Лука 14 - Сыйлы Инжил бла Забур

Исса бир фарисейни юйюнде

¹ Бир шабат кюн Иссагъа фарисейлени таматаларындан бирини юйюне келип, ётмек ашаргъа тюшген эди, ала да Аны сынап къарай эдиле.

² Анда сары суу ауруудан ауругъан бир адам Аны аллына келди.

³ (Бу ишни юсю бла) Исса Таурат алимлеге бла фарисейлеге: «Шабат кюн сау этерге жараймыды?» – деп сорду.

⁴ Ала зат айтмадыла. Сора Исса (ол адамгъа) тийип, аны сау этип, ийди.

⁵ Ол заманда алагъа: «Сизден биригизни эшеги неда ёгюзю къуюгъа жыгъылса, аны шабат кюн да олсагъат окъуна чыгъармазмы?» – деди.

⁶ Аны бу сёзюне жууап эталмадыла.

⁷ Чакъырылгъанла биринчи жерлени сайлагъанларын эслеп, Исса алагъа бу оюм берген таурухну айтды:

⁸ «Сени биреу некях тойгъа чакъыргъан заманда, тёрге олтурма, алайсыз чакъырылгъанладан сенден да хурметли биреу болуп,

⁹ Эм сени да, аны да чакъыргъан, къатынга келип, санга: „Анга жер къой“ деп айтыргъа болур. Ол заманда уятлы болуп къыйырдагъы жерни алыргъа керекли болурса.

¹⁰ Алай а, чакъырылгъан заманынгда, келип къыйырдагъы жерге олтур, алай бла сени чакъыргъан къатынга келип: „Шуёхум! Ёрге олтур“ деп айтыр. Ол заманда сени бла олтургъанланы аллында санга хурмет болур.

¹¹ Нек десенг кеси-кесин кётюрген хар адам чёкдюрюлюр, кесин чёкдюрген а кётюрюлюр», – деди.

Ашха кимлени чакъырыргъа керекди

¹² Исса Аны чакъыргъаннга да: «Тюшлюк неда ушхууур этген заманынгда шуёхларынгы, къарындашларынгы, жууукъларынгы, бай къоншуларынгы чакъырма. Алай этсенг, ала да, сени бир заманда чакъырып, санга къайтарырла.

¹³ Алай а, къурманлыкъ этген заманынгда факъырланы, ырахынланы, акъсакъланы, сокъурланы чакъыр.

¹⁴ Сора ала санга къайтаралмагъанлары ючюн, насыплы боллукъса, нек десенг санга тюзлюклюлени тиргизилиуюнде къайтарылыр», – деди.

¹⁵ Муну эшитип, Аны бла олтургъанладан биреу Анга: «Аллахны Патчахлыгъында ётмек ашарыкъ адам насыплыды!» – деди.

¹⁶ Исса уа анга: «Бир адам, уллу ушхууур этип, кёплени чакъыргъанды.

¹⁷ Сора ушхууур заман жетгенде, чакъырылгъанлагъа: „Келигиз, энди бары да хазырды“, деп айтыргъа кесини къулун ийгенди.

¹⁸ Сора бары да бир тилли болгъанча, кечгинлик тилеп башлагъандыла. Биринчиси анга: „Мен жер сатып алгъанма, барып анга къараргъа керекме, манга кечеринги сенден тилейме“, дегенди.

¹⁹ Экинчиси: „Мен беш къош ёгюз сатып алгъанма, аланы сынаргъа барама, манга кечеринги сенден тилейме“, дегенди.

²⁰ Ючюнчюсю: „Мен къатын алгъанма, ол себепден келаллыкъ тюйюлме“, дегенди.

²¹ Сора ол къул къайтып, муну кесини бийине билдиргенди. Ол заманда юйню иеси, ачыуланып, кесини къулуна: „Чыгъып шахарны жолларына бла орамларына теркирек бар да факъырланы, ырахынланы, акъсакъланы, сокъурланы бери келтир“, дегенди.

²² Сора къул: „Бийим! Сени буйругъунг толтурулгъанды, алай а энтда жер барды“, дегенди.

²³ Бий къулуна: „Чыгъып жоллагъа бла буруу жанларына бар, (тапханларынгы) келирге алландыр, мени юйюм толсун.

²⁴ Ол себепден сизге айтама: ол алгъа чакъырылгъанладан бири да мени ушхуууруму татарыкъ тюйюлдю, нек десегиз чакъырылгъанла кёпдюле, сайланнганла уа аздыла“, дегенди», – деди.

Иссаны сохталары

²⁵ Иссаны биргесине кёп халкъ бара эди. Ол, бурулуп, алагъа:

²⁶ «Манга келип, кесини атасын, анасын, къатынын, сабийлерин, къарындашларын, эгечлерин эм аны юсюне да кеси жанын Менден эсе бек сюйген адам Мени сохтам болаллыкъ тюйюлдю.

²⁷ Эмда, кесини къачын кётюрюп, Мени ызымдан келмеген адам Мени сохтам болаллыкъ тюйюлдю.

²⁸ Нек десегиз сизден биреу, къала ишлерге сюйюп, аны ишлеп бошаргъа керекли заты бар болгъанын билир ючюн, алгъа олтуруп, къоранчын тергемезми?

²⁹ Алайсыз, мурдорун салып, ишлеп бошаялмай къалса уа, битеу кёргенле:

³⁰ „Бу адам, къала ишлеп башлап, бошаялмай къалды“, деп, аны хыликкя этерле.

³¹ Неда бир патчах, башха патчахха уруш бла бара туруп, „Манга жыйырма минг аскерчи бла келгеннге мен он минг аскерчи бла къажау турургъа болаллыкъмамы?“ деп, алгъа олтуруп кенгешмезми?

³² Алайсыз, (душман) алыкъа узакъда болгъан заманда, ол анга келечиле ийип жарашыулукъ тилер.

³³ Сизни хар биригиз да алай, битеу болгъан затын къоймаса, Мени сохтам болаллыкъ тюйюлдю.

³⁴ Туз иги затды, алай а тузну кючю кетсе, аны не бла тюзетирге боллукъду?

³⁵ Не жерге, не мешхутха жарамайды, аны тышына атып къоядыла. Эшитирге къулакълары болгъан адам эшитсин!» – деди.