Лука 3 - Сыйлы Инжил бла Забур

Ахия файгъамбарны Раббийге жол хазырлауу

¹ Тиберий кесарьны патчахлыкъ этиуюню онбешинчи жылы эди. Понтий Пилат Иудеяда оноучулукъ эте эди. Ирод Галилеяны тетрархы, аны къарындашы Филип Итурея бла Трахонит областьны тетрархы, Лисаний а Абилинини тетрархы эди.

² Ханан бла Къаяфа баш дин къуллукъчула эдиле. Ол заманда Аллах къум тюзде Зекерияны уланы Ахиягъа сёзюн билдиргенди.

³ Ахия, битеу тёгерекдеги Иордан къыралда айлана адамланы, гюняхлары кечилир ючюн тобагъа къайтышып, сууда кёмюлдюрюлюрге чакъыра эди.

⁴ (Бу), Иешая файгъамбарны сёз китабында: «Къум тюзде къычыргъанны ауазы: „Раббийге жол хазырлагъыз, Анга тюз ызла этигиз;

⁵ Хар алаша жер толсун эм хар тау бла дуппур алаша болсунла, къынгырлыкъла тюзелсинле, чунгурлу жолла сыйдам болсунла.

⁶ Сора хар адам Аллахны къутхарыуун кёрлюкдю!“ (дейди)», – деп жазылгъаны кибик (болгъанды).

⁷ Ахия кесине сууда кёмюлдюрюлюрге келген халкъгъа: «Жилянны балалары! Келлик чамланыудан къачаргъа сизни ким юйретгенди?

⁸ Тобагъа къайтышыугъа тийишли ишле этигиз. Жюрегигизде: „Бизни атабыз Ибрахимди“ деп ойламагъыз, нек десегиз Аллах Ибрахимге сабийле бу ташладан да болдураллыкъды деп айтама сизге.

⁹ Энди балта да тереклени тамырларыны къатында турады. Иги кёгет бермеген хар терек кесилир эм отха салыныр», – дей эди.

¹⁰ Халкъ анга: «Сора биз не этейик?» – деп сорду.

¹¹ Ол алагъа жууапха: «Эки кёлеги болгъан адам бирин бир кёлеги да болмагъаннга берсин, ашы болгъан адам да ашы болмагъаннга берсин», – деди.

¹² Жасакъ жыйыучула да сууда кёмюлдюрюлюрге келип, анга: «Устаз! Биз не этейик?» – дедиле.

¹³ Ол алагъа: «Сизге белгиленнгенден артыкъ дауламагъыз», – деп жууап этди.

¹⁴ Аны кибик аскерчиле да анга: «Биз а не этейик?» – деп сордула. Алагъа да: «Бир кишиге да зулму этмегиз, жалгъан айтыу бла къоркъутуп ултха алмагъыз, кесигизни хакъыгъызгъа ыразы болуп туругъуз», – деди.

¹⁵ Халкъ умут этиуде болуп, Ахияны юсюнден бары да кеси жюреклеринде, ол Масихми болур деп сагъыш этген заманда,

¹⁶ Ахия барына да: «Мен сизни сууда кёмюлдюреме, алай а менден Кючлю келеди, Аны уа мен чарыгъыны бауун тешерге тийишли да тюйюлме. Ол сизни Сыйлы Нюр бла эмда от бла кёмюлдюрлюкдю.

¹⁷ Аны кюреги Аны къолундады, Ол Кесини ындырын ариуларыкъды, будайны Кесини кюфюне жыярыкъды, саламны уа ёчюлмез от бла кюйдюрлюкдю», – деп жууап этди.

¹⁸ Алай бла ол, халкъгъа башха кёп акъыл да юйретип, Хайыр Хапарны билдире эди.

¹⁹ Тетрарх Ирод а, кесини къарындашыны къатыны Иродиада ючюн эм Иродну битеу этген аманлыкълары ючюн, Ахия аны уялтханы себепли,

²⁰ Битеу аманлыкъларыны юсюне Ахияны тюрмеге салгъанын да къошхан эди.

Исса сууда кёмюлдюрюледи

²¹ Битеу халкъ сууда кёмюлдюрюлгенден сора уа, Исса да сууда кёмюлдюрюлюп тилек этген заманда, кёк ачылды.

²² Анга Сыйлы Нюр, кёгюрчюн кибик, сан сыфатда тюшдю эмда Анга кёкледен: «Сен Мени сюйюлюннген Уланымса; Мен Санга ыразыма», – деген ауаз келди.

Иссаны тукъуму

²³ Исса, Кесини къуллукъ этиуюн башлай, отуз жыллыкъ эди. Адамланы ойлашыуларына кёре, Юсюпню, Элийни,

²⁴ Мататны, Левийни, Малкийни, Янайны, Юсюпню,

²⁵ Матитияны, Амосну, Нахумну, Хеслийни, Нагайны,

²⁶ Махатны, Матитияны, Шимийни, Юсюпню, Яхуданы,

²⁷ Иохананны, Решаны, Зерубабелни, Шалтиелни, Нерийни,

²⁸ Малкийни, Аддийни, Косамны, Элмадамны, Эрни,

²⁹ Иешуну, Элиезерни, Йоримни, Мататны, Левийни,

³⁰ Шимонну, Яхуданы, Юсюпню, Йонамны, Элиякъымны,

³¹ Маланы, Меннаны, Мататаны, Натанны, Дауутну,

³² Ишайны, Обедни, Боазны, Салмонну, Нахшонну,

³³ Аминадабны, Арамны, Хесронну, Пересни, Яхуданы,

³⁴ Якъупну, Исхакъны, Ибрахимни, Терахны, Нахорну,

³⁵ Серукъну, Регуну, Пелекни, Эберни, Шалахны,

³⁶ Кенанны, Арпакшадны, Самны, Нухну, Ламехни,

³⁷ Метушелахны, Ханохну, Иередни, Махалалелни, Кенанны,

³⁸ Эношну, Шетни, Адамны, Аллахны Уланы эди.