Марк 2 - Сыйлы Инжил бла Забур

Санлары къурушхан адам сау этиледи

¹ Бир бёлек кюнден сора Исса дагъыда Кафарнахумгъа келди. Анда Аны бир юйде болгъаны эшитилди.

² Олсагъат кёпле жыйылдыла, алай бла энди эшиклени къатында да жер къалмады. Ол алагъа Аллахны Сёзюн айта эди.

³ Ары Анга бир къауумла, тёрт кишиге кётюртюп, санлары къурушхан бир адамны келтирдиле

⁴ Эмда адамланы кёплюгюнден Иссагъа жууукълашыр амал тапмагъанлай, Ол болгъан юйню башын ачып, къурушханны жатхан жери бла тюшюрдюле.

⁵ Исса, аланы ийнаныуларын кёрюп, къурушханнга: «Жашым, гюняхларынг кечиледиле», – деди.

⁶ Мында дин алимледен бир къауумла олтура эдиле. Ала кеслерини жюреклеринден:

⁷ «Бу былай кяфырлыкъ нек этеди? Гюняхланы кечерге, бир Аллахдан башха ким болаллыкъды?» – деп ойлаша эдиле.

⁸ Исса, ала кеслерини ичлеринден алай ойлашханларын олсагъат Кесини нюрю бла сезип, алагъа: «Жюреклеригизде алай нек ойлашасыз?

⁹ Не тынчды? Саусузгъа: „Гюняхларынг кечиледиле“ дегенми? Огъесе: „Тур, жатхан жеринги ал да жюрю“ дегенми?

¹⁰ Алай а Адам Улуну жер башында гюняхланы кечерге эркинлиги болгъанын сиз билир ючюн айтама», – деди. Сора саусузгъа:

¹¹ «Санга айтама: тур, жатхан жеринги ал да юйюнге бар!» – деди.

¹² Ол адам олсагъат турду да, жатхан жерин алып, барыны да алларында чыкъды, алай бла бары да сейирсинип: «Бир заманда да биз быллай иш кёрмегенбиз!» – деп, Аллахха махтау салдыла.

Левий Иссаны сохталарына къошулады

¹³ Сора Исса дагъыда кёл къатына чыкъды. Битеу халкъ Анга барды, Ол да аланы юйрете эди.

¹⁴ Кетип бара туруп, Ол, Алфай улу Левийни жасакъ жыйгъан жерде олтуруп тургъанлай кёрюп, анга: «Мени ызымдан кел», – деди. Ол да туруп, Иссаны ызындан кетди.

¹⁵ Сора, Исса Левийни юйюнде олтургъан заманда, Аны бла Аны сохталары да, кёп жасакъ жыйыучула бла гюняхлыла да олтургъан эдиле, нек десегиз Аны ызындан жюрюген адамла кёп эдиле.

¹⁶ Дин алимле бла фарисейле, Аны жасакъ жыйыучула бла эм гюняхлыла бла бирге ашагъанын кёрюп, Аны сохталарына: «Ол жасакъ жыйыучула бла эм гюняхлыла бла нек ашайды, ичеди?» – дей эдиле.

¹⁷ Муну эшитип, Исса алагъа: «Дохтур керекли аурумагъанла тюйюлдюле, алай а ауругъанладыла. Мен тюзлюклюлени тюйюл, гюняхлыланы тобагъа къайтышыргъа чакъырыр ючюн келгенме», – деди.

Оразаны юсюнден соруу

¹⁸ Ахияны бла фарисейлени сохталары ораза тута эдиле. Иссагъа келип: «Ахияны бла фарисейлени сохталары ораза тутадыла, Сени сохталарынг а ораза нек тутмайдыла?» – дедиле.

¹⁹ Исса алагъа: «Киеуню нёгерлери, киеу ала бла болгъан заманда ораза туталлыкъмыдыла? Киеу ала бла болгъан заманда ораза туталлыкъ тюйюлдюле.

²⁰ Алай а киеу аладан сыйырылгъан кюнле келликдиле, сора ол кюнледе ораза тутарыкъдыла.

²¹ Бир киши да эски кийимге жангы къумачдан жамау салмайды. Алайсыз жангы жамау эскиден жыртылып кетер, жыртыкъ андан да уллу болур.

²² Бир киши да жангы чагъырны эски гыбытлагъа къуймайды. Алайсыз жангы чагъыр гыбытланы жыртыр, чагъыр да агъар, гыбытла да зыраф болурла. Алай а жангы чагъырны жангы гыбытлагъа къуяргъа керекди», – деди.

Шабат кюнню юсюнден соруу

²³ Бир шабат кюн а Анга будай сабанланы ичи бла барыргъа тюшген эди, сора Аны сохталары, жолда бара, будай башланы юзюп башладыла.

²⁴ Сора фарисейле Анга: «Къара, ала шабат кюн этерге жарамагъанны нек этедиле?» – дедиле.

²⁵ Исса алагъа: «Дауут кеси да, аны биргесине болгъанла да ач болуп къыйналгъанда ол не этгенин сиз бир заманда да окъумагъанмысыз?

²⁶ Баш дин къуллукъчу Абиятарны заманында ол, Аллахны юйюне кирип, аланы дин къуллукъчуладан башха бир кишиге да ашаргъа тийишли болмагъан, анда салыннган ётмеклени ашагъанды, биргесине болгъанлагъа да бергенди», – деди.

²⁷ Дагъыда алагъа: «Адам шабат кюн ючюн тюйюл, шабат кюн адам ючюндю.

²⁸ Ол себепден Адам Улу шабат кюнню да Бийиди», – деди.