Лука 13 - Сыйлы Инжил бла Забур

Тобагъа къайтышыгъыз

¹ Ол заманда бир къауумла, келип, Пилат аланы ёлтюртюп, къанларын аланы къурманларыны къаны бла къатышдыртхан галилеялыланы юсюнден Иссагъа айтдыла.

² Бу затха Исса алагъа: «Ол галилеялыла алай азап кёргенлери ючюн, галилеялыланы барындан да гюняхлы болгъанмы сунасыз?

³ Угъай, дейме сизге, алай а тобагъа къайтышмасагъыз, барыгъыз да алай жоюллукъсуз.

⁴ Неда юслерине Шилоха къала аууп ёлген ол онсегиз адам Иерусалимде жашагъанланы барындан да терс болгъанмы сунасыз?

⁵ Угъай, дейме сизге, алай а тобагъа къайтышмасагъыз, барыгъыз да алай жоюллукъсуз», – деди.

Кёгет бермеген терек

⁶ Сора бу оюм берген таурухну айтды: «Биреуню жюзюм бахчасында орнатылгъан бир инжир тереги болгъанды. Ол, келип, терекни юсюнде кёгет излегенди, алай а тапмагъанды.

⁷ Сора жюзюмчюге: „Ма, мен бу инжир терекден кёгет излерге ючюнчю жыл келеме да, тапмайма. Кес муну, жерни керексизге нек тутады?“ дегенди.

⁸ Жюзюмчю уа анга жууапха: „Бийим! Муну быйылгъы жылгъа да бир къой, мен энтда аны тёгерегин къазып, тёгерегине мешхут къуяйым.

⁹ Экинчи жыл кёгет берир эсе, бермесе уа, аны кесерсе“ дегенди», – деди.

Гуппур тиширыу сау этиледи

¹⁰ Синагогаланы биринде Исса шабат кюн юйрете эди.

¹¹ Онсегиз жылны ичинде къарыусузлукъ нюрю болгъан анда бир тиширыу бар эди. Аны бели гуппур болуп къалгъан эди эм не аз да тюзелирге болалмай эди.

¹² Исса аны кёрюп, къатына чакъырып: «Тиширыу! Сен аурууунгдан эркин боласа», – деди.

¹³ Сора тиширыуну юсюне къолларын салды, ол да олсагъат тюзелип къалды эм Аллахха махтау салып башлады.

¹⁴ Ол заманда синагоганы таматасы, Исса шабат кюн сау этгени ючюн ачыуланып, халкъгъа: «Иш этерге жарагъан алты кюн барды, шабат кюн тюйюл, ол кюнледе келигиз сау этилирге!» – деди.

¹⁵ Раббий анга жууапха: «Эки бетли! Сизден хар биригиз да кесини ёгюзюн неда эшегин шабат кюн куудушдан тешип, суу ичирирге элтмеймиди?

¹⁶ Ибрахимни бу къызын а, шайтан байлагъанлы ма энди онсегиз жыл болады, бу бугъоуладан аны шабат кюн эркин этерге керек тюйюлмю эди?» – деди.

¹⁷ Исса муну айтхан заманда, Анга къажау тургъанла бары да уялдыла, битеу халкъ да Аны махтаулу ишлерини барына да къууанды.

Татыран бюртюкню бла ачытхычны юсюнден таурухла

¹⁸ Сора Исса: «Аллахны Патчахлыгъы неге ушайды эмда аны неге ушатайым?

¹⁹ Ол, бир адам алып кесини бахчасында салгъан татыран бюртюкге ушайды: ол ёсдю, уллу терек болду, кёкдеги къанатлыла да аны бутакъларында бугъуна эдиле», – деди.

²⁰ Дагъыда: «Аллахны Патчахлыгъын неге ушатайым?

²¹ Ол, бир тиширыу алып, битеу тылыны ачытыр ючюн, юч ёлче ун бла къатышдыргъан ачытхычха ушайды», – деди.

Тар къабакъдан киригиз

²² Сора Исса, шахарлада, элледе жюрюп юйрете, Иерусалим таба бара эди.

²³ Биреу Анга: «Раббий! Къутхарылгъанла азмыдыла?» – деди. Исса уа алагъа:

²⁴ «Тар къабакъдан кирирге кюрешигиз, нек десегиз сизге айтама, кёпле кирирге излерикдиле, кираллыкъ да тюйюлдюле.

²⁵ Юйню Иеси туруп, эшикни этген заманда сиз тышында сюелип, эшикни къагъып: „Бийибиз! Бизге ач!“ деп башларсыз. Ол а сизге жууапха: „Сизни танымайма, къайдансыз сиз?“ деп айтыр.

²⁶ Ол заманда: „Биз Сени аллынгда ашапичип тургъан эдик, Сен бизни орамларыбызда да юйретген эдинг“ деп айтып башларсыз.

²⁷ Ол а: „Сизге айтама: сизни танымайма, къайдансыз сиз? Битеу дуруссузлукъ этиучюле, Мени къатымдан кетигиз!“ деп айтыр.

²⁸ Ибрахимни, Исхакъны, Якъупну эм битеу файгъамбарланы Аллахны Патчахлыгъында, кесигизни уа тышына къысталып кёрген заманыгъызда, анда жиляу эм тишлени къыжылдатыу боллукъду.

²⁹ Кюн чыкъгъандан да, кюн батхандан да, шималдан да, къыбыладан да келип, Аллахны Патчахлыгъында олтурушурла.

³⁰ Ма, ала алда боллукъ артдагъыла бардыла, ала артда боллукъ алдагъыла да бардыла», – деди.

Эй Иерусалим!

³¹ Ол кюн фарисейледен бир къауумла, келип, Иссагъа: «Чыкъ да, былайдан кет, нек десенг Ирод Сени ёлтюртюрге излейди», – дедиле.

³² Исса алагъа: «Барып, ол тюлкюге: „Ма, бюгюн бла тамбла жинлени къыстайма эм ауругъанланы сау этеме, ючюнчю кюн а ишими бошарыкъма (дейди)“ деп айтыгъыз.

³³ Болсада Мен бюгюн, тамбла эм бирси кюн жолума барыргъа керекме, нек десегиз файгъамбар Иерусалимден башха жерде жоюлургъа амал жокъду.

³⁴ Эй Иерусалим, файгъамбарланы къырыучу, санга жиберилгенлени ташла бла тюйюп ёлтюрюучю Иерусалим! Къанатлы кесини балаларын къанатларыны тюбюне жыйгъанча, Мен сени сабийлеринги жыяргъа ненча кере изледим, сиз а унамадыгъыз!

³⁵ Ма, энди бу юйюгюз сизге бош къалдырылады. Сизге айтама, сиз: „Алгъышлыды Раббийни аты бла Келген!“ деп айтхан заман келгинчиге дери, Мени кёрлюк тюйюлсюз», – деди.