Лука 4 - Сыйлы Инжил бла Забур

Исса къум тюзде сыналады

¹ Исса, Сыйлы Нюрден толуп, Иордандан къайтды, андан сора Нюр Аны къум тюзге элтди.

² Ол анда къыркъ кюнню ибилисден сыналды. Ол кюнледе бир зат да ашамады эм бу заманны ахырында ач болду.

³ Сора ибилис Анга: «Сен Аллахны Уланы эсенг, бу ташха ётмек болургъа буюр», – деди.

⁴ Исса анга жууапха: «„Адам жаланда ётмек бла тюйюл, алай Аллахны хар сёзю бла жашарыкъды“ деп жазылгъанды», – деди.

⁵ Сора Аны бийик таугъа чыгъарып, ибилис Анга бек къысха заманнга битеу дунияны патчахлыкъларын кёргюзтдю.

⁶ Сора ибилис Анга: «Бу патчахлыкъланы битеу эркинликлерин эмда аламатлыкъларын Санга берликме, нек десенг была манга берилгендиле, мен аланы кимге сюйсем да береме.

⁷ Алай бла, Сен манга сежда этсенг, бары да Сени боллукъду», – деди.

⁸ Исса анга жууапха: «Мени къатымдан кет, шайтан! (Китапда): „Раббий Аллахынга сеждагъа бар эмда жангыз Анга къуллукъ эт“ деп жазылгъанды», – деди.

⁹ Сора ибилис Аны Иерусалимге элтди эмда Аны табыныучу юйню башыны къыйырына сюеп, Анга: «Сен Аллахны Уланы эсенг, былайдан энишге секир.

¹⁰ Нек десенг „(Аллах) Сени сакъларгъа Кесини мёлеклерине аманат этерикди“,

¹¹ Эмда: „Ала Сени къолларында элтирикдиле, аягъынг ташха да абынмаз“ деп жазылгъанды», – деди.

¹² Исса анга жууапха: «„Раббий Аллахынгы сынама“ деп айтылгъанды», – деди.

¹³ Ибилис, битеу сынауларын бошагъандан сора, бир кезиуге дери Аны къатындан кетди.

Исса Галилеяда

¹⁴ Сора Исса, Сыйлы Нюрню кючюнден толуп, Галилеягъа къайтды. Аны юсюнден хапар битеу тёгерекдеги къыралгъа жайылды.

¹⁵ Ол аланы синагогаларында юйрете эди, Аны бары да махтай эдиле.

¹⁶ Сора ёсген жерине Назаретге келди, анда Кесини адети бла, шабат кюн синагогагъа кирип, Сыйлы Китапладан окъургъа ёрге турду.

¹⁷ Анга Иешая файгъамбарны китабын бердиле. Ол да, китапны ачып, анда:

¹⁸ «Раббийни Нюрю Мени юсюмдеди; нек десегиз Ол Мени жарлылагъа хайыр хапар берирге майлагъанды эмда Мени жюреклери сыннганланы сау этерге, жесирлеге азатлыкъны, сокъурлагъа кёзлерини ачыллыгъын билдирирге, унукъдурулгъанланы эркинликге бошларгъа,

¹⁹ Раббийни (адамлагъа) ыразылыкъ берлик жылы (келгенин) айтыргъа ийгенди», – деп жазылгъан жерни табып окъуду.

²⁰ Сора китапны жабып, аны синагоганы жумушчусуна берип олтурду. Синагогада барыны да кёзлери Анга аралып къалдыла.

²¹ Исса алагъа: «Китапдан бу сиз эшитген жазыу бюгюн толгъанды», – деп айтып башлады.

²² Бары да Аны юсюнден (ахшы) шагъатлыкъ эте эдиле эм Аны ауузундан чыкъгъан шафауат сёзлеге сейирсинип: «Бу Юсюпню жашы тюйюлмюдю?» – дей эдиле.

²³ Ол алагъа: «Ишексиз сиз Манга бу нарт сёзню эсгертирсиз: „Дохтур! Кесинг-Кесинги сау эт, мында Сени ата журтунгда да, Кафарнахумда этгенинги, биз эшитгенни эт“ деп айтырсыз», – деди.

²⁴ Дагъыда: «Кертисин айтама сизге: бир файгъамбар да кесини ата журтунда къабыл этилмейди.

²⁵ Тюзюн айтама сизге: Илиясны заманында, юч жыл бла алты айны кёк жабылып, алай бла битеу жерде уллу ачлыкъ болгъан заманда, Израильде башсыз къатынла кёп эдиле.

²⁶ Илияс а аладан бирине да жиберилмегенди, жаланда Сидонну Сарафат шахарында болгъан бир башсыз къатыннга жиберилгенди.

²⁷ Элиша файгъамбарны заманында да Израильде келепен ауруулула кёп эдиле, жаланда Сириялы Намандан башха аладан бири да тазаланмагъанды», – деди.

²⁸ Муну эшитип, синагогадагъыла бары да ачыудан толдула.

²⁹ Ёрге туруп, Иссаны шахардан тышына къыстадыла эм Аны жардан энишге атар ючюн аланы шахарлары орналгъан тауну башына элтдиле.

³⁰ Алай а Исса, аланы аралары бла ётюп, узайып кетди.

Исса синагогада харам нюрню къыстайды

³¹ Сора, Галилеяны Кафарнахум шахарына келип, шабат кюнледе халкъны юйретип турду.

³² Аны юйретиуюне сейирсине эдиле, нек десегиз Аны сёзюню къудурети бар эди.

³³ Синагогада, харам нюрю болгъан бир жинли адам бар эди. Сора ол уллу ауаз бла:

³⁴ «Къой бизни, Назаретли Исса! Сени бизни бла не ишинг барды? Сен бизни жояргъа келгенсе! Сени ким болгъанынгы билеме, Аллахны Сыйлысыса!» – деп къычырды.

³⁵ Исса: «Тын, бу адамдан чыкъ!» – деп жинни тыйды. Сора жин, ол адамны синагоганы ортасында жыгъып, анга не аз да заран этмей, аны ичинден чыкъды.

³⁶ Барына да къоркъуу тюшюп, кеси араларында: «Бу не сёз болур? Ол аллай бийлиги бла эм кючю бла харам нюрлеге буйрукъ этеди, ала да чыгъадыла», – деп ойлаша эдиле.

³⁷ Сора Иссаны юсюнден хапар битеу тёгерекдеги жерлеге жайылды.

Исса кёп ауругъанланы сау этеди

³⁸ Синагогадан чыгъып, Исса Шимонну юйюне келди. Шимонну къайын анасын а бек къызыу ауруу тутуп тура эди. Анга (болушурун) Иссадан тиледиле.

³⁹ Исса, тиширыуну къатына келип, къызыу аурууун тыйгъанда, ауруу аны къойду. Тиширыу, олсагъат туруп, алагъа шапалыкъ этип башлады.

⁴⁰ Кюн батхан заманда уа, хар тюрлю ауругъан адамлары болгъанла бары да аланы Иссагъа келтире эдиле. Ол да, аланы хар бирини юсюне къолларын салып, аланы сау эте эди.

⁴¹ Аны кибик кёпледен жинле да къычырыкъ этип чыгъа эдиле эм: «Сен Аллахны Уланы Масихсе!» – дей эдиле. Ала Аны Масих болгъанын билгенлери себепли уа, Ол алагъа айтыргъа эркинлик бермей эди.

⁴² Танг атхан заманда уа Ол, юйден чыгъып, адам жашамагъан жерге кетди. Халкъ Аны излей барды, Анга келип: «Бизден кетме», – деп, Аны тыя эдиле.

⁴³ Алай а Ол алагъа: «Аллахны Патчахлыгъындан Хайыр Хапарны Мен башха шахарлагъа да айтыргъа керекме, нек десегиз Мен аны ючюн ийилгенме», – деди.

⁴⁴ Сора Галилеяны синагогаларында ууаз берип жюрюдю.