Лука 23 - Сыйлы Инжил бла Забур

Исса Римли оноучу Пилатны аллында

¹ Сора битеу ол кёп халкъ, къозгъалып, Иссаны Пилатха элтип барып:

² «Ол бизни миллетибизни бузгъанын кёрдюк. Ол кесарьгъа жасакъ берирге къоймайды. Кесине да Масих Патчах атайды», – деп, Аны терслеп башладыла.

³ Пилат Анга: «Сен Иудей Патчахмыса?» – деп сорду. Исса анга жууапха: «Сен айтаса», – деди.

⁴ Пилат баш дин къуллукъчулагъа бла халкъгъа: «Бу Адамда мен бир тюрлю бир терслик тапмайма», – деди.

⁵ Ала уа: «Ол халкъны къозгъайды, Галилеядан башлап былайгъа дери, битеу Иудеяда юйретиуюн жаяды», – деп къадалдыла.

⁶ Пилат Галилея дегенни эшитгенлей: «Ол галилеялымыды да?» – деп сорду.

⁷ Сора, (Исса) Иродну областындан болгъанын билип, Пилат Аны Иродха ийди. Ирод да ол кюнледе Иерусалимде эди.

⁸ Ирод, Иссаны кёргенинде, бек къууанды. Аны юсюнден кёп зат эшитгени себепли, Аны кёрюрге эрттеден бери сюе эди. Андан неда болсун бир (сейирлик) илишан кёрюрге умут эте эди.

⁹ Ол Иссагъа кёп соруула сорду, Исса уа анга бир да жууап бермеди.

¹⁰ Баш дин къуллукъчула бла дин алимле уа, сюелип, Аны къаты терслей эдиле.

¹¹ Алай болсада, Ирод кесини аскерчилери бла Аны сансыз этип, хыликкя этип, Анга жарыкъ бетли кийим кийдирип, артха Пилатха къайтарды.

¹² Сора ол кюн Пилат бла Ирод шуёх болдула, нек десегиз алгъын бир бирлери бла жау эдиле.

Пилатны хукмусу

¹³ Пилат а, баш дин къуллукъчуланы, таматаланы эм халкъны жыйып,

¹⁴ Алагъа: «Сиз бу Адамны манга халкъны бузады деп келтирдигиз. Ма, мен сизни аллыгъызда тинтип къарагъанма эм бу Адамда сиз Анга салгъан терсликледен бирин да тапмагъанма.

¹⁵ Ирод да тапмагъанды, нек десегиз Ирод Аны артха бизге къайтаргъанды. Ма, Ол ёлтюрюлюрге тийишли бир зат да этмегенди.

¹⁶ Ол себепден Аны тюйдюрюп, эркин этейим», – деди.

¹⁷ Пилатха уа (хар) Къутхарылыу байрамда алагъа бир тутмакъны эркин этерге керек эди.

¹⁸ Алай болгъанлыкъгъа, битеу халкъ: «Анга ёлюм! Бизге уа Бараббаны эркин эт!» – деп къычырып башлады.

¹⁹ Барабба уа, шахарда халкъны къозгъагъаны эм адам ёлтюргени ючюн, тюрмеге салынып эди.

²⁰ Иссаны эркин этерге сюйюп, Пилат дагъыда ауазын кётюрдю.

²¹ Алай болгъанлыкъгъа ала: «Аны къачха кер, къачха кер!» – деп къычыра эдиле.

²² Пилат ючюнчю кере алагъа: «Не аманлыкъ этгенди да Ол? Ёлтюрюлюрге тийишли мен Анда бир терслик тапмагъанма, ол себепден Аны тюйдюрюп эркин этейим», – деди.

²³ Ала уа уллу къычырыкъ бла: «Аны къачха кер!» – деп къысып турдула. Сора халкъны эмда баш дин къуллукъчуланы къычырыкълары хорлады.

²⁴ Пилат, аланы тилегенлерича болсун деп, хукму этди.

²⁵ Халкъны къозгъагъаны эм адам ёлтюргени ючюн тюрмеге салыннган, ол ала тилегенни эркин этди, Иссаны уа аланы эркинликлерине берди.

Иссаны къачха кередиле

²⁶ (Аскерчиле) Иссаны алып баргъан заманларында, сабандан келе тургъан, Шимон атлы бир киринейлини тутуп, анга къачны кётюртюп, Иссаны ызындан элтдирдиле.

²⁷ Иссаны ызындан бек кёп халкъ да, Анга сарнап жилягъан тиширыула да бара эдиле.

²⁸ Исса уа, алагъа бурулуп: «Иерусалимни къызлары! Манга жилямагъыз, алай а кесигизге эм сабийлеригизге жилягъыз.

²⁹ Нек десегиз: „Насыплыдыла къаратонла, къозламагъан къарынла, асырамагъан эмчекле!“ деп айтыр кюнле келедиле.

³⁰ Ол заманда адамла таулагъа: „Бизни юсюбюзге ауугъуз!“, дуппурлагъа да: „Бизни басыгъыз!“ деп айтып башларыкъдыла.

³¹ Кёгерген терекге алай эте эселе, сора къуругъаннга уа не боллукъду?» – деди.

³² Исса бла ёлтюрюрге эки аманлыкъчыны да элте эдиле.

³³ Сора Баш Сюек атлы жерге келгенлеринде, анда Иссаны да, аманлыкъчыланы да, бирин онг жанында, экинчисин а сол жанында къачха кердиле.

³⁴ Исса уа: «Ата! Кеч былагъа; была не этгенлерин билмейдиле», – деди. Сора (аскерчиле) Аны кийимлерин чёп атып юлеше эдиле.

³⁵ Халкъ анда тохтап къарай эди. Ала бла бирге таматала да: «Башхаланы къутхара эди. Аллах сайлагъан Масих Ол эсе, Кеси-Кесин къутхарсын», – деп хыликкя эте эдиле.

³⁶ Аны кибик аскерчиле да Аны масхара эте эдиле, къатына келип, Анга мысты чагъыр берип:

³⁷ «Сен Иудей Патчах эсенг, Кесинг-Кесинги къутхар», – дей эдиле.

³⁸ Сора Аны баш жанында, грек, рим эмда чюйют сёзле бла: «Бу Иудей Патчахды», – деп жазылгъан жазыу да бар эди.

³⁹ Асылгъан аманлыкъчыладан бирлери Анга аман айтып: «Сен Масих эсенг, Кесинги да, бизни да къутхар», – дей эди.

⁴⁰ Экинчиси уа: «Огъесе, кесинге да бу затха сюд этилип тургъанлай, сен Аллахдан къоркъмаймыса?

⁴¹ Бизге тюз сюд этилгенди, биз этген ишлерибизге тийишлисин алгъанбыз. Ол а бир аман иш этмегенди», – деп, аны тыя эди.

⁴² Сора Иссагъа: «Патчахлыгъынга келген заманынгда, Раббий, мени эсинге тюшюр!» – деди.

⁴³ Исса да анга: «Кертисин айтама санга, бюгюн окъуна Мени бла жаннетде боллукъса», – деди.

Иссаны ёлюмю

⁴⁴ Кюнню алтынчы сагъатына жууукъ болгъан эди, сора тогъузунчу сагъатха дери битеу жерде къарангы болуп къалды.

⁴⁵ Кюн да мутхуз болду, табыныучу юйде жабыу да ортасындан жыртылып айырылды.

⁴⁶ Исса, уллу ауаз бла къычырып: «Ата! Жанымы Сени къолунга береме!» – деди. Сора муну айтып, жанын берди.

⁴⁷ Жюзбашчы уа, болуннган ишни кёргенинде, Аллахха махтау салып: «Кертиси да бу Адам тюзлюклю Киши эди», – деди.

⁴⁸ Бу тамашагъа жыйылгъан битеу адамла да болуннганны кёргенде, кёкюреклерин тюе-тюе къайта эдиле.

⁴⁹ Иссаны таныгъанла бары да, Аны ызындан Галилеядан келген тиширыула да бу болуннганнга узакъдан къарап тура эдиле.

Исса асыралады

⁵⁰ Ол заманда Юсюп атлы биреу, кенгешни члени, огъурлу эм тюзлюклю адам,

⁵¹ Кенгешни бегимине эм ишлерине ыразы болмагъан, Иудеяда Араматия шахардан, кеси да Аллахны Патчахлыгъын сакълагъан адам,

⁵² Пилатха келип, Иссаны ёлюгюн тиледи.

⁵³ Сора, ёлюкню къачдан тюшюрюп, гетен къумач бла кебинлеп, къаяда къазылгъан, алыкъа анда бир киши да салынмагъан къабыргъа салды.

⁵⁴ Ол кюн байрым кюн эди, шабат кюн жетип келе эди.

⁵⁵ Исса бла Галилеядан келген тиширыула да, ызындан барып, аны ёлюгю ары къалай салыннганына, къабыргъа къарап тура эдиле.

⁵⁶ Къайтхандан сора уа ариу ийисли затла бла мюр хазырладыла, шабат кюн а фарызгъа кёре тынч къалдыла.