Марк 12 - Сыйлы Инжил бла Забур

Жюзюмчюлени юсюнден таурух

¹ Сора Исса алагъа оюм берген таурухла бла былай айтып башлады: «Бир адам, жюзюм бахча орнатып, тёгерегине буруу этгенди, жюзюм эзиучю орун къазгъанды, къала ишлегенди, сора аны жюзюмчюлеге жалгъа берип, узакъгъа кетгенди.

² Заман жетгенде, жюзюмчюледен жюзюм бахчаны кёгетлерин алыр ючюн, жюзюмчюлеге бир къулун ийгенди.

³ Ала уа, аны тутуп, тюйюп, бир зат да бермей ийгендиле.

⁴ Дагъыда алагъа башха къулун ийгенди; аны да ташла бла башын тешип, сансыз этип ийгендиле.

⁵ Ол дагъыда башхасын ийгенди; аны да ёлтюргендиле. Башха кёбюсюн да ийгенди; кимин тюйгендиле, кимин ёлтюргендиле.

⁶ Бахчаны иесини бек сюйген жангыз бир уланы бар эди. Ахырында, „Уланымдан уялырла“ деп аны да алагъа ийгенди.

⁷ Жюзюмчюле уа бир-бирлерине: „Бу, мюлкге ие боллукъду; барып, аны ёлтюрейик, къалгъан мюлк бизни болур“ дегендиле.

⁸ Алай бла аны тутуп ёлтюргендиле да, жюзюм бахчадан тышына атхандыла.

⁹ Жюзюм бахчаны иеси энди не этер? Келир да, жюзюмчюлени жояр, жюзюм бахчаны да башхалагъа берир.

¹⁰ Китапда: „Юй ишлеучюле къабыл этмей къойгъан таш, ма ол мюйюшню баш ташы болгъанды.

¹¹ Ол Раббийденди эм бизни кёзюбюзге сейир кёрюнеди“ деп жазылгъанны сиз окъумагъанмысыз?» – деди.

¹² Иссаны бу оюм берген таурухда аланы юслеринден айтханын ангылагъанлары себепли, Аны тутаргъа сылтау излей эдиле; алай болсада халкъдан къоркъуп къойдула. Сора Аны къоюп, кетдиле.

Кесарьныкъын кесарьгъа беригиз

¹³ Аны сёз бла тутар ючюн Анга фарисейледен бла иродчуладан бир къауумун ийдиле.

¹⁴ Ала уа келип, Анга: «Устаз! Сен тюз сёзлю болгъанынгы эм биреуню кёлюне жетерге кюрешмегенинги биз билебиз; нек десенг бир кишиге да бет этип къарамайса, алай а Аллахны жолуна тюз юйретесе. Кесарьгъа жасакъ берирге тийишлимиди, огъесе тюйюлмюдю? Биз берейикми, огъесе бермейикми?» – дедиле.

¹⁵ Ол а, аланы эки бетлиликлерин билип, алагъа: «Нек сынайсыз Мени? Келтиригиз Манга бир динар, Мен аны кёрейим», – деди.

¹⁶ Ала келтирдиле. Ол алагъа: «Бу сурат бла жазыу кимнидиле?» – деди. Ала Анга: «Кесарьныдыла», – дедиле.

¹⁷ Исса алагъа жууапха: «Кесарьныкъын кесарьгъа, Аллахныкъын а Аллахха беригиз», – деди. Сора Анга сейирсиндиле.

Тиргизилиуню юсюнден соруу

¹⁸ Андан сора, тиргизилиу жокъду деп айтыучу садукейле, Анга келип:

¹⁹ «Устаз! Муса Тауратда бизге: „Биреуню къарындашы ёлюп, аны къатыны къалса, сабийлери уа къалмаса, сора аны къарындашы аны къатынын алсын да, къарындашына урлукъ болдурсун“ деп жазгъанды.

²⁰ Жети къарындаш бар эдиле. Биринчиси къатын алып, сабийлери болмай ёлгенди.

²¹ Ол къатынны экинчиси алгъанды, ол да сабийлери болмай ёлгенди. Ючюнчюсюне да алай болгъанды.

²² Ол къатынны жетиси да алгъандыла, артларында сабийле къалдырмагъандыла. Барындан да артда къатын да ёлгенди.

²³ Алай бла тиргизилиуде, тиргизилип тургъанларында, ол аладан къайсыны къатыны боллукъду? Нек десенг ол жетисини да къатыны болгъанды», – деп сордула.

²⁴ Исса алагъа жууапха: «Не Сыйлы Китапланы, не Аллахны кючюн билмейсиз; жангылгъаныгъыз бу себепден тюйюлмюдю?

²⁵ Нек десегиз ёлгенледен тиргизилген заманларында, не къатын алмайдыла, не эрге бармайдыла, алай а кёкледе мёлеклеча турадыла.

²⁶ Ёлгенлени юсюнден а, аланы тиргизилликлерин сиз Мусаны китабында, жана тургъан кёкенни юсюнден жазылгъан бёлюмюнде Аллах анга: „Мен Ибрахимни Аллахыма, Исхакъны Аллахыма, Якъупну Аллахыма“ деп айтханын окъумагъанмысыз?

²⁷ Аллах ёлгенлени Аллахы тюйюл, сауланы Аллахыды. Алай бла, сиз бек жангыласыз», – деди.

Эм уллу фарыз

²⁸ Дин алимледен бирлери, аланы даулашыуларын эшитип эмда Исса алагъа иги жууап этгенин кёрюп, къатына келип, Анга: «Битеу фарызладан эм уллусу къайсыды?» – деп сорду.

²⁹ Исса анга: «Битеу фарызладан эм уллусу буду: „Тынгыла, Израиль! Бизни Раббий Аллахыбыз бир Раббийди;

³⁰ Раббий Аллахынгы битеу жюрегинг бла, битеу жанынг бла, битеу акъылынг бла, битеу кючюнг бла сюй“ деген, ма, биринчи фарыз!

³¹ Экинчиси да анга ушаш: „Жууугъунгу, кесинг-кесинги сюйгенча сюй“ деген; бу фарызладан уллу башха фарыз жокъду», – деп жууап этди.

³² Дин алим Анга: «Ахшы айтдынг, Устаз! Аллах бирди эм Андан башха жокъду деп, тюз айтдынг.

³³ Аны битеу жюреги бла, битеу акъылы бла, битеу жаны бла, битеу кючю бла сюйюу, жууугъун да кеси-кесин сюйгенча сюйюу, саулай кюйдюрюлген къурманладан да, башха къурманладан да уллуду», – деди.

³⁴ Исса, аны акъыллы жууап этгенин кёрюп, анга: «Сен Аллахны Патчахлыгъындан узакъ тюйюлсе», – деди. Андан сора бир киши да энди Анга сорургъа базынмады.

Масих кимни Уланыды?

³⁵ Табыныучу юйде юйретиуюн бардыра, Исса: «Масих Дауутну уланыды деп, дин алимле къалай айтадыла?

³⁶ Нек десегиз Дауут кеси Сыйлы Нюрню кёллендириую бла: „Раббий мени Бийиме: ,Мен душманларынгы Сени аякъ тюбюнге салгъынчыгъа дери, Мени онг жанымда олтур‘, – дегенди“ деп айтханды.

³⁷ Алай бла Дауут кеси Анга Бий дейди: сора Ол Дауутну уланы къалай болур?» – деди. Кёп халкъ да Анга зауукъ этип тынгылай эди.

Исса эки бетли дин алимлени айыплайды

³⁸ Исса юйретиуюнде алагъа былай айтды: «Дин алимледен кесигизни сакълагъыз! Ала узун кийимле кийип жюрюрге, халкъ жыйылгъан жерледе салам алыргъа,

³⁹ Синагогалада алда олтурургъа, тойлада тёрде олтурургъа сюедиле.

⁴⁰ Ала башсыз къатынланы юйлерин ашайдыла, кёзбаугъа узун тилек этедиле. Бегирек да уллу терслик аллыкъдыла», – деди.

Башсыз къатынны саугъасы

⁴¹ Сора Исса, хазна жыйылыучу жерни туурасында олтуруп, халкъны хазна жыйылыучу жерге ахча салгъанына къарап турду. Кёп байла кёп сала эдиле.

⁴² Бир жарлы, башсыз къатын а келип, эки лептон салды, ол а бир кодрантны тутады.

⁴³ Кесини сохталарын къатына чакъырып, Исса алагъа: «Кертисин айтама сизге, бу жарлы, башсыз къатын, хазна жыйылыучу жерге ахча салгъанланы барындан да кёп салгъанды.

⁴⁴ Нек десегиз бары да кеслерини артыкъларындан салгъандыла, бу къатын а къолайсызлыгъындан, битеу болгъанын, битеу кечинир затын бергенди», – деди.