Лука 7 - Сыйлы Инжил бла Забур

Римли жюзбашчыны ийнаныуу

¹ Исса битеу бу сёзлерин тынгылагъан халкъгъа айтып бошагъандан сора, Кафарнахумгъа кирди.

² Бир жюзбашчыны бек жаратхан къулу ёлюрге жетип ауруй эди.

³ Иссаны юсюнден эшитгенинде жюзбашчы, аны къулун сау этерге келирин Иссадан тилер ючюн Анга иудейли таматаланы ийди.

⁴ Ала да, Иссагъа келип: «Сен муну анга этерге, ол тийишлиди.

⁵ Нек десенг ол бизни миллетибизни сюеди, бизге синагога да ишлетгенди», – деп, Андан бек тиледиле.

⁶ Исса ала бла тебиреди. Сора, Ол юйге къаршы болгъан заманда, жюзбашчы Анга: «Къыйналма, Раббий! Нек десенг Сен мени мекямыма кирирге мен тийишли тюйюлме.

⁷ Ол себепден мен кесим кесими да Санга келирге тийишлиге санамагъанма. Алай болсада, бир сёз айт, сора мени къулум сау болур.

⁸ Мен кесим да бой салып тургъан адамма, алай болгъанлыкъгъа манга бойсуннган аскерчилерим бардыла. Бирине: „Бар!“ дейме, барады; башхасына да: „Кел!“ дейме, келеди; къулума да: „Муну эт!“ дейме, этеди», – деп айтдырыргъа Анга шуёхларын ийди.

⁹ Муну эшитгенде, Исса анга сейирсинди эм Кесини ызындан баргъан халкъгъа айланып: «Израильде да тапмагъанма Мен быллай ийманны деп айтама сизге», – деди.

¹⁰ Жиберилгенле юйге къайтып, ауругъан къулну сау болуп тургъанын кёрдюле.

Исса башсыз къатынны жашын тиргизеди

¹¹ Андан сора Исса, Наин атлы шахаргъа кетди, Аны биргесине Аны сохталарындан кёбюсю да, кёп халкъ да бара эдиле.

¹² Ол, шахарны къабакъларына жууукъ келген заманда уа, бир ёлюкню чыгъарып келе эдиле. Ол ананы жангыз жашы эди, ана кеси да башсыз къатын эди. Аны биргесине шахардан кёп халкъ келе эди.

¹³ Ол къатынны кёрюп, Раббий анга жазыкъсынып: «Жиляма», – деди.

¹⁴ Ёлюкню къатына барып, басхычына тийди, кётюрюп баргъанла тохтадыла. Исса: «Эй жаш! Тур, дейме санга», – деди.

¹⁵ Ёлген туруп олтурду эм сёлешип башлады. Исса аны анасына къайтарды.

¹⁶ Сора барын да къоркъуу алды эмда Аллахха шукур этип: «Бизни арабызда уллу файгъамбар чыкъды!» эмда «Аллах Кесини халкъына болушургъа келди!» – дей эдиле.

¹⁷ Иссаны юсюнден алай айтыу битеу Иудеяда эм битеу тёгерекде жайылды.

Исса эмда Ахия

¹⁸ Сора Ахияны сохталары быланы барын да анга билдирдиле.

¹⁹ Ахия, кесини сохталарындан экисин чакъырып, Иссагъа: «Ол, Келлик Сенмисе, огъесе биз башханымы сакълайыкъ?» – деп сорургъа ийди.

²⁰ Ала Иссагъа келип: «Сууда Кёмюлдюрюучю Ахия бизни Санга: „Ол, Келлик Сенмисе, огъесе башханымы сакълайыкъ?“ деп сорургъа ийгенди», – дедиле.

²¹ Ол заманда уа Исса кёплени аурууларындан, ырахынлыкъларындан, огъурсуз нюрледен сау этген эди, кёп сокъурлагъа да кёз жарыкъ берген эди.

²² Сора Исса Ахияны сохталарына жууапха: «Барыгъыз, не кёргенигизни эм не эшитгенигизни Ахиягъа айтыгъыз. Сокъурла кёрюп, ахсакъла да жюрюп башлайдыла, келепенле тазаланадыла, сангыраула эшитедиле, ёлгенле тиргизиледиле, жарлылагъа Хайыр Хапар бериледи.

²³ Мени юсюмден ишекленмеген адам насыплыды!» – деди.

²⁴ Ахия ийгенле кетгенден сора уа, Исса халкъгъа Ахияны юсюнден айтып башлады: «Сиз къум тюзге неге къараргъа баргъан эдигиз? Жел къымылдатхан къамишгеми?

²⁵ Неге къараргъа баргъан эдигиз сиз? Жумушакъ кийимле кийген адамгъамы? Омакъ кийиннгенле бла къайнап жашагъанла уа патчах тоханалада турадыла.

²⁶ Неге къараргъа баргъан эдигиз сиз? Файгъамбаргъамы? Хау, дейме сизге, файгъамбардан да уллугъа.

²⁷ Аны юсюнден: „Ма, Мен билдириучюмю Сени аллынга иеме, ол а Сени аллынгда жолунгу хазырлар“ деп жазылгъан олду.

²⁸ Ол себепден сизге айтама: къатынладан туугъанладан, сууда Кёмюлдюрюучю Ахиядан уллу бир файгъамбар да жокъду, алай а Аллахны Патчахлыгъында эм гитче андан уллуду», – деди.

²⁹ Ахияны сууда кёмюлдюрюую бла кёмюлдюрюлген битеу халкъ да, жасакъ жыйыучула да (Иссагъа) тынгылагъанларында Аллахны тюзлюгюне махтау салдыла.

³⁰ Фарисейле бла Таурат алимле уа Ахиядан сууда кёмюлдюрюлмей, кеслерини юслеринден Аллахны буйругъун къабыл этмей къойгъан эдиле.

³¹ Ол заманда Раббий: «Бу тукъумну адамларын ким бла тенглешдирейим? Эм была кимге ушайдыла?

³² Ала, орамда олтуруп, бир бирлерине: „Биз сизге сыбызгъы сокъдукъ да сиз тепсемедигиз, биз сизге мудах жырла жырладыкъ да сиз жилямадыгъыз“ деп къычыргъан сабийлеге ушайдыла.

³³ Нек десегиз сууда Кёмюлдюрюучю Ахия келди, не ётмек ашамайды, не чагъыр ичмейди, анга: „Жинлиди“ дейсиз.

³⁴ Адам Улу келди, ашайды эм ичеди, сора: „Ма, ашаргъа эм чагъыр ичерге сюйюучю адам, жасакъ жыйыучуланы бла гюняхлыланы шуёху!“ дейсиз.

³⁵ Акъылманлыкъны тюзлюгю уа битеу аны ишлеринден кёрюнеди», – деди.

Исса эмда гюняхлы тиширыу

³⁶ Фарисейледен биреу Иссаны кеси бла аш ашаргъа чакъырып элтди. Ол фарисейни юйюне кирип олтурду.

³⁷ Ол заманда шахарны бир гюняхлы тиширыуу, Исса фарисейни юйюнде олтургъанын билип, акъ мермер сауут бла ариу ийисли жау келтирип келди.

³⁸ Иссаны арт жанында аякъларыны къатында тохтап, жиляй-жиляй, Аны аякъларын жилямукълары бла жибитип, кесини башыны чачы бла сюртюп башлады. Аны аякъларын уппа эте эди эм ариу ийисли жау бла майлай эди.

³⁹ Иссаны чакъыргъан фарисей, муну кёрюп, кеси-кесине: «Бу файгъамбар болса эди, сора Анга ким эм къаллай тиширыу тийгенин, ол гюняхлы тиширыу болгъанын билир эди», – дей эди.

⁴⁰ Анга бурулуп, Исса: «Шимон! Мени санга бир айтыр затым барды», – деди. Ол да: «Айт, Устаз», – деди.

⁴¹ Исса анга: «Ёнгкюч берген биреуню эки борчлусу болгъанды: аладан бири беш жюз динар борчлу, экинчиси уа элли динар борчлу болгъанды.

⁴² Аланы уа тёлерге затлары болмагъаны себепли, ол экисине да кечип къойгъанды. Айт, ол экисинден аны къайсы бек сюер?» – деди.

⁴³ Шимон: «Кимге кёп кечилген эсе да ол деп ойлайма», – деп жууап этди. Исса анга: «Сен тюз ойлашдынг», – деди.

⁴⁴ Сора тиширыугъа бурулуп, Шимоннга: «Кёремисе сен бу тиширыуну? Мен сени юйюнге келдим, сен Мени аякъларыма суу да бермединг. Ол а Мени аякъларымы жилямукълары бла жибитип, кесини башыны чачы бла сюртдю.

⁴⁵ Сен Мени уппа этмединг, ол а, Мен келгенден бери, Мени аякъларымы уппа этгенин къоймайды.

⁴⁶ Сен Мени башыма зейтун жау жакъмадынг, ол а Мени аякъларыма ариу ийисли жау жакъды.

⁴⁷ Ол себепден а санга айтама: аны кёп гюняхлары кечилгени ючюн ол кёп сюеди. Анга аз кечилген адам а аз сюеди», – деди.

⁴⁸ Тиширыугъа уа: «Гюняхларынг кечиледиле», – деди.

⁴⁹ Исса бла олтургъанла да ичлеринден: «Гюняхланы да кечген, Бу кимди?» – дей эдиле.

⁵⁰ Ол а тиширыугъа: «Сени ийнаныуунг сени къутхарды, ырахатлыкъ бла бар», – деди.