Ишлери 3 - Сыйлы Инжил бла Забур

Акъсакъ адам сау этиледи

¹ Бир жолда Петер бла Ахия тилек ууахты болгъан тогъузунчу сагъатда табыныучу юйге бирге бара эдиле.

² Анасындан акъсакъ туугъан бир адам бар эди. Аны уа, хар кюнден келтирип, табыныучу юйню «Ариу Эшик» атлы эшигини къатында, табыныучу юйню арбазларына киргенледен садакъа тилерге олтурта эдиле.

³ Ол, Петерни бла Ахияны табыныучу юйню арбазларына кирип баргъанларын кёрюп, аладан садакъа тиледи.

⁴ Петер Ахия бла анга сынап къарап: «Бизге къарачы!» – деди.

⁵ Ол аладан бир зат алыр умут бла алагъа ышанлап къарады.

⁶ Алай а Петер анга: «Кюмюшюм эм алтыным жокъду мени; менде болгъанны уа санга берейим: Назаретли Масих Иссаны аты бла тур да жюрю!» – деди.

⁷ Сора аны онг къолундан тутуп къобарды; алайлай аны аякълары да тобукълары да кючлендиле.

⁸ Ол, секирип ёрге туруп, жюрюп башлады эм жюрюп секире, Аллахха махтау сала, ала бла табыныучу юйню арбазларына кирди.

⁹ Аны, жюрюп, Аллахха махтау салгъанын битеу халкъ кёрдю.

¹⁰ Табыныучу юйню Ариу Эшигини къатында олтуруп садакъа жыйыучу ол болгъанын билип, анга болуннган ишден къоркъуп сейирсиндиле.

Петер табыныучу юйде айтхан сёз

¹¹ Сора ол сау болгъан акъсакъ Петерни бла Ахияны къатындан кетмей тургъан заманда, битеу халкъ, сейирсинип, Сюлеменни Колоннадасы атлы жерге алагъа чабып жыйылдыла.

¹² Муну кёрюп Петер халкъгъа: «Израилли кишиле! Мынга нек сейирсинесиз неда бизге нек къарайсыз? Аны жюрюгени бизни кючюбюз бла неда дин ахлулугъубуз бла болгъанмы сунасыз?

¹³ Ибрахимни, Исхакъны, Якъупну Аллахы, бизни аталарыбызны Аллахы, Кесини Уланы Иссаны махтаулу этгенди. Сиз а Аны сатхансыз эм Пилат Аны эркин этерге оноу этгенде, сиз Аны Пилатны аллында инкяр этгенсиз.

¹⁴ Сиз Сыйлыны эм Тюзлюклюню инкяр этип, бир мурдарны сизге беририн тилегенсиз.

¹⁵ Сиз Жашауну Башчысын ёлтюргенсиз, Аллах а Аны ёлгенледен тиргизгенди. Биз мынга шагъатбыз.

¹⁶ Аны атына ийнаныуну хатырындан, бу сиз кёрген эм таныгъан адамны, Аны аты кючлендиргенди эм Аны юсю бла келген ийман, сизни барыгъызны аллыгъызда бу толу саулукъну анга бергенди.

¹⁷ Болсада, къарындашла, мен билеме, башчыларыгъыз кибик сиз да этгенигизни билмегенлей этгенсиз.

¹⁸ Аллах а Кесини битеу файгъамбарларыны ауузлары бла, Масихни азап чегеригини юсюнден алгъындан билдиргени кибик, алай этгенди.

¹⁹ Алай бла, гюняхларыгъыз къурур ючюн, тобагъа тюшюгюз эм къайтышыгъыз,

²⁰ Раббий сизге ырахатлыкъ заманла берсин эмда сизге алгъындан буюрулгъан Масих Иссаны ийсин.

²¹ Аллах ёмюрден бери битеу Кесини сыйлы файгъамбарларыны ауузлары бла билдиргенлери бары да толур заманнга дери, Исса кёкде къалыргъа керекди.

²² Муса аталарыбызгъа: „Раббий Аллах ыгъыз сизге къарындашларыгъызны арасындан мени кибик бир файгъамбар чыгъарлыкъды. Аны хар айтханына тынгылагъыз.

²³ Ол файгъамбаргъа тынгыламагъан хар адам Аллахны халкъыны арасындан жокъ боллукъду“ деп айтханды.

²⁴ Шамайыл эм андан сора келип билдирген файгъамбарла барысы да бу кюнлени боллугъун алгъындан билдиргендиле.

²⁵ Сиз файгъамбарланы уланларысыз, Аллах аталарыгъыз бла этген кесаматны туудукъларысыз. Аллах Ибрахимге: „Сени урлугъунгу юсю бла дунияны битеу халкълары алгъышлы боллукъдула“ деп айтханды.

²⁶ Аллах, сизни хар биригизни да аман ишлеригизден тайдырып сизни алгъышлы этер ючюн, Кесини Уланы Иссаны тиргизип, бек алгъа сизге ийгенди», – деп сёлешди.