I Коринфлилеге 7 - Сыйлы Инжил бла Забур

Некяхлылыкъны юсюнден

¹ Ол сиз манга жазгъан затланы юсюнден а адамны тиширыугъа тиймегени игиди.

² Алай а, саякълыкъгъа тюшмез ючюн, хар эр кишини кесини къатыны болсун, хар тиширыуну да кесини эри болсун.

³ Эр къатынын кереклисича жаратып ариу кёрсюн, аны кибик къатын да эрине алай этсин.

⁴ Къатын кесини чархына эркин тюйюлдю, алай а эр эркинди; аны кибик эр да кесини чархына эркин тюйюлдю, алай а къатын эркинди.

⁵ Ыразылыкъ бла, бир кесек заманнга, ораза тутар эм тилек этер ючюн болмаса, бир-биригизден артха турмагъыз; андан сора уа, сизни тыйгъысызлыгъыгъыз бла шайтан сизни терилтмез ючюн, дагъыда бирге болугъуз.

⁶ Алай болгъанлыкъгъа муну мен эркинликча айтама, буйрукъча айтмайма.

⁷ Нек десегиз битеу адамла менича болурларын сюеме; алай а хар кимни Аллахдан анга берилген фахмусу барды, биреу алай этеди, башхасы уа башха тюрлю этеди.

⁸ Некяхсызлагъа бла башсыз къатынлагъа уа: алагъа менича къалсала игиди деп айтама;

⁹ Кеслерин тыяллыкъ тюйюл эселе уа, некяхлы болсунла; нек десегиз жаннгандан эсе, некяхлы болгъан игиди.

¹⁰ Некяхлары болгъанлагъа уа мен буйрукъ этмейме, Раббий буйрукъ этеди: къатын эринден айырылмасын.

¹¹ Айырылса уа, некяхсыз къалыргъа неда кесини эри бла жарашыргъа керекди. Эр да къатынын къоймасын.

¹² Болсада Раббий угъай, мен айтама: къарындашны къатыны ийманлыладан тюйюл эсе, ол къатын а аны бла жашаргъа ыразы эсе, ол къарындаш аны къоймасын.

¹³ Эри ийманлы болмагъан къатын да, эри аны бла жашаргъа ыразы эсе, эринден чыкъмасын.

¹⁴ Нек десегиз ийманлы болмагъан эр ийманлы къатыны бла сыйлы этиледи, ийманлы болмагъан къатын да ийманлы эри бла сыйлы этиледи. Алайсыз сизни сабийлеригиз таза болмаз эдиле, энди уа сыйлыдыла.

¹⁵ Ийманлы болмагъан айырылыргъа сюе эсе уа, айырылсын. Алай эсе къарындаш неда эгеч байламлы тюйюлдюле. Бизни жарашыулукъгъа чакъыргъанды Аллах.

¹⁶ Къатын, сен эринги къутхармазлыгъынгы къайдан билесе? Неда сен, эр, къатынынгы къутхармазлыгъынгы къайдан билесе?

Раббий чакъыргъанча жашагъыз

¹⁷ Алай а хар ким да Аллах анга шарт этгенча эм Раббий чакъыргъанча этсин; мен битеу жамауатлада алай буюрама.

¹⁸ Биреу сюннет этилгенден сора чакъырылгъан эсе, сюннетсиз болургъа кюрешмесин; сюннетсиз чакъырылгъан эсе, сюннет этдирмесин.

¹⁹ Сюннетлилик да, сюннетсизлик да бошду, алай а бары да Аллахны фарызларын тутуудады.

²⁰ Хар ким не болумда чакъырылгъан эсе, ол болумда къалсын.

²¹ Сен къул болуп чакъырылгъан эсенг да, жунчума; азат болаллыкъ эсенг а, игисинден хайырлан.

²² Нек десенг Раббийни чакъырыуун алгъан заманында къул болгъан адам, Раббийни азатыды; аны кибик азат болуп чакъырылгъан да Масихни къулуду.

²³ Сиз уллу багъа бла сатып алыннгансыз: адамлагъа къул болмагъыз.

²⁴ Къарындашла, хар ким не болумда чакъырылгъан эсе, Аллахны аллында ол болумда къалсын.

Некяхсызланы юсюнден

²⁵ Некяхлы болмагъанланы юсюнден мени Раббийден буйругъум жокъду, алай а Раббийден Анга тюз болургъа мархамат алгъаным кибик, акъыл юйретеме.

²⁶ Бусагъатдагъы къыйынлыкъгъа кёре, адамны алай къалгъанын игиге санайма.

²⁷ Сен къатынынга къошулупмуса? Айырылыуну излеме. Къатынсызмы къалгъанса? Къатын излеме.

²⁸ Алай а къатын алсанг да, гюнях этерик тюйюлсе. Къыз эрге барса да, гюнях этерик тюйюлдю. Алай а аллайланы бу дунияда къайгъылары боллукъду, мен а сизни ол къайгъыладан сакъларгъа сюеме.

²⁹ Къарындашла, мен сизге айтама: энди заман къысхады. Мындан ары къатынлары болгъанла болмагъанлача,

³⁰ Жилягъанла да жилямагъанлача, къууаннганла да къууанмагъанлача, сатып алгъанла да алмагъанлача,

³¹ Бу дуниядан хайырланнганла да хайырланмагъанлача болургъа керекдиле. Нек десегиз бу дунияны сыфаты озуп барады.

³² Мен а сизни къайгъысыз болуругъузну сюеме. Къатын алмагъан адам Раббийни къалай ыразы этейим деп, Раббийни ишлерини къайгъысын этеди.

³³ Къатыны болгъан а, къатынымы къалай ыразы этейим деп, бу дунияны ишлерини къайгъысын этеди. Эрге баргъан тиширыуну бла къызны да башхалыгъы барды:

³⁴ Эрге бармагъан, чархы бла да, нюрю бла да сыйлы болур ючюн Раббийни къалай ыразы этейим деп, Раббийни ишлерини къайгъысын этеди. Эри болгъан а, эрими къалай ыразы этейим деп, бу дунияны ишлерини къайгъысын этеди.

³⁵ Муну сизге хайыргъа айтама, сизге бугъоула салыр ючюн айтмайма, алай а сиз ариу хал бла тохтамай жубанчсыз Раббийге къуллукъ этер ючюн айтама.

³⁶ Кесини жетген къызы алай къалгъаны анга ушагъыусузгъа санагъан а, къалай сюе эсе, алай этсин, гюнях этерик тюйюлдю; аллайла эрге барсынла.

³⁷ Алай а кереклиси болуп жунчумай, кеси жюрегинден арсарсыз къаты эмда сюйгенича этерге эркин болуп, кесини жюрегинден къызын некяхсыз сакъларгъа таукел болгъан, иги этеди.

³⁸ Ол себепден кесини къызын эрге берген иги этеди, бермеген а андан да иги этеди.

³⁹ Къатын, аны эри сауда, эрине закон бла байланыпды. Аны эри ёлсе уа, кимге сюйсе да барыргъа эркинди, алай а Раббийни болгъанладан болсун ансы.

⁴⁰ Алай а башсыз къатын, мени фикириме кёре алай къалса, андан да насыплыды; мен а Аллахны Нюрю менде да барды деп ойлашама.