Марк 11 - Сыйлы Инжил бла Забур

Исса Иерусалимге киреди

¹ Иерусалимге жууукълашып, Зейтун тауну къатындагъы Бейтпагейге эм Бейтхиниге жетген заманларында, Исса Кесини сохталарындан экисин ийип,

² Алагъа: «Бу аллыгъыздагъы элге барыгъыз; ары киргенлей олсагъат, анга алыкъа бир киши да минмеген, тагъылып тургъан гылыуну табарсыз; аны тешип келтиригиз.

³ Сора сизге биреу: „Сиз муну не этесиз?“ деп айтса, сиз: „Ол Раббийге керекди“ деп жууап этигиз; ол аны олсагъат берип иер» деди.

⁴ Ала барып, орамда къабакъ аллында тагъылып тургъан гылыуну табып, аны тешдиле.

⁵ Сора алайда тургъанладан бир къауумла алагъа: «Не этесиз? Гылыуну нек тешесиз?» – дедиле.

⁶ Была алагъа, Исса айтханча жууап этдиле; айтханлай аланы тыймадыла.

⁷ Сохтала гылыуну Иссагъа келтирдиле эмда аны юсюне кеслерини кийимлерин салдыла; Исса анга минди.

⁸ Кёпле кеслерини кийимлерин жол юсюне жая эдиле, башхалары уа терекледен бутакъла кесип алып, жол юсюне жая эдиле.

⁹ Аллында баргъанла да, ызындан баргъанла да: «Хозана! Раббийни аты бла Келген алгъышлыды!

¹⁰ Атабыз Дауутну, Раббийни аты бла келе тургъан патчахлыгъы алгъышлыды! Эм Бийикдегине хозана!» – деп къычыра эдиле.

¹¹ Сора Исса, Иерусалимге жетип, табыныучу юйге келди; анда барына да къарап, заман кеч болгъаны себепли, Онекиси бла Бейтхиниге кетди.

Инжир терекни къаргъау

¹² Экинчи кюн, ала Бейтхиниден чыкъгъан заманда, Исса ач эди;

¹³ Эмда чапыракълы бир инжир терекни узакъдан кёрюп, анда бир зат табар эсем деп, барды; алай а, анга жетип, чапыракъладан башха бир зат да тапмады; нек десегиз ол заманда инжирни кезиую тюйюл эди.

¹⁴ Сора Исса терекге: «Мындан арысында ёмюрге сенден бир киши да кёгет ашамасын!» – деди. Муну сохталары эшитдиле.

Исса сатыу-алыу этгенлени табыныучу юйден къыстайды

¹⁵ Сора Иерусалимге жетдиле. Исса, табыныучу юйге келип, ол юйде сатыу-алыу этгенлени къыстап башлады; ахча алышындырыучуланы столларын да, кёгюрчюн сатханланы шиндиклерин да аудурду.

¹⁶ Табыныучу юйню жери бла бир тюрлю затны алып, ётерге бир кишини къоймады.

¹⁷ Эмда алагъа: «Мени юйюме битеу миллетлеге да тилек юй деп аталлыкъды деп жазылмагъанмыды? Сиз а аны тонаучуланы уясы этгенсиз», – деп юйретди.

¹⁸ Дин алимле бла баш дин къуллукъчула, муну эшитип, Иссаны къалай жояйыкъ деп, амал излей эдиле. Андан къоркъа эдиле; нек десегиз битеу халкъ Аны юйретиуюне сейирсине эди.

¹⁹ Кеч болгъанда уа, Исса шахардан чыгъып кетди.

Инжир терекден алынырыкъ юлгю

²⁰ Эрттенликде, озуп бара туруп, инжир терекни тамырына дери къуругъанын кёрдюле.

²¹ Сора, Петер эсине тюшюрюп, Анга: «Устаз! Къара, ол сен къаргъагъан инжир терек къуругъанды!» – деди.

²² Исса, жууап эте, алагъа:

²³ «Аллахха ышаныуну къаты тутугъуз. Кертисин айтама сизге: ким кеси жюрегинде ишекленмей, айтханымча болур деп ышанып, бу таугъа: „Кётюрюл да тенгизге атыл!“ десе, ол дегенча болур.

²⁴ Ол себепден сизге айтама: тилегигизде не тилесегиз да, алгъаныгъызгъа ийнаныгъыз – болур сизге.

²⁵ Сизни кёкледеги Атагъыз да сизни терсликлеригизни кечер ючюн, тилекде тургъан заманыгъызда, кимге не гурушхагъыз бар эсе да, кечигиз.

²⁶ Кечмей эсегиз а, сизни кёкледеги Атагъыз да сизни терсликлеригизни кечерик тюйюлдю», – деди.

Иссаны эркинлигини юсюнден соруу

²⁷ Дагъыда Иерусалимге келдиле. Исса табыныучу юйде жюрюген заманда, Аны къатына баш дин къуллукъчула, дин алимле эм таматала келип,

²⁸ Анга: «Сен быланы кимни эркинлиги бла этесе? Муну этерге быллай эркинликни Санга ким бергенди?» – дедиле.

²⁹ Исса алагъа жууапха: «Мен да сизге бир зат сорайым, Манга жууап этигиз; сора Мен да, быланы кимни эркинлиги бла этгеними айтырма сизге.

³⁰ Ахияны сууда кёмюлдюрюую кёкденми эди, огъесе адамладанмы? Манга жууап этигиз», – деди.

³¹ Ала уа кеси араларында: «„Кёкден“ десек, Ол бизге: „Сора анга нек ийнанмагъан эдигиз?“ дер», – деп ойлаша эдиле.

³² «Адамладан» дерге уа халкъдан къоркъа эдиле; нек десегиз Ахияны бары да керти файгъамбаргъа санай эдиле.

³³ Сора Иссагъа жууапха: «Билмейбиз», – дедиле. Исса да алагъа жууапха: «Мен да бу ишлени кимни эркинлиги бла этгеними айтырыкъ тюйюлме сизге», – деди.