Лука 17 - Сыйлы Инжил бла Забур

Гюнях, ийнаныу эм къуллукъ

¹ Дагъыда Исса Кесини сохталарына былай айтды: «Адамны гюняхха тюшюрюучю затла келмей амал жокъду, алай а ол затла кимни юсю бла келе эселе да, анга палах!

² Ол, бу гитчеледен бирлерин гюняхха тюшюргенден эсе, аны боюнуна тирмен ташны тагъып, аны тенгизге атсала, анга ол иги болур эди.

³ Кесигизге сынап къарагъыз. Сени къарындашынг санга къажау гюнях этсе уа, анга айыбын айт, сора тобагъа къайтышса, анга кеч.

⁴ Эм бир кюннге жети кере санга къажау гюнях этсе да, бир кюннге жети кере къайтышып, тобагъа къайтама десе, анга кеч», – деди.

⁵ Сора абустолла Раббийге: «Бизде ийнаныуну кёп эт», – дедиле.

⁶ Раббий былай айтды: «Сизни татыран бюртюк тенгли бир ийнаныуугъуз болуп, бу инжир терекге: „Тамырынг бла чыгъып, тенгизге орнал!“ деп айтсагъыз эди, ол сизни айтханыгъызны этер эди.

⁷ Сизден биригиз, сабан сюрген неда сюрюу кютген къулу болуп, ол сабандан къайтхан заманда, анга: „Терк окъуна, барып, столгъа олтур“ деп айтырыкъмыды?

⁸ Ол угъай эсенг, анга: „Манга ушхууур хазырла да, белинги къысып, мен ашапичип бошагъынчы, манга шапалыкъ эт, андан сора уа кесинг аша-ич“, деп айтмазмы?

⁹ Къулу аны буйругъун толтургъаны ючюн, анга сау бол деп айтырыкъмыды? Айтыр демейме.

¹⁰ Сиз да алай, сизге битеу буюрулгъанны толтургъан заманыгъызда: „Биз магъанасыз къуллабыз, этерге борчлу болгъан затыбызны этгенбиз“ деп айтыгъыз», – деди.

Келепен ауруулу он адам сау этиледиле

¹¹ Иерусалимге бара, Исса Самарияны бла Галилеяны арасы бла ёте эди.

¹² Сора Ол бир элге кирген заманда, келепен ауруулу он адам Анга тюбедиле. Ала уа, арлакъда тохтап,

¹³ Уллу ауаз бла: «Устаз Исса, бизге жазыкъсын!» – дей эдиле.

¹⁴ Аланы кёрюп, Ол алагъа: «Барыгъыз, дин къуллукъчулагъа кёрюнюгюз», – деди. Сора ала бара тургъан заманларында тазаланып къалдыла.

¹⁵ Аладан бирлери уа, сау болуп къалгъанын кёрюп, уллу ауаз бла Аллахха махтау сала, къайтып келди

¹⁶ Эмда, Иссагъа ыспас эте, беттёбен Аны аякъларыны аллына ауду. Ол а самариялы эди.

¹⁷ Ол заманда Исса: «Тазаланнганла он тюйюлмю эдиле? Тогъузу уа къайдадыла?

¹⁸ Жаланда бу тыш къыраллыдан башха, Аллахха махтау салыргъа къайтхан болмадымы?» – деди.

¹⁹ Сора анга: «Тур, бар, сени ийнаныуунг сени къутхарды», – деди.

Аллахны Патчахлыгъы къачан келликди?

²⁰ Фарисейле Иссагъа: «Аллахны Патчахлыгъы не заманда келликди?» – деп соргъанда, Ол алагъа: «Аллахны Патчахлыгъы белгили хал бла келлик тюйюлдю.

²¹ Эмда: „Ма, ол мындады“ неда „Ма, андады“ деп айтырыкъ тюйюлдюле. Нек десегиз Аллахны Патчахлыгъы сизни ичигиздеди», – деп жууап этди.

²² Сохталарына да былай айтды: «Сиз Адам Улуну кюнлеринден бирин окъуна кёрюрге кюсеген кюнле келликдиле, кёрлюк да тюйюлсюз.

²³ Адамла сизге: „Ма, мындады“ неда „Ма, андады“ деп айтырла. Бармагъыз эм ызындан айланмагъыз.

²⁴ Нек десегиз, шыбыла, кёкню бир жанындан жашнап, кёкню бирси жанына дери жылтырагъаны кибик, Адам Улу да Кесини кюнюнде алай боллукъду.

²⁵ Алай а, алгъа Ол кёп къыйналыргъа эм бу тукъум Аны къабыл этмей къояргъа керекди.

²⁶ Нухну заманында къалай болгъан эсе, Адам Улуну заманында да алай боллукъду.

²⁷ Нух кемеге миннген кюннге дери (адамла), ашай – иче, къатын ала, эрге бара тургъандыла. Сора суу къыяма келип барын да къыргъанды.

²⁸ Аны кибик Лутну заманында да, ашай – иче, ала, сата, урлукъ сала, мекям ишлей тургъандыла.

²⁹ Алай а, Лут Содомдан чыкъгъан кюн, кёкден от бла кукурт жауун жаууп, барын да къыргъаны кибик,

³⁰ Адам Улу кёрюннген кюнде да алай боллукъду.

³¹ Ол кюн, кеси юй башында болуп, хапчуклары уа юйде болгъан адам, аланы алыргъа тюшмесин, аулакъда болгъан адам да аны кибик артха айланмасын.

³² Лутну къатынын эсигизге тюшюрюгюз!

³³ Кеси жанын сакъларгъа кюрешген адам аны жоярыкъды, жанын жойгъан адам а, аны жашатырыкъды.

³⁴ Сизге айтама, ол кече экеулен бир тёшекде боллукъдула: бири алынырыкъды, бири уа къалдырыллыкъды.

³⁵ Эки тиширыу бирге тирмен тартырыкъдыла: бири алынырыкъды, бири уа къалдырыллыкъды.

³⁶ Экеулен аулакъда боллукъдула: бири алынырыкъды, бири уа къалдырыллыкъды», – деди.

³⁷ Бу затха Анга: «Къайда (боллукъду бу), Раббий?» – дедиле. Ол а алагъа: «Мыллык болгъан жерге къушла да жыйылырла», – деди.