I Коринфлилеге 13 - Сыйлы Инжил бла Забур

Сюймекликни онглулугъу

¹ Мен адам тилледе эм мёлек тилледе окъуна сёлеше эсем да, сюймеклигим жокъ эсе уа, сора мен зынгырдагъан багъырма неда таууш этген кимвалма.

² Файгъамбарлыгъым бар эсе да эм битеу тасхаланы биле эсем да эм, хар тюрлю билимим эм битеу ийнаныуум болуп, алай бла тауланы бир жерден бир жерге окъуна салаллыкъ эсем да, сюймеклигим жокъ эсе уа, сора мен бир зат да тюйюлме.

³ Эмда мен, битеу мюлкюмю садакъа этип юлешсем да эм чархымы кюйдюрюрге берсем да, сюймеклигим жокъ эсе уа, андан манга бир тюрлю файда жокъду.

⁴ Сюймеклик кёп тёзюмлюдю, хатерлиди, сюймеклик зарланмайды, сюймеклик кесин ёрге кётюрмейди, ёхтемлик этмейди,

⁵ Адепсизлик этмейди, кесине файданы излемейди, ёпкелемейди, аман ниет тутмайды,

⁶ Тюзсюзлюкге къууанмайды, хакъ кертиге уа къууанады;

⁷ Барына да тёзеди, барына да ийнанады, барына да ышанады, хар нени да кётюреди.

⁸ Сюймеклик бир заманда да тохтамайды. Файгъамбарлыкъ этиуле бошалырла, тилле да тынарла, билим да къоратылыр.

⁹ Нек десегиз бизни билимибиз тамамлы тюйюлдю, файгъамбарлыкъ этиуюбюз да толу тюйюлдю.

¹⁰ Тамамлыкъ жетген заманда уа, тамамлы болмагъан кетерилир.

¹¹ Мен сабий заманымда, сабийча сёлешгенме, сабийча акъыл этгенме, сабийча ойлашханма; киши болгъанымда уа, сабий ишлени къойгъанма.

¹² Энди биз хар нени да мутхуз кюзгюде кёрген кибик кёребиз, ол заманда уа бетден-бетге кёрлюкбюз; энди мени билимим тамамлы тюйюлдю, ол заманда уа, мен билиннгеним кибик толу билликме.

¹³ Энди уа бу ючюсю жашап турадыла: ийман, умут, сюймеклик, алай а сюймеклик аланы барындан уллуду.