I Коринфлилеге 16 - Сыйлы Инжил бла Забур

Сыйлыланы кереклилерине ахча жыйыу

¹ Сыйлыланы кереклилерине жыйыуда уа мен Галатияны жамауатларында белгилегенимча этигиз:

² Ыйыкъны биринчи кюнюнде сизни хар биригиз да, кесини онгуна кёре, берлик затын кесини юйюнде бир жанына салып сакъласын, алай бла мен келген заманда жыяргъа керек болмасын.

³ Келген заманымда уа, къагъытла да жазып, сиз тийишли кёрген адамланы, жыйгъан садакъагъызны Иерусалимге тапдырыргъа иерме.

⁴ Манга да ала бла барыргъа ушагъылы болса уа, сора ала мени бла барырла.

Пауулну энчи тилеклери

⁵ Мен Македониядан озгъандан сора, сизге келликме; нек десегиз мен Македонияны юсю бла барама.

⁶ Сизде уа, бираз турургъа неда къышны окъуна ашырыргъа болурма, алай бла сиз мени, барлыкъ жериме ашырырсыз.

⁷ Ол себепден мен энди сизни бла жолда бара кёрюшюрге сюймейме, алай а, Аллах онг берсе, сизде бир бёлек заманны турургъа умут этеме.

⁸ Эфесде уа мен эллинчи кюнню байрамына дери турлукъма,

⁹ Нек десегиз мында уллу эмда жараулу ишле этерге манга эшик ачылыпды, манга къажау тургъанла да кёпдюле.

¹⁰ Тимотей сизге келсе уа, ол сизде къоркъуусуз болуруна къарагъыз; нек десегиз, мени кибик, ол да Раббийни ишин этеди.

¹¹ Ол себепден аны бир киши да сансыз этмесин, алай а ол манга келир ючюн, аны ырахатлыкъ бла ашырыгъыз; нек десегиз мен къарындашла бла аны сакълайма.

¹² Аполлос къарындашны юсюнден а, ол къарындашла бла сизге барсын деп, мен андан бек тилеген эдим, алай а ол бу сагъатда барыргъа бир да сюймегенди. Онг тапхан заманында келликди.

¹³ Сагъайып болугъуз, ийманда туругъуз, кишилиги болгъанла, кючлюле болугъуз;

¹⁴ Сизде хар неда сюймеклик бла болсун.

¹⁵ Къарындашла, сиз Истефанасны юйюрюн билесиз; ала Ахаяны биринчи ийманлыларыдыла эмда кеслерин сыйлылагъа къуллукъ этерге бергендиле. Мени сизден тилегеним барды:

¹⁶ Сиз аллайлагъа эм ала бла бирге ишлеп уруннганланы барына да бойсунугъуз.

¹⁷ Истефанасны, Фортунатны эм Ахайыкны келгенлерине мен къууаннганма. Ала манга сиз мени биргеме болмагъаныгъызны унутдургъандыла.

¹⁸ Ала мени да, сизни да кёлюбюзню ырахат этгендиле. Аллайлагъа хурмет этигиз.

¹⁹ Асияны жамауатлары сизге салам айтадыла. Акила бла Прискила юйдеги жамауатлары бла бирге сизге Раббийде къызыу салам айтадыла.

²⁰ Битеу къарындашла сизге салам бередиле. Бир-биригизни сыйлы уппа этиу бла саламлашыгъыз.

²¹ Мен, Пауул, кеси къолум бла бу саламны жазама.

²² Раббий Масих Иссаны сюймеген адамгъа налат болсун. Марана-та!

²³ Бизни Раббийибиз Масих Иссаны шафауаты сизни бла болсун.

²⁴ Масих Иссада мени сюймеклигим сизни барыгъыз бла да болсун. Амин.