I Коринфлилеге 5 - Сыйлы Инжил бла Забур

Саякъ къарындаш

¹ Сизде мажюсюледе окъуна эшитилмеген аллай бир саякълыкъ чыкъгъанды, биреу къатыныны орунуна кесини атасыны къатынын жюрютеди деген керти хапар барды.

² Сиз а ёхтемленнгенсиз! Андан эсе жилясагъыз иги эди. Аллай ишни этген адам арагъыздан къысталсын.

³ Мен а, чархым бла сизде тюйюл эсем да, нюрюм бла уа сиздеме. Бу ишни этген адамгъа, мен сизде болгъанча энди сюд этгенме.

⁴ Раббийибиз Масих Иссаны аты ючюн жыйылгъан заманыгъызда, мени нюрюм да сизни бла болуп, Раббийибиз Масих Иссаны кючю бла

⁵ Ол адам, аны гюняхлы табийгъаты жоюлур ючюн, шайтаннга берилсин. Раббийибиз Масих Иссаны кюнюнде аны нюрю къутхарылсын.

⁶ Сизни махтаныр затыгъыз жокъду. Аз ачытхыч битеу тылыны ачытханын билмеймисиз?

⁷ Алай бла сиз, жангы тылы болур ючюн, эски ачытхычдан тазаланыгъыз. Кертиси да сиз ачытхычсызсыз; нек десегиз бизни Къутхарылыу Къозубуз болгъан Масих бизни ючюн къурманнга берилгенди.

⁸ Ол себепден эски ачытхыч бла, аман къылыкъ эм хыйлачылыкъ ачытхыч бла угъай, алай а таза жюреклиликни эм тюз ниетлиликни мыстысыз ётмеклери бла байрам этейик.

⁹ Мен сизге ийген къагъытымда, саякъ адамла бла тюбешмегиз деп жазгъан эдим.

¹⁰ Алай а бу дунияны саякъ неда жут адамлары бла, неда жыртхычлары бла, неда идоллагъа табыныучулары бла тюбешмегиз деп айтмайма. Нек десегиз алайсыз сизге бу дуниядан чыгъаргъа керек болур эди!

¹¹ Мен а сизге: къарындаш аталып, саякълыкъда, неда жутлукъда, неда идоллагъа табыныучулукъда, неда ачы тиллиликде, неда ичгичиликде, неда жыртхычлыкъда къалгъан адам бла тюбешмегиз, аллай адам бла бирге ашагъан да этмегиз деп жазгъан эдим.

¹² Нек десегиз тыш адамлагъа сюд этерге мени не ишим барды? Сиз жамауатдагъы адамлагъа сюд этмеймисиз?

¹³ Тыш адамлагъа уа сюд Аллах этеди. Алай бла, аман адамны арагъыздан чыгъарып атыгъыз.