Лука 15 - Сыйлы Инжил бла Забур

Тас болгъан къойну юсюнден таурух

¹ Иссагъа тынгылар ючюн битеу жасакъ жыйыучула бла гюняхлыла Анга жууукълаша эдиле.

² Фарисейле бла дин алимле уа, жаратмай: «Ол гюняхлыланы къабыл этеди эм ала бла ашайды», – дей эдиле.

³ Ол а алагъа бу оюм берген таурухну айтды:

⁴ «Кимди сизден жюз къою болуп, аладан бирин тас этсе, токъсан тогъузун аулакъда къоймазлыкъ эм тас болгъанны тапхынчы излей бармазлыкъ?

⁵ Тапса уа, къууанып, аны имбашларына алыр да,

⁶ Юйюне келип, шуёхларын бла къоншуларын чакъырып, алагъа: „Мени бла къууаныгъыз, мен тас болгъан къоюму тапханма!“ деп айтыр.

⁷ Тобагъа къайтышыргъа кереклилери болмагъан токъсан тогъуз тюзлюклюден эсе, тобагъа къайтышхан бир гюняхлыгъа кёкледе бегирек къууанырыкъдыла деп айтама сизге».

Тас болгъан ахчаны юсюнден таурух

⁸ «Неда он драхмасы болгъан бир тиширыу бир драхмасын тас этсе, чыракъ жандырып, юйюн сыйпап, аны тапхынчы, къадалып излемезми?

⁹ Тапса уа, шуёхларын бла къоншуларын чакъырып, алагъа: „Мени бла къууаныгъыз, мен тас болгъан драхмамы тапханма!“ деп айтыр.

¹⁰ Сизге айтама: тобагъа къайтышхан бир гюняхлы ючюн да Аллахны мёлеклеринде аллай къууанч болады», – деди.

Тас болгъан жашны юсюнден таурух

¹¹ Дагъыда былай айтды: «Бир адамны эки жашы болгъанды.

¹² Сора аладан кичиси атасына: „Атам! Мюлкден манга жетерик юлюшню манга бер“ дегенди. Сора аталары алагъа мюлкюн юлешгенди.

¹³ Бир бёлек кюн озгъандан сора, кичи жаш, битеу болгъанын жыйып, узакъ жерге кетгенди, анда хауле жашап, мюлкюн зыраф жойгъанды.

¹⁴ Ол болгъан затын жоюп бошагъан заманда уа, ол къыралгъа уллу ачлыкъ келип, ол да керекли болуп башлагъанды.

¹⁵ Сора, барып, ол къыралда жашагъанланы бирине жалчы болгъанды, ол а аны сабанларына тонгузла кютерге ийгенди.

¹⁶ Тонгузла ашагъан къабукъладан ол къарынын толтурургъа да ыразы эди, алай а анга бир киши да бермей эди.

¹⁷ Сора, эсин жыйып: „Мени атамы нелляй бир жалчысыны ётмеклери эркинди, мен а ачдан ёлеме!

¹⁸ Туруп, атама барайым да, анга: ,Атам! Мен кёкге да, санга да къажау гюнях этгенме,

¹⁹ Энди уа сени жашынгма дерге тийишли да тюйюлме, мени жалчыларынгы санына ал‘, деп айтайым“ дегенди.

²⁰ Сора туруп атасына кетгенди. Ол алыкъа узакъда болгъан заманда, атасы, аны кёрюп, жазыкъсынып, чабып барып, аны къучакълап, уппа эте эди.

²¹ Жаш а анга: „Атам! Мен кёкге да, санга да къажау гюнях этгенме, энди уа сени жашынгма дерге тийишли да тюйюлме“ дегенди.

²² Атасы уа кесини къулларына: „Эм иги кийимни келтирип, аны кийиндиригиз, къолуна жюзюк, аякъларына да чарыкъ беригиз

²³ Эмда асыралгъан тананы келтирип кесигиз. Ашайыкъ, къууанч этип башлайыкъ!

²⁴ Нек десегиз мени бу жашым, ёлюп, жангыдан сау болгъанды, тас болуп табылгъанды“ дегенди. Сора къууанч этип башлагъандыла.

²⁵ Аны тамата жашы уа сабанда эди. Ол къайтып келе, юйге къаршы болгъан заманында, жырлау, тепсеу таууш эшитгенди.

²⁶ Эмда жумушчуладан бирин чакъырып: „Бу не затды?“ деп соргъанды.

²⁷ Ол анга: „Къарындашынг келгенди, аны сау келгени ючюн, атанг да асыралгъан тананы кесгенди“ дегенди.

²⁸ Жаш, ачыуланып, кирирге унамагъанды. Атасы уа, чыгъып, аны чакъыра эди.

²⁹ Ол а атасына жууапха: „Ма, мен мынча жылны санга къуллукъ этеме эм бир заманда да сени айтханынгдан чыкъмагъанма. Сен а, мен шуёхларым бла къууаныр ючюн, бир заманда да манга улакъ окъуна бермегенсе.

³⁰ Сени мюлкюнгю саякъ тиширыула бла жойгъан, сени бу жашынг келген заманда уа, сен анга асыралгъан тананы кесгенсе!“ дегенди.

³¹ Ол а анга: „Жашым! Сен хар заманда да мени бласа, мени хар затым да сеникиди.

³² Сени бу къарындашынг, ёлюп, жангыдан сау болгъанына, тас болуп, табылгъанына уа къууаныргъа, къууанч этерге керек эди“ дегенди», – деди.