I Фесалоникачылагъа 5 - Сыйлы Инжил бла Забур

¹ Заманланы бла болжалланы юсюнден а сизге жазаргъа кереклиси да жокъду, къарындашла;

² Нек десегиз Раббийни кюню, кече гудучу келген кибик алай келлигин, сиз кесигиз ишексиз билесиз.

³ Ол себепден, не заманда: «Мамырлыкъ эм къоркъуусузлукъ», – деп айтсала, ол заманда бууаз къатыннга къозлау къыйынлыкъ келгени кибик, билмей тургъанлай, алагъа жоюлуу келликди, къутуллукъ да тюйюлдюле.

⁴ Алай а сиз, къарындашла, ол кюн сизге билмей тургъаныгъызлай, гудучу кибик тюберча къарангыда тюйюлсюз.

⁵ Нек десегиз сиз барыгъыз да жарыкъны уланларысыз эм кюнню уланларысыз: биз кечени неда къарангыны уланлары тюйюлбюз.

⁶ Алай бла башхалача жукъламайыкъ, алай а сагъайып эм аязып турайыкъ.

⁷ Нек десегиз жукълагъанла кече жукълайдыла, ичип эсиргенле да кече ичип эсиредиле.

⁸ Биз а кюндюзню уланлары эсек, юсюбюзге ийманны бла сюймекликни кюбесин, башыбызгъа да къутхарылыугъа ышаныуну темир бёркюн кийип аязып турайыкъ.

⁹ Нек десегиз Аллах бизни чамланыууна тюйюл, алай а бизни Раббийибиз Масих Иссаны юсю бла къутхарылыуну алыргъа буюргъанды.

¹⁰ Сагъайып тура эсек да, неда жукълай эсек да, Масих, биз Аны бла бирге жашар ючюн, бизни ючюн ёлгенди.

¹¹ Ол себепден, сиз этгенигиз кибик, бирбиригизни жапсарыгъыз эм нюр жанындан бегимли этигиз.

Ахыргъы насийхатла бла саламла

¹² Къарындашла, сизде уруннганланы эм Раббийни жолунда сизге башчылыкъ этгенлени эм сизге насийхат бергенлени ариу кёрюрюгюзню сизден тилейбиз.

¹³ Аланы ишлери ючюн сюймеклик бла алагъа бегирек да хурмет этигиз. Кеси арагъызда жарашыулу болугъуз.

¹⁴ Дагъыда сизден тилейбиз, къарындашла, ишлемей бош айланнганлагъа айтып ангылатыгъыз, кёлсюзлени жапсарыгъыз, къарыусузлагъа болушугъуз, барысына да кёп тёзюмлю болугъуз.

¹⁵ Сакъ болугъуз, бир киши да аманлыкъгъа аманлыкъ бла жууап этмесин; алай а хар заманда бир-биригизге да эм барына да ахшылыкъны излегиз.

¹⁶ Хар заманда къууаныгъыз.

¹⁷ Тохтаусуз тилек этигиз.

¹⁸ Хар болумда да шукур этигиз; нек десегиз сиз Масих Иссада тура эсегиз, сизни юсюгюзден Аллахны буйругъу алайды.

¹⁹ Нюрню ёчюлтмегиз.

²⁰ Файгъамбарлыкъланы сансыз этмегиз.

²¹ Хар нени да сынагъыз, ахшысын тутугъуз.

²² Хар тюрлю аманлыкъдан тыйылыгъыз.

²³ Ырахатлыкъ бериучю Аллах а Кеси сизни толусунлай сыйлы этсин эм сизни нюрюгюз да, жаныгъыз да, чархыгъыз да, Раббийибиз Масих Иссаны келиуюнде къыяусуз болур ючюн, битеу саулай сакълансын.

²⁴ Сизни чакъыргъан Аллах ышаннгылыды, Ол аны этерикди.

²⁵ Къарындашла! Бизни ючюн тилек этигиз.

²⁶ Битеу къарындашлагъа сыйлы уппа этиу бла салам айтыгъыз.

²⁷ Бу жазып ийгеними битеу сыйлы къарындашлагъа окъуругъузну Раббийни хакъы бла сизден тилейме.

²⁸ Раббийибиз Масих Иссаны шафауаты сизни бла болсун. Амин.