Марк 16 - Сыйлы Инжил бла Забур

Иссаны тиргизилиую

¹ Шабат кюн озгъанлай, Магдаллы Мариям, Якъупну анасы Мариям эм Шеломит барып Иссагъа сюртюр ючюн, ариу ийисли жау сатып алдыла.

² Сора бек эртте, ыйыкъны биринчи кюнюнде, кюн чыкъгъан заманда къабыргъа келдиле.

³ Келгенде бир-бирлерине: «Къабырны эшигинден ташны бизге ким аудурур?» – дедиле.

⁴ Сора къарап, ташны аудурулуп тургъанын кёрдюле; ол а бек уллу таш эди.

⁵ Эмда къабыргъа киргенде, акъ кийим кийген жашны, онг жанында олтуруп тургъанын кёрдюле; эм бек къоркъдула.

⁶ Ол а алагъа: «Къоркъмагъыз! Къачха керилген Назаретли Иссаны излейсиз; Ол тиргизилгенди, Ол мында жокъду. Ма Ол асыралгъан жер.

⁷ Алай а барыгъыз, Аны сохталарына, Петерге да: „Исса сизден алгъа Галилеягъа барады. Ол сизге айтханы кибик, Аны анда кёрюрсюз“ деп айтыгъыз», – деди.

⁸ Ала, чыгъып, къабыр къатындан чабып кетдиле; аланы къоркъуу бла титиреу алгъан эди, къоркъгъандан бир кишиге да зат айтмадыла.

Исса сохталарына кёрюнеди

⁹ [Ыйыкъны биринчи кюнюнде эрттенликде эртте тиргизилип, Исса бек алгъа, Ол андан жети жинни къыстагъан Магдаллы Мариямгъа кёрюннгенди.

¹⁰ Мариям барып, муну Иссаны сохталарына билдиргенди; ала уа сарнап жиляй тура эдиле.

¹¹ Алай болгъанлыкъгъа ала, аны: «Исса сауду, мен Аны кёрдюм» дегенин эшитгенде, ийнанмадыла.

¹² Андан сора Исса аладан экисине ала бир элге бара тургъан заманда, жолда башха сыфатда кёрюннгенди.

¹³ Ала да, къайтып, муну къалгъанлагъа билдирдиле, алай болгъанлыкъгъа алагъа да ийнанмадыла.

¹⁴ Ахырында Исса, онбир сохтасына ашаргъа олтургъан заманларында кёрюнюп, Аны тиргизилип тургъанын кёргенлеге ийнанмагъанлары ючюн, аланы ийнаныусузлукъларына эм жюреклерини сезимсизлигине айып этди.

Исса сохталарын битеу дуниягъа иеди

¹⁵ Сора алагъа былай айтды: «Битеу дуниягъа жюрюп, жаратылгъанланы барысына да Хайыр Хапарны билдиригиз.

¹⁶ Ийнаннган эмда сууда кёмюлдюрюлген адам къутхарыллыкъды; ийнанмагъан адамгъа уа сюд этилликди.

¹⁷ Ийнаннганлада уа быллай илишанла боллукъдула: Мени атым бла жинлени къыстарыкъдыла, жангы тилле бла сёлеширикдиле.

¹⁸ Жилянланы къолгъа аллыкъдыла; ёлтюрюр зат ичселе да, алагъа заран этерик тюйюлдю; ауругъанланы юслерине къолларын саллыкъдыла, ала да сау боллукъдула», – деди.

¹⁹ Алай этип, Раббий, ала бла сёлешгенинден сора, кёкге кётюрюлюп, Аллахны онг жанында олтургъанды.

²⁰ Ала уа, кетип, хар жерде ууаз бергендиле. Раббий алагъа болушханды эмда сёзюн артда болгъан илишанла бла бегитгенди. Амин.]