Лука 12 - Сыйлы Инжил бла Забур

Кимден къоркъургъа керекди

¹ Ол заманда халкъ, мингле бла жыйылып, алай бла бир бирлерин тар этгенде, Исса алгъа Кесини сохталарына былай айтып башлады: «Фарисейлени ачытхычларындан кесигизни сакълагъыз, ол да эки бетлиликди.

² Ачылмазлыкъ бир жашырын зат жокъду, билинмей къаллыкъ тасха да жокъду.

³ Ол себепден сиз къарангыда айтхан зат жарыкъда эшитилликди, таша отоулада къулакъгъа шыбырдагъан затыгъыз да юй башладан айтылып билдирилликди.

⁴ Мен сизге – шуёхларыма айтама, чархны ёлтюрюучюледен, андан сора уа бир зат да эталмаучуладан къоркъмагъыз.

⁵ Алай а кимден къоркъуругъузну сизге айтайым: ёлтюргенден сора жаханимге салаллыкъ (Аллахдан) къоркъугъуз, кертиси да, сизге айтама, Андан къоркъугъуз!

⁶ Беш гитче къанатлы эки ассариягъа сатылмаймыдыла? Аллах а аланы бирин да унутуп къоймайды.

⁷ Сизни уа башыгъызда битеу чач тюклеригиз да саналыпдыла. Ол себепден къоркъмагъыз, сиз кёп гитче къанатлыладан багъалысыз.

⁸ Сизге айтама: Манга ийнанып адамланы аллында Мени ачыкъ къабыл этген хар адамны, Адам Улу да Аллахны мёлеклерини аллында ачыкъ къабыл этерикди.

⁹ Адамланы аллында Мени инкяр этген адам а Аллахны мёлеклерини аллында инкяр этилликди.

¹⁰ Адам Улуна къажау сёз ким айтса да, анга кечилликди, Сыйлы Нюрге аман айтхан адамгъа уа кечиллик тюйюлдю.

¹¹ Сизни синагога жамауатланы, таматаланы, оноучуланы алларына келтирген заманларында уа, къалай, неда не жууап этербиз, неда не айтырбыз деп къайгъы этмегиз.

¹² Нек десегиз не айтыргъа керек болгъанын Сыйлы Нюр сизге ол сагъатда юйретирикди», – деди.

Акъылсыз бай адам

¹³ Халкъны ичинден биреу Иссагъа: «Устаз! Мени къарындашыма айт, ол бизге къалгъан мюлкден юлешип, мени юлюшюмю берсин», – деди.

¹⁴ Исса уа анга: «Эй адам, сизге сюд этерге неда сизни арагъызны айырыргъа Мени ким салгъанды?» – деди.

¹⁵ Ол заманда алагъа: «Къарагъыз, хар тюрлю жутлукъдан кесигизни сакълагъыз, нек десегиз адамны ёмюрю аны мюлкюню кёплюгюне къарамайды», – деди.

¹⁶ Сора алагъа бу оюм берген таурухну айтды: «Бир бай адамны сабанында иги тирлик болгъанды.

¹⁷ Ол кеси-кесине: „Мен не этейим? Мирзеуюмю жыяргъа жерим жокъду“, деп сагъыш этгенди.

¹⁸ Сора: „Ма былай этерме: мирзеу жыйгъан кюфлерими бузарма да, уллула ишлерме, битеу мирзеуюмю да, битеу ырысхымы да ары жыярма.

¹⁹ Сора жаныма: ,Жаным! Сени кёп жыллагъа кёп ырысхынг барды. Тынчай, аша, ич, къууанч эт‘, деп айтырма“, дегенди.

²⁰ Аллах а анга: „Акъылсыз! Бюгече окъуна жанынгы сенден аллыкъдыла, сени хазырлагъанларынг а кимге къаллыкъдыла?“ дегенди.

²¹ Аллахны аллында байыкъмай, кесине хазна жыйгъан адамгъа уа алай болады», – деди.

Къайгъы этмегиз

²² Сора сохталарына: «Ол себепден сизге айтама: жаныгъыз ючюн не ашарбыз деп, не чархыгъыз ючюн не киербиз деп, къайгъы этмегиз.

²³ Жан ашдан, чарх да кийимден уллу магъаналыды.

²⁴ Къаргъалагъа къарагъыз: ала не урлукъ сепмейдиле, не оракъ ормайдыла, аланы не сакълагъан жерлери, не кюфлери жокъду. Аллах алагъа да ашатып турады. Сиз а къанатлыладан къаллай бир багъалысыз!

²⁵ Къайгъы этип да сизден биригиз кесини ёсюмюне бир къары къошаллыкъмыды?

²⁶ Алай бла, не азны да эталмай эсегиз, къалгъан затла ючюн не къайгъы этесиз?

²⁷ Лилияла къалай ёсгенлерине къарагъыз: урунмайдыла, урчукъ да ийирмейдиле. Алай а сизге айтама, Сюлемен битеу кесини аламатлыгъында да аладан бири кийиннгенча ариу кийинмегенди.

²⁸ Бюгюн бар болгъан, тамбла уа отха атыллыкъ, аулакъда ёсген хансны Аллах алай кийиндире эсе, сизни уа бегирек да кийиндирир, эй ийнаныулары азла!

²⁹ Алай бла, сиз не ашарбыз неда не ичербиз деп излемегиз эм къайгъы этмегиз.

³⁰ Нек десегиз бу затланы барын да бу дунияны миллетлери излейдиле. Сизни Атагъыз а, бу затла сизге керек болгъанын биледи.

³¹ Хар неден да бег’а Аллахны Патчахлыгъын излегиз, бу затла уа бары да сизге къошулуп берилирле.

³² Къоркъма, гитче сюрюу! Нек десегиз сизни Атагъыз сизге Патчахлыкъны берирге иги кёргенди.

³³ Мюлклеригизни сатыгъыз да садакъа беригиз. Эски болмазлыкъ бохчаланы, тауусулмазлыкъ хазнаны кесигизге кёкледе хазырлагъыз, ары уа гудучу жууукълашмайды, анда кюе да ашамайды.

³⁴ Хазнагъыз къайда болса, жюрегигиз да анда болур».

Жукъламай сакъ туругъуз

³⁵ «Беллеригизге белибаула къысылып, чыракъларыгъыз да жанып турсунла

³⁶ Эмда сиз, кеслерини бийлерини некях тойдан къайтырын сакълагъан, келип, эшикни къакъгъан заманында, олсагъат анга ачаргъа хазыр болуп тургъан адамлагъа ушагъыз.

³⁷ Аланы бийлери келип, жукъламай сакъ болуп тургъанларынлай тапса, ол къулла насыплыдыла. Кертисин айтама сизге, ол белин къысып, аланы олтуртуп, къатларына келип, алагъа шапалыкъ этип башлар.

³⁸ Экинчи сакълауулну заманында келсе да, ючюнчю сакълауулну заманында келсе да, аланы алай тапса, сора ол къулла насыплыдыла.

³⁹ Алай а сиз муну билигиз: юйню иеси, гудучуну не заманда келлигин билсе эди, жукъламай сакъ турур эди эм юйюн тонаргъа къоймаз эди.

⁴⁰ Сиз да хазыр болуп туругъуз, нек десегиз Адам Улу сизни акъылыгъызгъа келмеген сагъатда келликди», – деди.

⁴¹ Ол заманда Петер Анга: «Раббий! Бу оюм берген таурухну бизгеми айтаса, огъесе барынадамы айтаса?» – деди.

⁴² Раббий да: «Аны бийи кесини жумушчуларына тамата этип, алагъа заманында ётмек марданы юлешип берирге салгъан ышангылы эм акъыллы юй жюрютюучю ким эсе да,

⁴³ Аны бийи келип, аны алай эте тургъанлай тапса, ол къул насыплыды.

⁴⁴ Кертисин айтама сизге, (бийи) аны битеу мюлкюне тамата этерикди.

⁴⁵ Ол къул а кесини жюрегинден: „Бийим терк келмез“ деп, къулланы бла къарауашланы тюйюп, ашап-ичип, эсирип башласа уа,

⁴⁶ Ол къулну бийи, ол сакъламагъан кюнде, ол ойламагъан сагъатда келир, аны тюйюп ырмах этер, сора аны иймансызла бла бир болумгъа салыр.

⁴⁷ Кесини бийини буйругъун биле тургъанлай хазыр болуп турмагъан, аны буйругъун толтурмагъан къул а кёп тюйюллюкдю.

⁴⁸ Билмегенлей, азап берирге тийишли ишле этген а аз тюйюллюкдю. Кёп берилген хар адамдан кёп дауланыр, кимге кёп аманат этилген эсе, андан кёп суралыр.

⁴⁹ Мен дуниягъа от тюшюрюрге келгенме. Ол энди жанса, къалай сюерик эдим!

⁵⁰ Мен (башха) кёмюлдюрюлюу бла кёмюлдюрюлюрге керекме эмда ол иш болгъунчу, Мен къалай термилеме!

⁵¹ Мен дуниягъа жарашыулукъ келтирирге келгенми сунасыз сиз? Угъай, дейме сизге, алай а айырылыу келтирирге келгенме.

⁵² Нек десегиз мындан арысында беш адамы болгъан юйюрню ючеую экеуюне къажау, экеую да ючеуюне къажау болуп айырыллыкъдыла.

⁵³ Ата уланына къажау, уланы да атасына къажау, ана къызына къажау, къызы да анасына къажау, къайын ана келинине къажау, келини да къайын анасына къажау боллукъдула», – деди.

Илишанланы ангылау

⁵⁴ Халкъгъа уа былай айтды: «Сиз, кюн батхандан кётюрюлюп келген булутну кёрсегиз, олсагъатдан: „Жауун боллукъду“, – дейсиз, сора алай болады.

⁵⁵ Къыбыла жел урса: „Исси боллукъду“, – дейсиз, ол да болады.

⁵⁶ Эки бетлиле! Жерни бла кёкню бетин таныргъа билесиз, бу заманны уа къалай ангыламайсыз?

⁵⁷ Не болургъа кереклисин сиз кеси-кесигизге къарап нек ойлашмайсыз?

⁵⁸ Сен даучунг бла оноучугъа баргъан заманынгда, жолда аны бла жарашыргъа кюреш; алайсыз ол сени сюдге келтирир, сюд а сени къалауургъа берир, къалауур а сени тюрмеге салыр.

⁵⁹ Санга айтама: ахыр капегинги окъуна бергинчи, сен андан чыгъарыкъ тюйюлсе», – деди.