Лука 5 - Сыйлы Инжил бла Забур

Иссаны биринчи сохталары

¹ Бир жолда Аллахны сёзюн эшитир ючюн, халкъ Иссагъа басынып, Ол а Гинесар кёлню къатында тургъан заманда,

² Кёлде тургъан эки къайыкъны кёрдю. Чабакъчыла уа, къайыкъладан тюшюп, чабакъ ауларын жууа эдиле.

³ Шимоннукъу болгъан бир къайыкъгъа минип, жагъадан бираз арлакъ жюзерге Исса андан тиледи, сора къайыкъда олтуруп халкъны юйрете эди.

⁴ Юйретиуюн тохтатханында уа, Шимоннга: «Теренине жюз да, чабакъ тутаргъа ауларыгъызны атыгъыз», – деди.

⁵ Шимон Анга жууапха: «Устаз! Биз сау кечени кюрешгенбиз эм бир зат да туталмагъанбыз. Алай болсада, Сен айтхан ючюн ауну атайым», – деди.

⁶ Былай этип, ала бек кёп чабакъ тутдула, алай бла аланы чабакъ аулары окъуна жыртыла эди.

⁷ Сора башха къайыкъда болгъан нёгерлерине, алагъа болушургъа келсинле деп къол булгъап билдирдиле. Ала келдиле эм эки къайыкъны да толтурдула, алай бла ала батып башладыла.

⁸ Муну кёрюп, Шимон Петер Иссаны тобукъларына аууп: «Раббий, менден кет! Нек десенг мен гюняхлы адамма», – деди.

⁹ Нек десегиз аллай бир чабакъ тутханларындан, анга да, аны бла болгъанланы барысына да уллу къоркъуу тюшген эди.

¹⁰ Аны кибик Шимонну нёгерлери болгъан Зебедейни жашлары Якъупха да, Ахиягъа да (къоркъуу тюшген эди). Исса Шимоннга: «Къоркъма, бюгюнден арысында адамланы тутарыкъса», – деди.

¹¹ Сора, эки къайыкъны да жагъагъа чыгъарып, барын да къоюп, Аны ызындан тебиредиле.

Исса келепен ауруулу бир адамны сау этеди

¹² Исса бир шахарда болгъан заманда, битеу санларын келепен ауруу алгъан бир адам келип, Иссаны кёрюп, Анга жалбара: «Раббий! Сюйсенг, мени тазаларгъа болаллыкъса», – дей, беттёбен ауду.

¹³ Исса къолун узатып, анга тийип: «Сюеме, тазалан», – деди. Эм олсагъатдан келепен ауруу аны юсюнден кетди.

¹⁴ Исса анга, муну бир кишиге да айтмазгъа, алай а барып дин къуллукъчугъа кёрюнюрге эм кесини тазаланнганы ючюн адамлагъа шагъатлыкъгъа, Муса буйрукъ этгенча, къурман этерге буюрду.

¹⁵ Алай а Иссаны юсюнден хапар кёпден кёп жайыла эди, бек кёп халкъ да, Анга тынгылар ючюн эм аурууларындан сау этилир ючюн жыйыла эди.

¹⁶ Ол а адам жашамагъан жерлеге кетип, тилек эте эди.

Исса санлары къурушхан бир адамны сау этеди

¹⁷ Бир кюн, Исса юйрете тургъан заманда, Галилеяны бла Иудеяны эм Иерусалимни хар жерлеринден келген фарисейле бла Таурат устазла да мында олтура эдиле. Исса Раббийни кючю бла ауругъанланы сау эте эди.

¹⁸ Ол заманда бир къауумла, санлары къурушхан бир адамны, жатхан жери бла келтирдиле, аны (юйге) кийирип, Иссаны аллына салыргъа кюрешдиле.

¹⁹ Халкъны кёплюгюнден, аны кийирирге жер тапмай, юйню башына миндиле да, къошунланы ачып, саусузну жатхан жери бла ортагъа Иссаны аллына тюшюрдюле.

²⁰ Исса, аланы ийнаныуларын кёрюп, ол адамгъа: «Гюняхларынг кечиледиле», – деди.

²¹ Дин алимле бла фарисейле: «Кяфыр сёлешген Бу кимди? Гюняхланы кечерге, бир Аллахдан башха ким болаллыкъды?» – деп ойлашып башладыла.

²² Исса, аланы ойлашыуларын ангылап, алагъа жууапха: «Сиз жюреклеригизде не ойлашасыз?

²³ Не тынчды: „Гюняхларынг кечиледиле“ дегенми, огъесе: „Тур да жюрю“ дегенми?

²⁴ Алай а Адам Улуну жер юсюнде гюняхланы кечерге эркинлиги болгъанын сиз билир ючюн (айтама)», – деди. Сора Ол, саусузгъа: «Санга айтама: тур, жатхан жеринги ал да, юйюнге бар!» – деди.

²⁵ Ол да олсагъат аланы алларында къобуп, жатхан жерин алды да, Аллахха махтау сала, юйюне кетди.

²⁶ Сора барын да къоркъуу алып, Аллахха махтау салдыла эмда къоркъуудан толуп: «Сейирлик ишле кёрдюк биз бюгюн!» – дедиле.

Левий Иссаны сохтасы болады

²⁷ Андан сора Исса чыкъды эмда жасакъ жыйылгъан жерде олтургъан, Левий атлы жасакъ жыйыучуну кёрюп, анга: «Мени ызымдан кел!» – деди.

²⁸ Ол хар затын да къоюп, туруп, Иссаны ызындан кетип къалды.

²⁹ Сора Левий кесини юйюнде Анга уллу сыйлау этди. Анда бек кёп жасакъ жыйыучула эм ала бла олтургъан башхала бар эдиле.

³⁰ Дин алимле бла фарисейле уа ыразы болмай, Иссаны сохталарына: «Сиз жасакъ жыйыучула бла, гюняхлыла бла нек ашайсыз-ичесиз?» – дей эдиле.

³¹ Исса уа алагъа жууапха: «Дохтур керекли саула тюйюлдюле, алай а ауругъанладыла.

³² Мен тюзлюклюлени тюйюл, гюняхлыланы тобагъа къайтышыргъа чакъырыр ючюн келгенме», – деди.

Оразаны юсюнден соруу

³³ Ала уа Анга: «Ахияны сохталары кёп ораза тутадыла, тилек да этедиле, фарисейлени сохталары да алай. Сеникиле уа нек ашайдыла-ичедиле?» – дедиле.

³⁴ Ол алагъа: «Киеуню нёгерлерине, киеу ала бла болгъан заманда ораза тутдурургъа болаллыкъмысыз?

³⁵ Алай а киеу аладан сыйырылгъан кюнле келликдиле. Ол заманда, ол кюнледе ораза тутарыкъдыла», – деди.

³⁶ Сора алагъа: «Бир киши да жангы кийимден жыртып алып, эски кийимге жамау салмайды. Алай этсе, жангыны да жыртыр, жангы кийимден жамау эскиге да жарамаз.

³⁷ Бир киши да жангы чагъырны эски гыбытлагъа къуймайды. Алай этсе, жангы чагъыр гыбытланы жыртыр, чагъыр да агъар, гыбытла да зыраф болурла.

³⁸ Алай а жангы чагъырны жангы гыбытлагъа къуяргъа керекди. Алай болса, экиси да сакъланырыкъдыла.

³⁹ Эм бир киши да, эски чагъыр ичип, олсагъат жангы чагъыр ичерге сюерик тюйюлдю, нек десегиз: „Эски чагъыр игиди“ дерикди», – деп оюм берген таурух айтды.