Марк 13 - Сыйлы Инжил бла Забур

Ахыр заманны илишанлары

¹ Исса табыныучу юйден чыкъгъан заманда, Аны сохталарындан бири Анга: «Устаз! Къара къаллай ташладыла, къаллай мекямладыла!» – деди.

² Исса анга жууапха: «Кёремисе бу уллу мекямланы? Мында таш юсюнде таш да къаллыкъ тюйюлдю; бары да чачыллыкъды», – деди.

³ Сора, Ол Зейтун тауда табыныучу юйню туурасында олтургъан заманда, кеслери жангыз Петер, Якъуп, Ахия эм Эндрей Анга:

⁴ «Айт бизге, бу ишле къачан боллукъдула эм была барысы да боллугъуну не илишаны барды?» – деп сордула.

⁵ Алагъа жууап эте, Исса былай айтып башлады: «Сакъ болугъуз, сизни бир киши да жангылтмасын.

⁶ Нек десегиз Мени атым бла кёпле келликдиле, „Масих менме“ деп айтырыкъдыла эм кёплени жангылтырыкъдыла.

⁷ Къазауат тауушланы эм уруш хапарланы эшитген заманыгъызда уа, къоркъмагъыз; нек десегиз была болургъа керекдиле. Алай а ол алыкъа дунияны ахыры тюйюлдю.

⁸ Нек десегиз миллет миллетге, патчахлыкъ патчахлыкъгъа къажау къазауат этерикди, жер-жерледе жер тебиуле боллукъдула, ачлыкъла, къозгъалыула боллукъдула. Бу аурууланы башланнганыды.

⁹ Сиз а кесигизге сакъ болугъуз; нек десегиз сизни сюдлеге берликдиле, синагогалада тюерикдиле, Мени ючюн оноучуланы бла патчахланы алларына элтилликсиз. Алай бла аланы алларында шагъатлыкъ этериксиз.

¹⁰ Алгъа битеу миллетлеге Хайыр Хапар билдирилирге керекди.

¹¹ Сизни сюдге берирге элтген заманларында уа, сиз не айтырбыз деп къайгъы этмегиз эм алгъадан ойламагъыз; алай а сизге ол сагъатда не берилсе, аны айтыгъыз; нек десегиз сиз айтырыкъ тюйюлсюз, алай а Сыйлы Нюр айтырыкъды.

¹² Къарындаш къарындашны, ата да сабийлерин ёлтюртюрге берликди; сабийле да ата-аналарына къажау туруп, аланы ёлтюртюрюкдюле.

¹³ Мени атым ючюн сизни бары да кёрюп боллукъ тюйюлдюле; ахырына дери тёзген а къутхарыллыкъды.

¹⁴ Даниял файгъамбар айтханча, халеклик келтириучю жийиргенчли затны, болмазгъа керек болгъан жеринде тургъанын кёрген заманыгъызда уа – окъугъан ангыласын, – ол заманда Иудеяда болгъанла таулагъа къачсынла;

¹⁵ Юй башында болгъан адам да, юйюнден бир зат алыргъа энишге тюшмесин, ичине кирмесин.

¹⁶ Аулакъда болгъан адам да, кийимин алыргъа артха айланмасын.

¹⁷ Ол кюнледе бууаз къатынлагъа бла эмчек ичиргенлеге уа къыйынлыкъ боллукъду.

¹⁸ Къачхынчылыгъыгъыз къышхыда болмаз ючюн, тилек этигиз.

¹⁹ Нек десегиз ол кюнледе, Аллах жаратхан дуния башланнганындан эндиге дери да болмагъан эмда болмазлыкъ, аллай палах боллукъду.

²⁰ Раббий ол кюнлени аз этмесе эди, бир адам да къутулмаз эди; алай а Ол Кеси сайлагъан сайланнганлары ючюн, ол кюнлени аз этгенди.

²¹ Ол заманда биреу сизге: „Ма, Масих мындады“, неда: „Ма, андады“ десе, ийнанмагъыз.

²² Нек десегиз жалгъан масихле эм жалгъан файгъамбарла чыгъарыкъдыла; амал болса, сайланнганланы окъуна жангылтыр ючюн илишанла эм сейирликле кёргюзтюрюкдюле.

²³ Сиз а сакъ туругъуз; ма, Мен сизге барын да алгъындан айтдым».

Масихни экинчи келиую

²⁴ «Ол кюнледе уа, ол палахдан сора, кюн мутхуз боллукъду, ай да кесини жарыгъын берлик тюйюлдю,

²⁵ Жулдузла да кёкден къуюллукъдула, кёкледеги къудуретле да къозгъалырыкъдыла.

²⁶ Ол заманда Адам Улуну уллу къудурети эм аламатлыгъы бла булутланы ичинде келгенин кёрлюкдюле.

²⁷ Сора ол заманда Ол, Кесини мёлеклерин ийип, Кесини сайлагъанларын дунияны тёрт жанындан, жерни къыйырындан кёкню къыйырына дери жыйдырлыкъды.

²⁸ Инжир терекден юлгю алыгъыз: аны бутакълары жумушап чапыракъ ийгенде, жай жууукъ болгъанын билесиз.

²⁹ Ол халда сиз быланы болгъанын кёрген заманыгъызда Адам Улу энди жууукълашханын, эшик къатында болгъанын билигиз.

³⁰ Кертисин айтама сизге, бу тукъум озгъунчу бу затла бары да боллукъдула.

³¹ Кёк бла жер жокъ болсала да, Мени сёзлерим а къаллыкъдыла».

Билинмеген кюн бла сагъат

³² «Ол кюнню неда ол сагъатны уа бир киши да билмейди, не кёкдеги мёлекле, не Улан, жаланда жангыз Ата биледи.

³³ Къарагъыз, сагъайып туругъуз, тилек этигиз; нек десегиз ол заман къачан келлигин билмейсиз.

³⁴ Ол заман жолгъа атлана туруп, кесини юйюн къоюп, кесини къулларына эркинлик, хар бирине кесини ишин берип, эшик сакълаучугъа да жукъламай сакъ турургъа буйрукъ этип кетген кишиге ушашды.

³⁵ Алай бла сагъайып туругъуз; нек десегиз юйню иеси не заманда келлигин билмейсиз, ингирдеми, огъесе кечени арасындамы, огъесе хораз къычыргъан замандамы, огъесе эрттенликдеми.

³⁶ Билмей тургъанлай келип, сизни жукълап тургъаныгъызлай тапмасын!

³⁷ Сизге айтханымы уа, барысына да айтама: сагъайып туругъуз!» – деди.