а Исса, ким болгъанын белгили этмезге, алагъа къаты буюрду.

Исса онеки сохтасын сайлайды

¹³ Андан сора Исса, таугъа чыгъып, Кеси кимни сюйсе да, Кесине чакъырды, ала да Анга келдиле.

¹⁴ Сора ала Аны биргесине болур ючюн эм аланы ууаз берирге иер ючюн,

¹⁵ Эмда аланы, аурууладан сау этерге эм жинлени къыстаргъа эркинликлери болур ючюн аладан онекисин сайлады.

¹⁶ Аны сайлагъанлары: Кеси Петер атны берген Шимон,

¹⁷ Бени-Регеш – аны магъанасы «кёк кюкюреуню уланлары» – атны берген Зебедейни жашлары Якъуп бла Ахия,

¹⁸ Эндрей, Филип, Барталмай, Маттай, Тома, Алфай улу Якъуп, Тадай, Патриот Шимон,

¹⁹ Эмда артда Иссаны сатхан Искариот Иуда.

Исса эмда беелзебул

²⁰ Сора бир юйге келдиле. Дагъыда халкъ жыйылды, алай бла алагъа ётмек ашаргъа да онг болмады.

²¹ Иссаны жууукълары, муну эшитгенде: «Ол акъылындан шашханды», – деп Аны алып кетерге келдиле.

²² Иерусалимден келген дин алимле уа, «Аны ичинде беелзебул барды; Ол, жинлени, жинлени бийини кючю бла къыстайды», – дей эдиле.

²³ Исса, аланы чакъырып, алагъа оюм берген таурухла бла былай айтды: «Шайтан шайтанны къалай къыстар?

²⁴ Патчахлыкъ кеси-кесинде юлешиннген эсе, ол патчахлыкъ чыдаяллыкъ тюйюлдю.

²⁵ Юй да кеси-кесинде айырылса, ол юй чыдаяллыкъ тюйюлдю.

²⁶ Сора шайтан кеси-кесине къажау туруп айырылгъан эсе, чыдаяллыкъ тюйюлдю, алай а аны ахыры келгенди.

²⁷ Бир киши да, кючлю адамны юйюне кирип, аны хапчукларын тонаяллыкъ тюйюлдю, алгъа кючлюню байламаса; сора ол заманда аны юйюн тонар.

²⁸ Кертисин айтама сизге: адам улуланы битеу гюняхлары да, не аман айтхан эселе да, аман айтханлары да кечилликдиле;

²⁹ Алай а Сыйлы Нюрге аман ким айтса, анга ёмюрде да кечгинлик болмаз, алай а ол ёмюрлюк айыпха тюшер», – деди.

³⁰ Ол муну айтханы: «Анда харам нюр барды», – дегенлери себепли эди.

Иссаны анасы бла къарындашлары

³¹ Сора Аны анасы бла къарындашлары келдиле, ала, юйден тышында тохтап, Аны чакъыртдыла.

³² Аны тёгерегинде халкъ олтура эди. Сора Анга: «Ма, Сени ананг да, къарындашларынг да, эгечлеринг да тышында Сени сурайдыла», – деп айтдыла.

³³ Исса алагъа: «Мени анам, Мени къарындашларым кимдиле?» – деп жууап этди.

³⁴ Сора тёгерегинде олтургъанлагъа къарап: «Ма, Мени анам, ма, Мени къарындашларым!

³⁵ Нек десегиз Аллахны буйругъун ким толтурса, ол Манга къарындашды, эгечди, анады», – деди.