Ишлери 8 - Сыйлы Инжил бла Забур

¹ Шауул а Истефанны ёлтюргенлерин къабыл кёре эди. Ол кюн Иерусалимдеги жамауатха къажау уллу зулмулукъ кезиую башланды. Абустолладан къалгъанла барысы да Иудеяны бла Самарияны жержерлерине чачылдыла.

² Истефанны уа дин ахлу кишиле асырадыла эмда анга уллу жиляу этдиле.

³ Шауул а жамауатны талай эди, юйден юйге кирип, эр кишилени да, тиширыуланы да сюйреп, тюрмеге ата эди.

Филип Самарияда

⁴ Ол заманда чачылгъан ийнаннганла, хар жерде айланып, Хайыр Хапарны жая эдиле.

⁵ Сёз ючюн Филип, Самарияны бир шахарына барып, андагъылагъа Масихни билдире эди.

⁶ Филипни этген илишанларын эшитип эм кёрюп, битеу халкъ, аны айтханларына сагъайып тынгылай эди.

⁷ Нек десегиз харам нюрлери болгъан адамланы кёбюсюнден, харам нюрле ачы къычырыкъ этип чыгъа эдиле, саны къурушхан эм ахсакъ болгъан кёп адамла да сау бола эдиле.

⁸ Ол шахарда уллу къууанч бар эди.

Хыйнычы Шимон

⁹ Ол шахарда Шимон атлы бир киши бар эди; ол а муну аллында хыйнычылыкъ этип, Самарияны халкъын сейирсиндирип, кесин бир уллулугъу болгъан адамгъа саната эди.

¹⁰ Аны айтханына гитчесинден уллусуна дери бары да тынгылап: «Бу адам Аллахны уллу кючюдю», – дей эдиле.

¹¹ Анга тынгылагъанлары уа, ол кёп замандан бери хыйнычылыкъ этип аланы сейирсиндирип тургъаны ючюн эди.

¹² Аллахны Патчахлыгъыны эм Масих Иссаны атыны юсюнден Хайыр Хапарны жайгъан Филипге ийнаннганларында уа, эр кишиле да, тиширыула да сууда кёмюлдюрюлген эдиле.

¹³ Шимон кеси да ийнаннган эди эм сууда кёмюлдюрюлюп, Филипни къатындан кетмей эди; эм болуннган илишанланы бла уллу къудуретли ишлени кёрюп сейирсине эди.

¹⁴ Иерусалимде тургъан абустолла, Самариялыла Аллахны сёзюн къабыл этгенлерин эшитип, алагъа Петерни бла Ахияны ийдиле.

¹⁵ Была да, ары келип, Самариялыла Сыйлы Нюрню алыр ючюн тилек этдиле.

¹⁶ Нек десегиз Сыйлы Нюр, алыкъа аланы бирине да тюшмеген эди, ала жаланда Раббий Иссаны аты бла сууда кёмюлдюрюлген эдиле.

¹⁷ Абустолла къолларын аланы юслерине салгъан заманда ала Сыйлы Нюрню алдыла.

¹⁸ Шимон а, абустолла къолларын салыу бла Сыйлы Нюр берилгенин кёрюп, алагъа ахча келтирди эм:

¹⁹ «Мен къолларымы юсюне салгъан адам Сыйлы Нюрню алырча, манга да бу эркинликни беригиз», – деди.

²⁰ Алай а Петер анга: «Сен Аллахны саугъасын ахчагъа алыргъа ойлагъанынг ючюн, сени кюмюшюнг да сени бла бирге жоюлсун!

²¹ Бу ишде сени не юлюшюнг, не насыбынг жокъду; нек десенг сени жюрегинг Аллахны аллында тюз тюйюлдю.

²² Ол себепден бу аманлыгъынг ючюн тобагъа къайтышып, Аллахдан тилек эт; жюрегингде болгъан бу ниет кечилирге да болур.

²³ Нек десенг сени зарлыкъ ууундан толуп, аманлыкъ бла бугъоуланып тургъанынгы кёреме», – деди.

²⁴ Шимон а жууапха: «Айтханларыгъыздан бири да мени башыма келмез ючюн, сиз Раббийден мени ючюн тилек этигиз», – деди.

²⁵ Петер бла Ахия уа шагъатлыкъ этип эм Раббийни сёзюн билдирип, артха Иерусалимге къайтып бара, Самарияны кёп эллеринде да Хайыр Хапарны жайдыла.

Филип бла Эфиопиялы евнух

²⁶ Филипге уа Раббийни бир мёлеги: «Тур да къыбыла жанында, Иерусалимден къум тюзню юсю бла Газагъа баргъан жолгъа бар», – деди.

²⁷ Ол туруп кетди. Ол кезиуде Эфиопияны къатын патчахы Къандакъны ёзюрлеринден бири, аны битеу хазнасын сакълаучу Эфиопиялы бир евнух Аллахха табыныр ючюн Иерусалимге келген эди.

²⁸ Энди уа артха къайтып бара, файтонунда олтуруп, Иешая файгъамбарны китабын окъуй бара эди.

²⁹ Сыйлы Нюр Филипге: «Жууукълаш да бу файтоннга къошул», – деди.

³⁰ Филип чабып аны къатына жетди эмда ол Иешая файгъамбарны китабын окъугъанын эшитип, анга: «Окъугъанынгы ангылаймыса?» – деп сорду.

³¹ Ол а: «Къалай ангылаялайым, манга киши айтып ангылатмаса?» – деди. Сора Филипден, файтоннга минип, аны бла олтурурун тиледи.

³² Китапдан окъугъан жери уа бу эди: «Ол, къой кибик кесилирге элтилгенди эм къозу аны къыркъгъанны аллында тауушсуз болгъаны кибик, Ол да ауузун ачмады.

³³ Аны ыспассыз этип, Анга сюд алай этгендиле, Аны тукъумун а ким айтып ангылатыр? Нек десенг Аны жашауу жерден алыннганды».

³⁴ Евнух а Филипге: «Муну файгъамбар кимни юсюнден айтады? Кесини юсюнденми, огъесе башханы юсюнденми? Аны айтырынгы сенден тилейме», – деди.

³⁵ Сора Филип ангылатып тебиреди; Китапны бу жеринден башлап, Иссаны юсюнден анга Хайыр Хапарны билдирди.

³⁶ Жолда бара, ала суугъа жетдиле. Евнух: «Ма, суу; кёмюлдюрюлюуюме не чырмау барды?» – деди.

³⁷ Филип да анга: «Битеу жюрегингден ийнана эсенг, боллукъду», – деди. Ол да: «Ийнанама, Масих Исса Аллахны Уланыды», – деп жууап этди.

³⁸ Сора файтонну тохтатыргъа буйрукъ берди. Филип бла евнух экиси да суугъа кирдиле эмда Филип аны сууда кёмюлдюрдю.

³⁹ Ала суудан чыкъгъанлай а, евнухха Сыйлы Нюр тюшдю. Филипни уа Раббийни бир мёлеги алып кетди, андан сора уа евнух аны кёрмеди, сора, къууанып, жолуна кетди.

⁴⁰ Филип а Ашдотда болуп чыкъды эм андан бара, битеу шахарлагъа Хайыр Хапарны жая, Кесариягъа келди.