Ишлери 6 - Сыйлы Инжил бла Забур

Жети болушуучу сайланады

¹ Ол кюнледе, сохтала кёп болгъан заманда, грекча сёлешген чюйютлюле, аланы башсыз къатынлары, кюн сайын юлешиннген болушлукъдан тышында къалдырылгъанлары ючюн, арамча сёлешген чюйютлюлеге гурушха болдула.

² Ол заманда онеки абустол, сохталаны битеу къауумун жыйып, алагъа: «Аллахны сёзюн юйретиуню къоюп, аш юлешиуню къайгъысын этмеклик бизге иги тюйюлдю.

³ Ол себепден къарындашла, кесигизни арагъыздан, аланы юсюнден иги шагъатлыкъ этилген, Сыйлы Нюрден эм акъылманлыкъдан толгъан жети адамны сайлагъыз; аланы бу къуллукъну этерге салайыкъ.

⁴ Биз а кесибизни тохтаусуз тилек этип эм Аллахны сёзюн билдирип туруу къуллукъгъа берейик», – дедиле.

⁵ Бу сёзге битеу жыйылгъанла ыразы болдула; сора Истефан атлы, иймандан эм Сыйлы Нюрден толгъан кишини, Филипни, Прохорну, Никанорну, Тимонну, Парменаны эмда алгъын чюйют диннге къайтышхан Антиохиялы Николайны сайладыла.

⁶ Аланы абустолланы алларына сюедиле, абустолла да, тилек этип, аланы юслерине къолларын салдыла.

⁷ Аллахны сёзю жайылып, Иерусалимде сохталаны саны да бек кёп болгъан эди; дин къуллукъчуладан да бек кёбюсю ийманнга бойсуннган эдиле.

Истефан тутулады

⁸ Истефан а, иймандан эм кючден толуп, халкъны ичинде уллу сейирликле эм илишанла эте эди.

⁹ Азатланы, Киринейлилени эм Аскендириялыланы Синагогасы атлы синагогадан бир къауумла эм Киликиядан бла Асиядан да бир къауумла Истефан бла даулашха тюшдюле.

¹⁰ Алай болгъанлыкъгъа, аны айтхан сёзлериндеги акъылманлыкъгъа эмда Сыйлы Нюрге къажау туралмадыла.

¹¹ Андан сора ала, бир къауумланы юйретип: «Мусагъа да, Аллахха да аны аман сёзле айтханын эшитгенбиз», – деп айтдырдыла.

¹² Халкъны да, таматаланы да, дин алимлени да къозгъап, чабыуул этип тутуп, аны синедрионнга элтдиле.

¹³ Сора жалгъан шагъатла келтирдиле, ала уа: «Бу адам, тохтамай, бу сыйлы жерге эм Тауратха аман сёзле айтып турады.

¹⁴ „Назаретли Исса бу жерни бузарыкъды, Муса бизге берген адетлени да тюрлендирликди“ деп айтханын биз эшитгенбиз», – дедиле.

¹⁵ Синедрионда олтургъанла барысы да, Истефаннга сынап къарап, аны бети, мёлекни бетича болуп къалгъанын кёрдюле.