Лука 24 - Сыйлы Инжил бла Забур

Исса тиргизиледи

¹ Ыйыкъны биринчи кюнюнде уа, бек эртте, хазырлагъан ариу ийисли затларын да алып, тиширыула къабыргъа келдиле. Ала бла бирге (башха) бир къауумла да бар эдиле.

² Келгенлеринде, ташны къабырдан аудурулуп тургъанын кёрдюле.

³ Ичине киргенлеринде, Раббий Иссаны ёлюгюн тапмадыла.

⁴ Ала, муну ангыламай сейирсинип тургъан заманда уа, алайына аланы алларында жылтырагъан кийимлери бла эки киши кёрюндюле.

⁵ Ол тиширыула, къоркъууда болуп, бетлерин жерге ийилтген заманда, алагъа: «Сиз сауну ёлгенлени арасында нек излейсиз?

⁶ Ол мында жокъду, Ол тиргизилгенди! Галилеяда болгъан заманында окъуна Аны сизге:

⁷ „Адам Улу гюняхлы адамланы къолларына берилирге, къачха керилирге эмда ючюнчю кюн тиргизилирге керекди“ деп айтханын эсигизге тюшюрюгюз», – дедиле.

⁸ Сора ала Иссаны сёзлерин эслерине тюшюрдюле.

⁹ Эмда, къабырдан къайтып, муну барын онбир сохтагъа да, битеу къалгъанлагъа да билдирдиле.

¹⁰ Муну абустоллагъа айтханла, Магдаллы Мариям, Иоханна, Якъупну анасы Мариям эм ала бла болгъан башха тиширыула эдиле.

¹¹ Абустоллагъа быланы сёзлери бош кёрюндюле эмда тиширыулагъа ийнанмадыла.

¹² Алай болсада Петер, туруп, чабып къабыргъа барды эмда энишге ийилип, жаланда кебинлени алайда тургъанларын кёрюп, болуннган ишге кеси-кесинден сейирсинип, артха къайтды.

Амаюс элге баргъан эки сохта

¹³ Ол кюн окъуна аладан экеулен Иерусалимден алтмыш стадия узакълыкъда болгъан Амаюс атлы бир элге бара тура эдиле.

¹⁴ Ала битеу бу болуннганланы юсюнден кеси араларында сёлеше бара эдиле.

¹⁵ Ала, кеси араларында сёлешип, ойлашып баргъан заманда, Исса Кеси да жууукълашып, ала бла барып тебиреди.

¹⁶ Алай болгъанлыкъгъа аланы кёзлери тыйылгъан эдиле, ол себепден ала Аны танымадыла.

¹⁷ Ол а алагъа: «Сиз кеси арагъызда нени юсюнден ойлаша барасыз?» – деди. Ала мудахланып тохтадыла.

¹⁸ Клейопа атлы, аладан бирлери, Анга жууапха: «Сен Иерусалимге келгенледен бирлери болуп, бу кюнледе анда болуннганны къалай билмейсе?» – деди.

¹⁹ Ол алагъа: «Не болуннганны?» – деди. Ала Анга: «Назаретли Иссагъа не болгъанын. Ол Аллахны эм битеу халкъны аллында иши бла да, сёзю бла да кючлю файгъамбар эди.

²⁰ Бизни баш дин къуллукъчуларыбыз бла башчыларыбыз Аны ёлтюрюрге сюдге бергендиле эмда Аны къачха кердиргендиле.

²¹ Биз а Израильни къутхарлыкъ Олду деп умут этген эдик. Андан сора да, бу иш болгъанлы уа энди ючюнчю кюн окъуна болады.

²² Алай а бизникиледен бир къауум тиширыу бизни сейирсиндиргендиле: ала эрттенликде эртте къабыргъа баргъанларында,

²³ (Анда) Аны ёлюгюн тапмагъандыла. Ала келип, Ол сауду деп айтхан мёлеклени кёргенбиз, – деп айтхандыла.

²⁴ Сора бизникиледен бир къауумла къабыргъа барып, (барын да) тиширыула айтханча болуп тапхандыла. Кесин а кёрмегендиле», – дедиле.

²⁵ Ол заманда Исса алагъа: «Эй ангылаусузла эм файгъамбарланы битеу айтханларына кеч ийнаныучула!

²⁶ Масих алай азап чегип, Кесини махтаууна алай жетерге керек тюйюлмю эди?» – деди.

²⁷ Эм Мусадан башлап, битеу (Сыйлы) Китаплада Кесини юсюнден битеу файгъамбарланы айтханларын алагъа ангылатды.

²⁸ Сора ала ол баргъан эллерине жууукълашдыла. Исса алагъа андан ары кетерге мурат этгенча кёргюзтдю.

²⁹ Ала уа: «Бизни бла къал, ингир жууукълашады, кюн да энди батаргъа тебирегенди», – деп, Аны тыя эдиле. Сора Ол (юйге) кирип, ала бла къалды.

³⁰ Ала бла олтургъан заманында уа, Ол, ётмек алып, алгъыш этип, сындырып, алагъа берди.

³¹ Ол заманда аланы кёзлери ачылып, ала Аны таныдыла, алай а Ол алагъа кёрюнмей къалды.

³² Сора ала бир бирлерине: «Ол жолда бизни бла сёлешип, бизге (Сыйлы) Китапланы ангылатхан заманда, бизни жюрегибиз бизни ичибизде эримейми эди?» – дедиле.

³³ Сора олсагъат окъуна туруп, Иерусалимге къайтып, онбир абустолну да, ала бла болгъанланы да бирге жыйылып тургъанлай тапдыла.

³⁴ Ала уа, «Раббий кертиси да тиргизилгенди, Шимоннга да кёрюннгенди», – дей эдиле.

³⁵ Была да жолда алагъа не болгъанны да, Исса ётмекни сындыргъан заманында ала Аны къалай таныгъанларын да айтдыла.

Исса онбир сохтасына кёрюнеди

³⁶ Ала муну айтханда, Исса Кеси аланы араларында тохтап, алагъа: «Сизге ырахатлыкъ!» – деди.

³⁷ Ала, жунчуп, къоркъуп, ауангы кёрген сундула.

³⁸ Ол а алагъа: «Нек жунчуйсуз, сизни жюреклеригизге аллай акъылла нек киредиле?

³⁹ Мени къолларыма эмда аякъларыма къарагъыз, бу Мен Кесимме. Манга тийип кёрюгюз эм эслеп къарагъыз, нек десегиз ауангыны, сиз Менде кёргенча эти бла сюеклери болмайды», – деди.

⁴⁰ Муну айтып, алагъа къолларын бла аякъларын кёргюзтдю.

⁴¹ Ала асыры къууаннгандан энтда ийнанмай сейирсинип тургъан заманда уа, Ол алагъа: «Сизни мында бир ашар затыгъыз бармыды?» – деди.

⁴² Ала Анга бишген чабакъ кесек бла таракъ бал бердиле.

⁴³ Ол да алып, аланы алларында ашады.

⁴⁴ Сора алагъа: «Мени юсюмден Мусаны Таурат китабында, файгъамбарланы китапларында эмда Забурда битеу жазылгъанла толургъа керекдиле деп, сизни бла болгъан заманында, ма муну юсюнден айтхан эдим Мен сизге», – деди.

⁴⁵ Ол заманда алагъа (Сыйлы) Китапланы ангыларгъа акъылларын ачды,

⁴⁶ Сора алагъа: «Алай жазылгъанды, Масих алай азап чегип, ёлгенледен ючюнчю кюн тиргизилирге керек эди

⁴⁷ Эмда, Иерусалимден башлап, битеу миллетлеге тобагъа къайтышыудан бла гюняхланы кечирилиуюнден хапар Аны аты бла билдирилирге керекди.

⁴⁸ Сиз а бу затлагъа шагъатласыз.

⁴⁹ Мен сизге Атамы берирге айтханын иерикме, сиз а, огъартындан кюч алгъынчы, Иерусалим шахарда къалыгъыз», – деди.

Исса кёкге кётюрюледи

⁵⁰ Сора аланы шахардан Бейтхиниге дери чыгъарды эмда, къолларын кётюрюп, алагъа алгъыш этди.

⁵¹ Алагъа алгъыш этген заманында, аладан кете-кете, кёкге кётюрюле башлады.

⁵² Ала Анга сежда этдиле, сора уллу къууанч бла Иерусалимге къайтдыла

⁵³ Эмда хар заманда табыныучу юйде болуп, Аллахха шукур этип, махтау салып турдула. Амин.