Лука 22 - Сыйлы Инжил бла Забур

Иуда Иссаны сатады

¹ Къутхарылыу байрам атлы ачымагъан ётмеклени байрамы жууукълаша эди.

² Баш дин къуллукъчула бла дин алимле, халкъдан къоркъгъанлары ючюн, Иссаны жояргъа амал излей эдиле.

³ Онекисинден бири болгъан, Искариот аталгъан Иудагъа уа шайтан кирген эди.

⁴ Иуда, баш дин къуллукъчулагъа бла табыныучу юйню къалауур башчыларына барып, Иссаны алагъа къалай сатарындан ала бла сёлешди.

⁵ Ала къууандыла, анга ахча да берирге келишдиле.

⁶ Ол алагъа сёз берди, сора Иссаны алагъа халкъ болмагъан жерде тутуп берирге тап заман излеп башлады.

Къутхарылыу байрамны ашы

⁷ Къурман къозуну кесерге керек болгъан, ачымагъан ётмеклени кюню да жетди.

⁸ Сора Исса: «Барыгъыз, бизге Къутхарылыу байрамны ашын хазырлагъыз, ашайыкъ», – деп Петерни бла Ахияны ийди.

⁹ Ала уа Анга: «Бизге къайда хазырларгъа буюраса?» – дедиле.

¹⁰ Ол алагъа: «Ма, сиз шахаргъа кирген заманда, къошун бла суу алып баргъан адам сизге жолугъур. Аны ызындан, ол кирген юйге барып,

¹¹ Ол юйню иесине: „Устаз санга: ,Мен сохталарым бла бирге Къутхарылыу байрамны ашын ашарыкъ къонакъ отоу къайдады?‘ дейди“ деп айтыгъыз.

¹² Ол а сизге жасалгъан огъаргъы уллу отоуну кёргюзтюр, анда хазырлагъыз», – деди.

¹³ Ала, барып, (барын да Исса) айтханыча табып, (анда) Къутхарылыу байрамны ашын хазырладыла.

¹⁴ Сора кезиую жетген заманда, Исса онеки абустол бла бирге ашаргъа олтурду.

¹⁵ Исса алагъа: «Мени азап чегеримден алгъа бу Къутхарылыу байрамны ашын сизни бла ашаргъа Мен бек сюе эдим.

¹⁶ Нек десегиз сизге айтама, ол Аллахны Патчахлыгъында тамам болгъунчугъа дери, энди аны ашарыкъ тюйюлме», – деди.

¹⁷ Сора аякъны алып, шукур этип: «Муну алыгъыз да кеси арагъызда юлешигиз.

¹⁸ Нек десегиз, Аллахны Патчахлыгъы келгинчи, жюзюмню кёгетинден этилгенни энди ичерик тюйюлме деп айтама сизге», – деди.

¹⁹ Сора ётмекни алып, шукур этип сындырды да: «Бу, сизни ючюн берилген Мени чархымды, Мени эсигизге тюшюрюрге муну этигиз», – деп, алагъа берди.

²⁰ Ашагъандан сора аякъны да алай алып: «Бу аякъ, сизни ючюн тёгюлген Мени къаным бла (бегитилген) жангы кесаматды.

²¹ Ма энди, Мени сатарыкъны къолу Мени бла бир столдады.

²² Болсада Адам Улу Анга алгъындан буюрулгъаныча барады, алай а Аны сатарыкъ адамгъа палах!» – деди.

²³ Сора ала бир бирлерине: «Муну этерик бизден ким болур?» – деп, соруп башладыла.

²⁴ Аладан къайсы уллугъа саналыргъа керекди деп, аланы араларында даулаш да болду.

²⁵ Исса уа алагъа: «Патчахла миллетлеге бийлик этедиле, оноучулукъ этгенле да игилик этиучюле атны жюрютедиле.

²⁶ Сиз а алай болмагъыз. Алай а, сизде уллу ким эсе да, гитчеча болсун, башчылыкъ этген да жумушчуча болсун.

²⁷ Нек десегиз ким уллуду: олтургъанмы, огъесе шапалыкъ этгенми? Олтургъан тюйюлмюдю? Мен а сизни арагъызда шапалыкъ этиучю кибикме.

²⁸ Алай болсада, сиз Мени сынагъан къыйынлыкъларымда Мени бла болгъанласыз.

²⁹ Мен да сизге, Мени Атам Манга бергенча патчахлыкъ береме.

³⁰ Мени Патчахлыгъымда Мени столумда ашарыкъсыз эм ичериксиз эмда Израильни онеки тукъумуна сюд этерге тахталада олтурлукъсуз», – деди.

³¹ Сора Раббий: «Шимон! Шимон! Сакъ бол! Шайтан сизни будайны элегенча элерге тилегенди.

³² Алай болгъанлыкъгъа, Мен сени ийманынг таркъаймасын деп, сени ючюн тилек этгенме, сен да къайтышхан заманынгда къарындашларынгы бегимли эт», – деди.

³³ Петер Анга: «Раббий! Мен Сени бла тюрмеге тюшерге да, ёлюрге да хазырма», – деп жууап берди.

³⁴ Исса уа: «Петер, санга айтама, бюгюн хораз къычыргъынчы, сен „Аны танымайма“ деп, Мени юч кере инкяр этериксе», – деди.

³⁵ Дагъыда алагъа: «Мен сизни бохчасыз, артмакъсыз, чарыкъсыз ийген заманымда, сизни бир затдан кереклигиз болгъанмыды?» – деди. Ала: «Бир затдан да угъай», – деп жууап этдиле.

³⁶ Сора Ол алагъа: «Энди уа, бохчасы болгъан аны алсын, артмагъы болгъан да алай, кимни (къылычы) жокъ эсе уа, жамычысын сатып, къылыч алсын.

³⁷ Нек десегиз сизге айтама: „Ол аманлыкъчыла бла бирге саналгъанды“ деп жазылгъан сёз да, Мени юсюмде толургъа керекди. Нек десегиз Мени юсюмден айтылгъан энди ахырына келеди», – деди.

³⁸ Ала: «Раббий! Ма, мында эки къылыч барды», – дедиле. Ол да алагъа: «Жетер!» – деди.

Зейтун тауда тилек этиу

³⁹ Сора Исса, чыгъып, адетича, Зейтун таугъа кетди. Аны сохталары да Аны ызындан кетдиле.

⁴⁰ Ол жерге келгенлей а, алагъа: «Сыналыугъа тюшмез ючюн, тилек этигиз», – деди.

⁴¹ Кеси да аладан таш сызыу узакълыгъына кетип, тобукъланып:

⁴² «Эй Ата! Сен бу (азап) аякъны Менден кери оздурургъа иги кёрсенг эди уа! Алай а Мен излегенча тюйюл, Сени буйругъунг болсун», – деп тилек этди.

⁴³ Кёкден мёлек, Иссагъа кёрюнюп, Аны кючлендирди.

⁴⁴ Сора Исса, термилиуге тюшюп, бегирек да кёл салып тилек этди. Аны терлегени да жерге тамгъан къан тамычылача эди.

⁴⁵ Тилек этиуюнден туруп, Исса, сохталарына келип, аланы къайгъыдан жукълап тургъанларынлай табып,

⁴⁶ Алагъа: «Сиз нек жукълайсыз? Сыналыугъа тюшмез ючюн, туругъуз, тилек этигиз!» – деди.

Исса тутулады

⁴⁷ Ол муну айта тургъан заманда, жыйын халкъ кёрюндю, халкъны аллында уа, онекисинден бири болгъан, Иуда деген келе эди. Ол, Иссаны уппа этер ючюн, Аны къатына келди. Ол алагъа: «Мен кимни уппа этсем, (Исса) Олду», – деп белги берген эди.

⁴⁸ Исса уа анга: «Иуда! Адам Улуну уппа этиуюнг бламы сатаса?» – деди.

⁴⁹ Иссаны биргесине болгъанла уа, ишни неге жетгенин кёрюп, Анга: «Раббий! Къылыч бла урайыкъмы?» – дедиле.

⁵⁰ Сора аладан бирлери баш дин къуллукъчуну къулун уруп, онг къулагъын кесип тюшюрдю.

⁵¹ Ол заманда Исса: «Къоюгъуз, жетер!» – деди. Сора, къулну къулагъына тийип, аны сау этди.

⁵² Исса Кесине къажау жыйылгъан баш дин къуллукъчулагъа, табыныучу юйню къалауур башчыларына эм таматалагъа: «Сиз аманлыкъчыгъача, (Мени тутаргъа) къылычла бла эм къазыкъла бла чыкъдыгъыз!

⁵³ Мен хар кюнден табыныучу юйде сизни бла болуп тургъан эдим, сиз Манга къолугъузну тийдирмеген эдигиз. Бу уа сизни сагъатыгъызды, къарангылыкъ бийлеген кезиудю», – деди.

⁵⁴ Сора, аны тутуп, элтип, баш дин къуллукъчуну юйюне келтирдиле. Петер а артхаракъ къалып, аланы ызларындан бара эди.

⁵⁵ Ала арбазны ортасында от этип бирге олтургъан заманда, Петер да аланы араларында олтурду.

⁵⁶ Бир къарауаш тиширыу, Петерни от жанында олтургъанын кёргенде, анга ышанлап къарап: «Бу да Аны бла эди», – деди.

⁵⁷ Петер а Иссаны инкяр этип: «Тиширыу, мен Аны танымайма», – деди.

⁵⁸ Бираздан дагъыда биреу, аны кёрюп: «Сен да аладанса», – деди. Петер а: «Тюйюлме, эй адам!» – деди.

⁵⁹ Бир сагъат чакълы заман озгъанлай, дагъыда биреу: «Кертиси да бу Аны бла эди, нек десегиз бу да галилеялыды», – деп къаты айтды.

⁶⁰ Петер а: «Эй адам, сени не айтханынгы билмейме», – деди. Сора олсагъат, ол муну айта туруп, хораз къычырды.

⁶¹ Ол заманда Раббий, бурулуп, Петерге къарады, Петер да Раббийни анга: «Бюгече хораз къычыргъынчы, Мени юч кере инкяр этериксе», – деп айтхан сёзюн эсине тюшюрдю.

⁶² Сора, тышына чыгъып, ачы жиляды.

⁶³ Иссаны тутуп тургъан адамла, Аны хыликкя этип тюе эдиле.

⁶⁴ Аны кёзлерин байлап, Аны бетине ура эдиле эмда Анга: «Файгъамбар эсенг айт, Сени ким урду?» – деп сора эдиле.

⁶⁵ Дагъыда Анга къажау кёп аман затла айта эдиле.

Исса синедрионну аллында

⁶⁶ Танг атханда уа, халкъны таматалары, баш дин къуллукъчула эм дин алимле, жыйылып, Иссаны кеслерини синедрионларына кийирдиле.

⁶⁷ Анга: «Масих Сенмисе? Айт бизге», – дедиле. Ол алагъа: «Сизге айтсам да, сиз ийнанырыкъ тюйюлсюз,

⁶⁸ Сизге сорсам да, сиз Манга жууап берлик тюйюлсюз. Мени эркин этерик да тюйюлсюз.

⁶⁹ Эндиден башлап, Адам Улу къудуретли Аллахны онг жанында олтурлукъду», – деди.

⁷⁰ Бары да Анга: «Сора Сен Аллахны Уланымыса?» – дедиле. Ол алагъа: «Мен болгъанымы, сиз айтасыз», – деп жууап этди.

⁷¹ Ала уа: «Бизге энди не шагъатлыкъ керекди? Биз кесибиз Аны ауузундан эшитдик энди», – дедиле.