I Коринфлилеге 11 - Сыйлы Инжил бла Забур

Баш жабыуну юсюнден

¹ Мен Масихден юлгю алыучу болгъаным кибик, сиз да менден юлгю алыучу болугъуз.

² Къарындашла, сиз, мен юйретгенлени барысын да эсигизде тутуп, сизге юйретгенимча этгенигиз ючюн, сизни махтайма.

³ Эмда хар эрге баш Масих болгъанын, къатыннга баш эр болгъанын, Масиххе уа баш Аллах болгъанын сиз билиригизни сюеме.

⁴ Башы жабылып тилек этген неда файгъамбарлыкъ этген хар эр киши кесини башын уятлы этеди.

⁵ Эм башы жабылмай тилек этген неда файгъамбарлыкъ этген хар къатын кесини башын уятлы этеди; нек десегиз ол анга башы жюлюннген кибикди.

⁶ Къатын башын жабаргъа сюймей эсе, чачын къыркъсын. Къатыннга чачы къыркъылгъаны неда жюлюннгени айып эсе уа, башын жапсын.

⁷ Алай бла эр, Аллахны сыфаты эм махтауу болгъаны себепли, башын жабаргъа тийишли тюйюлдю, къатын а эрини махтаууду.

⁸ Нек десегиз эр къатындан тюйюл, алай а къатын эрден жаратылгъанды.

⁹ Эмда эр къатын ючюн жаратылмагъанды, алай а къатын эр ючюн жаратылгъанды.

¹⁰ Ол себепден, мёлекле ючюн, къатынны башында эркинликни белгиси болургъа керекди.

¹¹ Алай а Раббийни жолунда не эр къатындан, не къатын эрден эркин тюйюлдю.

¹² Нек десегиз къатын эрден жаратылгъаны кибик, эр да къатындан тууады, бары да Аллахданды.

¹³ Кесигиз сагъыш этигиз, башы жабылмагъанлай Аллахдан тилек этген къатыннга ушагъылымыды?

¹⁴ Эр киши чачын ёсдюре эсе, ол анга ыспассызлыкъ болгъанын, табийгъат кеси окъуна юйретмеймиди сизге?

¹⁵ Къатын чачын ёсдюре эсе уа, ол анга махтауду; нек десегиз анга чачла жабыуну орунуна берилгендиле.

¹⁶ Даулашыргъа сюйген адам бар эсе уа, не бизни, не Аллахны жамауатларыны аллай адети жокъду.

Раббийни ушхуууруну юсюнден

¹⁷ Алай а, муну айтып, сизни махтамайма, нек десегиз сизни жыйылыуларыгъыз хайырдан эсе заран кёп келтиредиле.

¹⁸ Нек десегиз, башындан башлап, сиз жамауатха жыйылгъан заманда, сизни арагъызда келишмей айырылыула боладыла деп эшитеме, анга уа бир жаны бла ийнанама.

¹⁹ Нек десегиз сизни арагъызда сыналгъан адамла белгили болур ючюн, сизни арагъызда айрылыкъла да болургъа керекдиле.

²⁰ Андан сора, сизни жыйылыуугъуз Раббийни ушхууурун ашаргъа жыйылгъанча тюйюлдю.

²¹ Нек десегиз хар ким башхаладан алгъа кесини ашын ашаргъа ашыгъады, алай бла биреу ач къалады, башхасы уа эсиреди.

²² Ашаргъа бла ичерге сизни юйлеригиз жокъмуду? Неда Аллахны жамауатын сансыз этип, жарлыланы да ыспассызмы этесиз? Не айтайым сизге? Аны ючюн сизни махтагъанмы этейим? Махтарыкъ тюйюлме!

²³ Нек десегиз мен сизге айтып юйретгеними Раббийни Кесинден эшитип алгъанма. Раббий Исса ол тутулгъан кечесинде ётмекни алып,

²⁴ Шукур этип сындыргъанды эм: «Алыгъыз, ашагъыз, бу Мени, сизни ючюн къурманнга берилген чархымды. Мени эсигизге тюшюрюрге муну этигиз», – деп айтханды.

²⁵ Аны кибик ушхууурдан сора аякъны да алып: «Бу аякъ Мени къаным бла бегитилген жангы кесаматды. Бу аякъдан ичген хар заманыгъызда, Мени эсигизге тюшюрюп ичигиз», – деп айтханды.

²⁶ Сиз, бу ётмекни ашагъан эм бу аякъны ичген хар кезиуде, Раббий келгинчиге дери Раббийни ёлгенин билдирип турасыз.

²⁷ Ол себепден, тийишлисиз бу ётмекни ким ашаса неда Раббийни аягъын ичсе, Раббийни чархына бла къанына къажау болуп терс боллукъду.

²⁸ Адам кесин сынасын эм ол халда бу ётмекден алай ашасын эм бу аякъдан алай ичсин.

²⁹ Нек десегиз анга тийишли болмай ашагъан эм ичген адам, Раббийни чархыны юсюнден ойлашмагъанлай, алай ашауу эм ичиую бла кеси-кесин терслейди.

³⁰ Ол себепли сизден кёбюсю къарыусуздула эм ауруйдула, ёлгенле да аз тюйюлдюле.

³¹ Нек десегиз биз кеси-кесибизни сынасакъ эди, сора бизге сюд этилмез эди.

³² Биз, бу дуния бла бирге сюд этилип жоюлмаз ючюн, сюд этилип Раббийден азап алабыз.

³³ Ол себепден, къарындашларым, Раббийни ушхуууруна жыйылгъан заманыгъызда бир-биригизни сакълагъыз.

³⁴ Ач адам а, сизни жыйылыуугъуз айыпланыргъа болмаз ючюн, юйюнде ашасын. Къалгъан ишлени уа келсем жарашдырырма.