I Коринфлилеге 3 - Сыйлы Инжил бла Забур

¹ Къарындашла, мен сизни бла Сыйлы Нюрге тынгылаучула бла сёлешгенча сёлеширге болалмагъанма, алай а гюняхлы табийгъатларына кёре жашагъанла бла, Масихни жолунда къагъанакъ сабийле бла сёлешгенча сёлешгенме.

² Мен сизге къаты аш тюйюл, сют бергенме; нек десегиз сиз ол заманда къаты ашны ашаргъа болалмай эдигиз, энтда да болалмайсыз.

Пауул фракциячыланы айыплайды

³ Не ючюн десегиз сиз алыкъа гюняхлы табийгъатыгъызгъа кёре жашайсыз. Сизни арагъызда зарлыкъ, даулашыула эм келишмеулюкле бар эселе, сора сиз гюняхлы табийгъатыгъызгъа кёре жашагъанла эмда адамланы адетлерин этгенле тюйюлмюсюз?

⁴ Биригиз: «Мен Пауулнума», биригиз а «Мен Аполлоснума», – дей эсегиз, сора сиз гюняхлы табийгъатыгъызгъа кёре жашагъанла тюйюлмюсюз?

⁵ Кимди Пауул? Кимди Аполлос? Ала жаланда сиз аладан эшитип ийман салгъан къуллукъ этиучюледиле. Раббий хар бирибизге бир иш бергенди.

⁶ Мен орнатханма, Аполлос сугъаргъанды, ёсдюрген а Аллах этгенди;

⁷ Ол себепден орнатыучу да, сугъарыучу да бошду, бары да ёсдюрюучю Аллахданды.

⁸ Орнатыучу бла сугъарыучу уа бирдиле, алай а хар бири да кесини урунуууна кёре саугъа аллыкъды.

⁹ Нек десегиз биз Аллахха къуллукъ этиучю нёгерлебиз, сиз а Аллахны сабанысыз, Аллахны къурулуш мекямысыз.

¹⁰ Мен Аллахдан манга берилген шафауат бла, ангылаулу къурулушчу кибик, мурдор салгъанма, башхасы уа аны юсюнде ишлейди; алай а хар ким да къалай ишлегенине къарасын.

¹¹ Нек десегиз бир киши да салыннган мурдордан, алай демеклик Масих Иссадан башха мурдор салаллыкъ тюйюлдю.

¹² Ол мурдорну юсюнде алтындан, кюмюшден, асыл ташладан, агъачдан, биченден, саламдан ким ишлей эсе да, –

¹³ Хар кимни иши ачыкъ болур, нек десегиз къыямат кюн аны кёргюзтюр. Хар кимни иши от бла ачыкъ болур, хар ишни къаллай болгъанын от сынар.

¹⁴ Кимни ишлеген иши чыдаса, ол саугъа алыр.

¹⁵ Ишлеген иши кюйген адам а зараннга тюшер. Кеси къутхарылыр, алай а отну ичинден ётген кибик болур.

¹⁶ Сиз Аллахны юйю болгъаныгъызны эм Аллахны Нюрю сизде жашагъанын билмеймисиз?

¹⁷ Аллахны юйюн чачхан адамны уа, Аллах жояр; нек десегиз Аллахны юйю сыйлыды, ол юй а сизсиз.

¹⁸ Бир киши да кеси-кесин терилтмесин. Сизден биреу бу ёмюрде кесин акъылманнга санай эсе, ол керти акъылман болур ючюн «акъылсыз» болсун!

¹⁹ Нек десегиз бу дунияны акъылманлыгъы Аллахны аллында акъылсызлыкъды. Китапда жазылгъаны кибик: «Аллах акъылманланы аланы хыйлачылыкълары бла тутады».

²⁰ Дагъыда: «Акъылманланы ойлашыулары фана болгъанын Раббий биледи», – деп жазылгъанды.

²¹ Алай бла бир киши да адамла бла махтанмасын; нек десегиз бары да сизнидиле:

²² Пауулму, неда Аполлосму, неда Кефамы, неда дуниямы, неда жашауму, неда ёлюммю, неда бу сагъатдагъымы, неда келлик замандагъымы – бары да сизниди.

²³ Сиз а Масихнисиз, Масих а Аллахныды.