Лука 21 - Сыйлы Инжил бла Забур

Башсыз къатынны саугъасы

¹ Андан сора Исса, къарап, хазна жыйылыучу жерге саугъаларын салгъан байланы кёрдю

² Эмда ары эки лептон салгъан, бир харип башсыз къатынны да кёрюп:

³ «Кертисин айтама сизге, бу жарлы башсыз къатын барындан да кёп салгъанды.

⁴ Нек десегиз ала бары да Аллахха берген саугъаларын кеслерини артыкъларындан салгъандыла, бу къатын а къолайсызлыгъындан, кечинир ючюн, къолунда неси бар эсе да, барын да бергенди», – деди.

Ахыр заманны илишанлары

⁵ Сора бир къауумла табыныучу юйню юсюнден, ол ариу ташла бла эм (Аллахха) берилген саугъала бла жасаннганды, – деп айтхан заманда, Исса:

⁶ «Аллай кюнле келликдиле, ол кюнледе уа сиз мында кёрген затладан таш юсюнде таш да къаллыкъ тюйюлдю: бары да чачыллыкъды», – деди.

⁷ Сора Анга: «Устаз! Бу ишле къачан боллукъдула? Эм быланы боллугъуну не илишаны барды?» – деп сордула.

⁸ Ол алагъа: «Сакъ болугъуз, сизни бир киши да жангылтмасын. Нек десегиз „(Масих) менме“ эмда „Заман келгенди“ деп, кёпле Мени атым бла келликдиле. Аланы ызларындан бармагъыз.

⁹ Къазауатланы эм къозгъалыуланы хапарын эшитген заманыгъызда уа къоркъмагъыз, нек десегиз алгъа была болургъа керекдиле. Алай а (дунияны) ахыры олсагъатда келмез», – деди.

¹⁰ Дагъыда алагъа: «Миллет миллетге, патчахлыкъ патчахлыкъгъа къажау къазауат этерикдиле.

¹¹ Жер-жерледе уллу жер тебиуле, ачлыкъла, ёлетле боллукъдула, къоркъунчлу халла эмда кёкден уллу илишанла кёрюнюрюкдюле.

¹² Быланы барындан да алгъа уа сизни тутарыкъдыла, сизге зулму этерикдиле, синагогалагъа берликдиле, тюрмелеге атарыкъдыла эм Мени атым ючюн патчахланы бла оноучуланы алларына элтирикдиле.

¹³ Бу уа сиз шагъатлыкъ этер ючюн боллукъду.

¹⁴ Алай бла не жууап этеригизни алгъындан ойлашмазгъа жюрегигизге салыгъыз.

¹⁵ Нек десегиз Мен сизге сёзге усталыкъ да, акъылманлыкъ да берликме. Сизге къажау тургъанланы бири да жууап этерге, не къажаулукъ этерге болаллыкъ тюйюлдю.

¹⁶ Аны кибик, сизни ата-аналарыгъыз да, къарындашларыгъыз да, жууукъларыгъыз да, шуёхларыгъыз да сатарыкъдыла, сизден бир къауумугъузну да ёлтюрлюкдюле.

¹⁷ Мени атым ючюн сизни бары да кёрюп болмай къаллыкъдыла.

¹⁸ Алай а сизни башыгъыздан бир чач тюгюгюз да тас боллукъ тюйюлдю.

¹⁹ Тёзюмюгюз бла жаныгъызны къутхарыгъыз.

²⁰ Иерусалимни аскерле къуршалагъанларын кёрген заманыгъызда уа, аны чачылыр заманы жетгенин билигиз.

²¹ Ол заманда Иудеяда болгъанла таулагъа къачсынла, шахарда болгъанла да андан чыкъсынла, ол тийреде болгъанла да ары кирмесинле.

²² Нек десегиз была (Китаплада) жазылгъанланы бары да толлукъ дерт жетдириу кюнледиле.

²³ Ол кюнледе бууаз къатынлагъа бла эмчек ичиргенлеге уа къыйынлыкъ боллукъду! Нек десегиз жер юсюнде уллу палах эм бу халкъгъа чамланыу боллукъду.

²⁴ Ала къылыч бла ёлтюрюллюкдюле эм битеу миллетлеге жесирге элтилликдиле. Миллетлени заманлары бошалгъынчыгъа дери, Иерусалимни миллетле малтарыкъдыла.

²⁵ Кюнде, айда, жулдузлада илишанла боллукъдула, жер юсюнде уа миллетле, тенгизни бла толкъунланы гюрюлдеулеринден абызырап хайран боллукъдула.

²⁶ Дуниягъа келлик палахланы сакълагъандан бла къоркъгъандан адамланы жанлары чыгъарыкъды, нек десегиз кёклени къудуретлери къозгъалырыкъдыла.

²⁷ Ол заманда Адам Улу, уллу къудурети эм аламатлыгъы бла, булутда келгенин кёрлюкдюле.

²⁸ Бу болуп башлагъан заманда уа, ёрге къарагъыз, башларыгъызны кётюрюгюз, нек десегиз сизни къутхарылыууугъуз жууукълашады», – деди.

²⁹ Сора алагъа бу оюм берген таурухну айтды: «Инжир терекге эм битеу тереклеге къарагъыз.

³⁰ Аланы чагъып башлагъанларын кёргенигизде, энди жай жууукъ болгъанын кесигиз да билесиз.

³¹ Ол халда сиз бу затланы болгъанын кёрген заманыгъызда, Аллахны Патчахлыгъы жууукъ болгъанын билигиз.

³² Кертисин айтама сизге, бу тукъум озгъунчу бу затла бары да боллукъдула.

³³ Кёк бла жер жокъ болсала да, Мени сёзлерим а къаллыкъдыла.

³⁴ Кесигизге сакъ болугъуз, сизни жюреклеригиз артыкъ ашаудан, ичгичиликден, жашау къайгъыладан ауурланмасынла эмда ол кюн сизге билмей тургъаныгъызлай келмесин.

³⁵ Нек десегиз ол кюн битеу жер юсюнде жашагъанланы тузакъ кибик келип тутарыкъды.

³⁶ Алай бла, битеу бу келлик палахладан къутулуп, Адам Улуну аллына барыргъа тийишли болур ючюн хар заманда да сагъайып туруп, тилек этигиз», – деди.

³⁷ Кюндюз Исса табыныучу юйде юйрете эди, кечелени уа, шахардан чыгъып, Зейтун тау атлы тауда ашыра эди.

³⁸ Битеу халкъ да эрттенликден башлап, Анга тынгылар ючюн табыныучу юйде Аны къатына келе эди.