Ишлери 5 - Сыйлы Инжил бла Забур

Ханания бла Шапира

¹ Ханания атлы бир киши уа, къатыны Шапираны ыразылыгъы бла, мюлкюн сатып,

² Багъасыны бир кесегин кесине къойду, къалгъанын а келтирип абустолланы алларына салды. Къатыны да аны биле эди.

³ Петер а анга: «Ханания! Жюрегинги шайтаннга нек бердинг, Сыйлы Нюрге ётюрюк айтып жеринги багъасыны бир кесегин кесинге нек къойдунг?

⁴ Сатылгъынчы да ол мюлк сеники тюйюлмю эди? Сатылгъандан сора да багъасы сени оноуунгда тюйюлмю эди? Сен бу ишни жюрегинге нек салдынг? Сен адамлагъа тюйюл, Аллахха ётюрюк айтханса», – деди.

⁵ Бу сёзлени эшитгенлей, Ханания жыгъылып ёлюп къалды. Муну хапарын эшитгенлени барысын да уллу къоркъуу алды.

⁶ Сора жашла, туруп, аны ёлюгюн кебинледиле эм чыгъарып асырадыла.

⁷ Андан сора юч сагъат чакълы озгъанлай, бу болгъан ишни да билмей, аны къатыны да келди.

⁸ Петер анга: «Сиз жеригизни быллай биргеми сатхансыз?» – деп сорду. Ол да: «Хау, аллай бирге сатханбыз», – деди.

⁹ Петер анга: «Сиз Раббийни Нюрюн сынаргъа экигиз да бир акъыллы нек болдугъуз? Ма сени эринги асырагъанла эшикден кирип келедиле, сени да чыгъарлыкъдыла», – деди.

¹⁰ Олсагъат Шапира Петерни аллында аууп ёлюп къалды; ол жашла да юйге кирип, аны ёлюп тургъанын кёрюп, элтип аны эрини жанында асырадыла.

¹¹ Битеу жамауатны эм битеу бу хапарны эшитгенлени уллу къоркъуу алды.

Абустолла кёплени сау этедиле

¹² Абустолланы къоллары бла уа халкъны ичинде кёп илишанла бла сейирликле этиле эдиле; ийнаннганланы барысы да бир ниетде Сюлеменни Колоннадасында жыйыла эдиле.

¹³ Тыш адамладан бир киши да алагъа къошулургъа базынмай эди, халкъ а алагъа уллу хурмет эте эди.

¹⁴ Алай болсада, Раббийге ийнанып, жамауатха къошулгъан эр кишиле да, тиширыула да кёпден-кёп бола эдиле.

¹⁵ Алай бла адамла, озуп баргъан Петерни ауанасы окъуна аладан бир къауумларына тиер ючюн, ауругъанланы жатхан жерлери бла тёшеклери бла орамлагъа чыгъарып сала эдиле.

¹⁶ Иерусалимни тёгерегиндеги шахарладан да кёп адамла келип жыйылып, ауругъанланы эм харам нюрледен къыйналгъанланы келтире эдиле; быланы барысы да сау этиле эдиле.

Абустолла зулму сынайдыла

¹⁷ Баш дин къуллукъчу эм аны бла болгъан садукей масхаплыла барысы да зарлыкъдан толдула

¹⁸ Эмда, абустолланы тутуп, халкъны тюрмесине салдыла.

¹⁹ Алай болгъанлыкъгъа, Раббийни бир мёлеги, кече тюрмени эшиклерин ачып, аланы чыгъарып:

²⁰ «Барыгъыз, табыныучу юйню арбазларында туруп, бу жангы жашауну юсюнден сёзлени барын халкъгъа билдиригиз», – деди.

²¹ Абустолла, анга тынгылап, эрттенликде табыныучу юйню арбазларына кирип, халкъны юйрете эдиле. Ол заманда баш дин къуллукъчу да, аны жанлыла да, келип синедрионну – битеу Израильни халкъыны таматаларын – жыйып, абустолланы келтирирге тюрмеге адамла ийдиле.

²² Сакълауулла, тюрмеге барып, абустолланы анда тапмадыла. Алай бла ызларына къайтып:

²³ «Биз тюрмени кереклисича сакъ бегитилип, къалауурланы да эшиклени алларында тургъанлай тапдыкъ; ачханда уа ичинде бир кишини да тапмадыкъ», – деп хапар бердиле.

²⁴ Бу сёзлени эшитгенде, баш дин къуллукъчула эм табыныучу юйню сакълауулларыны башчысы, бу не болур, деп сейирсиндиле.

²⁵ Биреулен келип алагъа: «Ма, сиз тюрмеге салгъан кишиле, табыныучу юйде туруп халкъны юйрете турадыла», – деп билдирдиле.

²⁶ Ол заманда табыныучу юйню сакълауулларыны башчысы къалауурла бла барып, абустолланы зор этмей келтирди; нек десегиз ала, халкъ бизни ташла бла тюер деп къоркъа эдиле.

²⁷ Сора аланы, келтирип, синедрионну аллында сюедиле. Баш дин къуллукъчу уа алагъа соруу этип:

²⁸ «Бу атны айтып юйретмегиз деп, биз сизге къаты буйрукъ бермегенми эдик? Сиз а, окъууугъузну Иерусалимни хар жерине жайгъансыз эм ол Адамны къанын бизни юсюбюзге салыргъа кюрешесиз», – деди.

²⁹ Петер эм къалгъан абустолла уа анга жууапха: «Адамладан эсе Аллахха бек бойсунургъа керекди.

³⁰ Сиз къачха асып ёлтюрген Иссаны аталарыбызны Аллахы тиргизгенди.

³¹ Израильге гюняхларындан тобагъа къайтышып кечилирге амал берир ючюн, Аллах, Иссаны Башчы эм Къутхарыучу этип, Кесини онг жанына кётюргенди.

³² Биз да, Аллах Кесине бойсуннганлагъа берген Сыйлы Нюр да, бу ишлеге шагъатбыз», – дедиле.

³³ Муну эшитгенде, ала ачыудан къутура эдиле эм абустолланы ёлтюрюрге къаст эте эдиле.

³⁴ Сора битеу халкъ ариу кёрген, кеси да Таурат устаз болгъан, Гамалиел атлы бир фарисей, синедрионда ёрге туруп, абустолланы бир азгъа тышына чыгъарыргъа буюрду.

³⁵ Синедриондагъылагъа уа: «Израильли кишиле! Бу адамлагъа не этеригизге кеси арагъызда сагъыш этип къарагъыз.

³⁶ Нек десегиз кёп болмай мындан алда, кесин бир уллугъа санатып, Тевда келген эди, анга да тёрт жюз чакълы адам къошулгъан эди, алай а ол ёлтюрюлдю, анга тынгылагъанланы бары да чачылып думп болдула.

³⁷ Андан сора халкъны санау заманда Галилеялы Иуда келип, кесини ызындан кёп халкъ элтди. Ол да жоюлду, битеу анга тынгылагъанла да чачылдыла.

³⁸ Энди уа сизге айтама, къоюгъуз бу адамланы эмда тиймегиз алагъа; нек десегиз бу план, бу иш адамладан чыкъгъан зат эсе, бузуллукъду.

³⁹ Аллахдан чыкъгъан зат эсе уа, сиз аны бузаллыкъ тюйюлсюз. Сакъ болугъуз, Аллахха къажау туруучула болуп къалыргъа да болурсуз», – деди.

⁴⁰ Ала анга тынгыладыла. Абустолланы чакъырып, тюйюп, Иссаны атындан айтмагъыз деп буйрукъ берип, аланы жибердиле.

⁴¹ Абустолла уа Раббий Иссаны аты ючюн сансыз этилирге тийишли кёрюлгенлерине къууанып, синедриондан кетдиле.

⁴² Сора хар кюн сайын табыныучу юйню арбазларында да, юйледе да юйретиуню эм Масих Иссаны юсюнден Хайыр Хапарны билдириуню къоймай бардыра эдиле.