I Коринфлилеге 12 - Сыйлы Инжил бла Забур

Сыйлы Нюрден берилген фахмула

¹ Къарындашларым, Сыйлы Нюрден берилген фахмуланы юсюнден сизге билдирмей къояргъа сюймейме.

² Сиз, мажюсю заманыгъызда, тилсиз идоллагъа сизни сюрюп элтген кибик, алай жюрюгенигизни билесиз.

³ Ол себепден сизге айтама, Аллахны Нюрю бла сёлешген бир адам да, Иссагъа налат бермез эм бир адам да Сыйлы Нюр бла болмаса, Иссагъа Раббий деп айталмаз.

⁴ Фахмула кёп тюрлюдюле, Нюр а бирди;

⁵ Къуллукъ этиуле да кёп тюрлюдюле, Раббий а бирди.

⁶ Этилген ишле да кёп тюрлюдюле, барында да хар нени да этген Аллах а бирди.

⁷ Алай а хар кимге да хайыр болур ючюн, Нюр хар кимге да Кесин белгили этеди.

⁸ Биреуге Нюрню юсю бла акъыл сёз бериледи, башхасына ол Нюрден билим сёз бериледи.

⁹ Дагъыда башхасына ол Нюр бла ийман бериледи; башхасына ол Нюр бла ауругъанланы сау этерге саугъала бериледиле.

¹⁰ Биреуге къудуретли ишле этиу, башхасына файгъамбарлыкъ, башхасына нюрлени айырып таныу, башхасына тюрлю тилле, башхасына тиллени ангылатыу фахму бериледи.

¹¹ Быланы барын да бир Нюр этдиреди, хар бирине Кеси сюйгенча энчи юлешеди.

Чархны бирлиги

¹² Чарх бир болуп, алай а аны санлары кёп болгъанлары кибик эм битеу санла бир чархны болуп, ала кёп эселе да бир чархны къурагъанлары кибик, Масих да алайды.

¹³ Нек десегиз биз барыбыз да, бир чарх болур ючюн, бир Нюрде кёмюлдюрюлгенбиз, иудейлиле неда греклиле, къулла неда азатла, барыбызгъа да бир Нюрден ичерге берилгенди.

¹⁴ Чарх а бир сандан тюйюл, алай а кёп санладан къуралгъанды.

¹⁵ Аякъ: «Мен къол болмагъаным себепли чархны тюйюлме», – десе, сора ол аны ючюн чархны тюйюлмюдю?

¹⁶ Къулакъ да: «Мен кёз болмагъаным себепли чархны тюйюлме», – десе, сора ол аны ючюн чархны тюйюлмюдю?

¹⁷ Битеу чарх кёз болса эди, сора къалай эшиталыр эди? Битеу чарх къулакъ болса эди, сора къалай ийис ангылаялыр эди?

¹⁸ Алай а Аллах, санланы хар бирин чархха жарашдырып, Кеси сюйгенча къурагъанды.

¹⁹ Бары да бир сан болсала эди уа, сора чарх къайда болур эди?

²⁰ Алай а энди санла кёпдюле, чарх а бирди.

²¹ Кёз къолгъа: «Сен манга керек тюйюлсе» неда аны кибик баш аякълагъа: «Сиз манга керек тюйюлсюз», – деп айталлыкъ тюйюлдю.

²² Ол угъай эсенг, чархны къарыусуз кёрюннген санлары бегирек да керекдиле

²³ Эм чархыбызда бизге магъанасы аз кёрюннген санларыбызгъа бегирек да сакъ болуп къарайбыз.

²⁴ Эм бизни келбетсиз санларыбыз жабылып бегирек да келбетли боладыла, келбетли санларыбызны уа жабылыргъа кереклилери жокъду. Алай а Аллах, тамамлыгъы аз болгъан санлагъа бегирек къараргъа кёлге салып, чархны тап келишдиргенди.

²⁵ Алай бла чархда айрылыкъ болмайды, алай а битеу санла бир-бирлерине бирча къайгъырадыла.

²⁶ Бир сан къыйнала эсе, аны бла бирге битеу санла да къыйналадыла. Бир сан махтаулу бола эсе да, аны бла бирге битеу санла да къууанадыла.

²⁷ Сиз да Масихни чархысыз, башха-башха уа санларысыз.

²⁸ Аллах сора бир къауумланы жамауатда биринчиге абустолла этип, экинчиге файгъамбарла этип, ючюнчюге устазла этип салгъанды. Андан сора бир къауумлагъа къудуретли ишле этерге кючле эмда ауругъанланы сау этиу саугъала, болушлукъ этиу, оноу этиу, тюрлю-тюрлю тилле бергенди.

²⁹ Бары да абустолламыдыла? Бары да файгъамбарламыдыла? Бары да устазламыдыла? Бары да къудуретли ишле этиучюлемидиле?

³⁰ Ауругъанланы сау этиу саугъала барындамы барды? Билинмеген тилле бла бары дамы сёлешедиле? Бары да тиллени ангылатыучуламыдыла?

³¹ Уллу фахмула ючюн эришигиз, мен а сизге андан да аламат жолну кёргюзтюрме.