Лука 11 - Сыйлы Инжил бла Забур

Тилек къалай этерге керекди

¹ Бир жолда, Исса бир жерде тилек этип тохтагъан заманда, Аны сохталарындан бири Анга: «Раббий! Ахия кесини сохталарын юйретгенча, бизни тилек этерге юйрет», – деди.

² Ол алагъа: «Тилек этген заманыгъызда былай айтыгъыз: „Эй кёкледеги Атабыз! Сени атынг сыйлы тутулсун, Сени Патчахлыгъынг келсин, кёкде кибик, жерде да Сени буйругъунг болсун.

³ Бизни кюнлюк ётмегибизни бизге хар кюннге берип тур.

⁴ Бизни гюняхларыбызны кеч, нек десенг биз да бизни хар борчлубузгъа кечебиз эмда бизни терилиуге тюшюрме, алай а бизни хыйлачыдан къутхар“ деп айтыгъыз», – деди.

⁵ Дагъыда алагъа: «(Сёз ючюн), сизден биригизни шуёху болуп, анга кече арасында келип: „Шуёхум! Манга юч ётмек ёнгкюч бер,

⁶ Нек десенг мени бир шуёхум жолдан манга къайтханды, мени уа аны аллына салыргъа затым жокъду“ деп айтса,

⁷ Ол а юйюню ичинден анга жууапха: „Къыйнама мени, энди эшикле этилгендиле, мени сабийлерим да мени биргеме тёшекдедиле. Туруп санга зат бераллыкъ тюйюлме“ деп айтса,

⁸ Аны бла шуёхлугъу ючюн ол туруп анга бермесе да, аны тохтаусуз тилегени ючюн, туруп, ненча тилесе да анга берир, деп айтама сизге.

⁹ Мен да сизге айтайым: тилегиз – берилир сизге, излегиз – табарсыз, (эшикни) къагъыгъыз – ачылыр сизге.

¹⁰ Нек десегиз хар тилеген алады, излеген да табады, (эшикни) къакъгъаннга да ачылыр.

¹¹ Сизни арагъызда, жашы андан ётмек тилеген заманда, анга таш берлик, неда чабакъ тилеген заманда, чабакъны орунуна анга жилян берлик,

¹² Неда, жумуртха тилесе, анга акъырап берлик ата бармыды?

¹³ Алай бла, сиз огъурсуз болгъаныгъызлай да, сабийлеригизге ахшы саугъала берирге биле эсегиз, бегирек да кёкдеги Ата Андан тилегенлеге Сыйлы Нюрню берир», – деди.

Исса эмда беелзебул

¹⁴ Бир жолда Исса бир адамдан жинни къыстады, ол а тилсиз эди. Жин чыкъгъан заманда, тилсиз адам сёлешип башлады, халкъ да сейирсинди.

¹⁵ Аладан бир къауумла уа: «Ол жинлени, жинлени бийи беелзебулну кючю бла къыстайды», – дей эдиле.

¹⁶ Башхала уа, Аны сынар ючюн, кёкден илишан кёргюзтюрюн Андан даулай эдиле.

¹⁷ Исса уа, аланы ойлашыуларын билип, алагъа: «Кеси-кесинде юлешиннген хар патчахлыкъ халек боллукъду, кеси-кесинде юлешиннген юй да оюлур.

¹⁸ Шайтан кеси-кесинде юлешиннген эсе уа, аны патчахлыгъы къалай чыдарыкъды? Сиз а Манга, жинлени беелзебулну кючю бла къыстайса, – дейсиз.

¹⁹ Мен жинлени беелзебулну кючю бла къыстай эсем, сизни адамларыгъыз кимни кючю бла къыстайдыла? Ол себепден ала сизге сюдюле боллукъдула.

²⁰ Мен жинлени Аллахны къууаты бла къыстай эсем а, ишексиз сизге Аллахны Патчахлыгъы жетгенди.

²¹ Кючлю адам кесини юйюн сауутлары бла сакълагъан заманда, аны мюлкю къоркъуусузлукъдады.

²² Андан да кючлю, анга чабыуул этип, аны хорласа уа, ол ышаннган битеу сауутланы алыр, аны сыйырып алгъан мюлкюн да юлешир.

²³ Мени бла болмагъан, Манга къажауду, Мени бла жыймагъан, чачады.

²⁴ Харам нюр адамдан чыкъгъанда, тынчлыкъ излей, суусуз жерледе айланады. Излеп тапмай: „Мен чыкъгъан юйюме къайтайым“ дейди.

²⁵ Къайтханлай, аны сыйпалып, жасалып тургъанлай табады.

²⁶ Сора, барып, кесинден да огъурсуз башха жети харам нюрню биргесине алып келип, ары кирип анда жашайдыла. Ол адамны артдагъы халы алгъыннгыдан да аман болады», – деди.

²⁷ Ол муну айтхан заманда уа, бир тиширыу халкъны ичинден ауазын кётюрюп, Анга: «Сени жюрютген къарын, Сени асырагъан эмчекле насыплыдыла!» – деди.

²⁸ Исса уа: «Андан да тюзю, Аллахны сёзюне тынгылап, аны сакълагъанла насыплыдыла», – деди.

Жюнюсню илишаны

²⁹ Халкъ кёп жыйылып тебиреген заманда уа, Ол былай айтып башлады: «Бу тукъум бузукъ тукъумду. Ол илишан излейди, алай а Жюнюс файгъамбарны илишанындан башха, анга илишан бериллик тюйюлдю.

³⁰ Нек десегиз Жюнюс нинебалылагъа илишан болгъаныча, Адам Улу да бу тукъумгъа алай боллукъду.

³¹ Къыбыладагъы тиширыу патчах хукму кюнде бу тукъумну адамлары бла сюдге туруп, аланы терслерикди. Нек десегиз ол Сюлеменни акъыллылыгъына тынгыларгъа жерни этегинден келген эди. Мындагъы уа Сюлеменден уллуду.

³² Нинебалыла хукму кюнде бу тукъум бла сюдге туруп, аны терслерикдиле, нек десегиз ала Жюнюсню ууазындан тобагъа къайтышхандыла. Мындагъы уа Жюнюсден уллуду».

Чархны чырагъы

³³ «Бир киши да, чыракъны жандырып, аны таша жерге, не юй сауутну тюбюне салмайды, алай а юйге киргенле жарыкъ кёрюр ючюн, чырахтаннга салады.

³⁴ Чархха чыракъ кёздю. Алай бла, сени кёзюнг таза болса, битеу чархынг жарыкъ боллукъду, ол аман болса уа, сени чархынг да къарангы боллукъду.

³⁵ Алай бла, сакъ бол, сенде болгъан жарыкъ къарангы болуп чыкъмасын!

³⁶ Сени битеу чархынг жарыкъ эсе эм бир къарангы жери да жокъ эсе уа, сени, чыракъ жарыгъы бла жарытханча, болгъан затынг алай жарыкъ боллукъду», – деди.

Сизге палах, фарисейле!

³⁷ Исса муну айтхан заманда, бир фарисей Аны тюшлюк ашаргъа юйюне тилеп чакъырды. Ол келип олтурду.

³⁸ Ашарны аллында Исса къолларын жуумагъанын кёрюп, фарисей сейирсинди.

³⁹ Раббий а анга: «Энди сиз, фарисейле, аякъны бла табакъны тышын тазалайсыз, сизни ичигиз а урлаудан бла хыйлачылыкъдан толуду.

⁴⁰ Оюмсузла! Тышын Ким жаратхан эсе, ичиндегин да Ол жаратмагъанмыды?

⁴¹ Андан эсе, сизде болгъан затдан садакъа беригиз: ол заманда сизни хар затыгъыз да таза болур.

⁴² Алай а сизге, эй фарисейле, палах! Сиз дугъумадан, рутадан эм хар тюрлю тахта кёгетледен зекят бересиз, тюзлюкге бла Аллахны сюймекликге уа эс бурмайсыз. Быланы этерге, аланы да къоймазгъа керек эди.

⁴³ Фарисейле, сизге палах! Синагогалада алда олтурургъа, халкъ жыйылыулада салам алыргъа сюесиз.

⁴⁴ Сизге палах, дин алимле бла фарисейле, эки бетлиле! Сиз адамла билмей юслери бла жюрюп айланнган жашырылгъан къабырла кибиксиз», – деди.

⁴⁵ Бу сёзге жууапха Таурат алимледен биреу Анга: «Устаз! Муну айтып, Сен бизни да кёлюбюзге тиесе», – деди.

⁴⁶ Исса уа: «Таурат алимле, сизге да палах! Сиз адамлагъа кётюрюрге тапсыз жюкле саласыз, кесигиз а алагъа бир бармагъыгъыз бла да тиймейсиз.

⁴⁷ Сизге палах! Сизни аталарыгъыз ёлтюрген файгъамбарлагъа кешенеле ишлейсиз.

⁴⁸ Муну бла сиз аталарыгъызны ишлерине шагъатлыкъ этесиз эм ала бла келишесиз. Нек десегиз ала файгъамбарланы ёлтюргендиле, сиз а алагъа кешенеле ишлейсиз.

⁴⁹ Ол себепден Аллахны терен акъыллылыгъы да: „Алагъа файгъамбарла эм абустолла иерикме, аладан да бир къауумларын ёлтюрлюкдюле, башхаларын а къыстап иерикдиле“ деп айтханды;

⁵⁰ Алай бла дуния жаратылгъандан бери тёгюлген битеу файгъамбарланы къанлары,

⁵¹ Абилни къанындан башлап, къурман этилиучю жерни бла табыныучу юйню арасында ёлтюрюлген Зекерияны къанына дери бу тукъумдан тёленирикди. Алайды деп, сизге айтама: бу тукъумдан тёленирикди.

⁵² Таурат алимле, сизге палах! Сиз билимни (эшигини) ачхычын алгъансыз, кесигиз да кирмегенсиз, киргенлеге да чырмау болгъансыз», – деди.

⁵³ Ол андан кете туруп, дин алимле бла фарисейле Анга бек къажау болуп, кёп затлагъа жууапла айтдырыргъа Аны къысып башладыла.

⁵⁴ Аны терслерча, Аны ауузундан бир зат эшитир ючюн, сылтау излей эдиле.