Ишлери 28 - Сыйлы Инжил бла Забур

Мальтада

¹ Къутулгъаныбыздан сора, ол жер Мальта атлы айрыкам болгъанын билдик.

² Ол жерлилени бизге болмагъанча бек жанлары ауруду. Тохтаусуз жауун жаууп, сууукълукъну себебинден от этип, ала бизни барыбызны да къонакъгъа алдыла.

³ Пауул, кёп чырпыла жыйып, аланы отха салгъанда уа, уу жилян отну жылыуундан чыгъып, Пауулну къолуна тагъылды.

⁴ Ол жерлиле, аны къолуна жилянны тагъылгъанын кёргенлеринде, бир-бирлерине: «Баям, бу адам мурдарды, тенгизден къутулгъанындан сора да, тюзлюкню тейриси муну жашаргъа къоймагъанды», – дей эдиле.

⁵ Алай а ол, жилянны отха атып, андан бир тюрлю заран сынамады.

⁶ Ала уа, ол кёбюп аурурукъ неда билмей тургъанлай ёлюп къаллыкъ сунуп сакълай эдиле; алай а кёп сакълап, анга бир заран да болмагъанын кёргенде уа, фикирлерин тюрлендирип: «Ол бир тейриди», – дей эдиле.

⁷ Ол жерден узакъ болмай айрыкамны оноучусу Публийни бийлик жерлери бар эди; ол, бизни къонакъгъа алып, ариу кёрюп, юч кюнню сыйлап турду.

⁸ Ол заманда Публийни атасы дизентериядан ауруп къызып жата эди. Пауул, ол жатхан жерге кирип, тилек этип эмда къолларын аны юсюне салып, аны сау этди.

⁹ Бу болгъан ишден сора, айрыкамда ауруулары болгъан башха адамла да, келип, сау этиле эдиле.

¹⁰ Бизге кёп хурмет этдиле эмда кеме бла кетер заманыбызда кереклибизни бердиле.

Пауул Римге жетеди

¹¹ Юч айдан сора, къышны ол айрыкамда ётдюрген, «Эгиз Тейриле» атны жюрютген Аскендириялы кемеге минип жолгъа чыкъдыкъ.

¹² Сиракузагъа келип, анда юч кюн турдукъ.

¹³ Андан чыгъып, Региягъа келдик; бир кюнден сора къыбыла жел ургъаны себепли уа, экинчи кюн Путеолгъа келдик,

¹⁴ Анда къарындашла тапдыкъ, ала, тилеп, бизни анда жети кюн къалдырдыла, андан сора Римге кетдик.

¹⁵ Андагъы къарындашла, бизни хапарыбызны эшитип, Аппи майданнга эмда Юч Къонакъ Юйге дери бизни аллыбызгъа келдиле. Пауул, аланы кёргенде, Аллахха шукур этип, таукел болду.

¹⁶ Биз Римге келгенлей а, жюзбашчы тутмакъланы аскер башчыгъа берди, Пауулгъа уа аны сакълагъан аскерчи бла кеси башха жашаргъа эркинлик берилди.

Пауул Римде Хайыр Хапарны билдиреди

¹⁷ Юч кюнден сора Пауул иудейлилени белгили адамларын чакъырды, ала жыйылгъан заманда алагъа былай айтды: «Къарындашла! Халкъыбызгъа неда аталарыбызны адетлерине къажау бир зат этмегенимлей, мен, тутмакъ болуп, Иерусалимден римлилени къолларына берилгенме.

¹⁸ Ала манга соруу этип, азат этерге мурат этген эдиле; нек десегиз мени ёлюмге тийишли бир терслигим жокъду.

¹⁹ Иудейлилени къажау сюелгенлери себепли уа, мен кесарьны сюдюн излерге керекли болгъанма, аны уа кеси халкъымы бир зат бла да терслер ючюн излемейме.

²⁰ Мен Израильни умуту ючюн бу бугъоула бла байланнганма. Сизни да, ма бу ишни юсюнден кёрюшюп, сёлеширге чакъыргъанма», – деди.

²¹ Ала уа анга: «Сени юсюнгден Иудеядан не къагъыт алмагъанбыз, не келген къарындашладан бири сени юсюнгден бир аман зат айтып билдирмегенди.

²² Алай а биз сени фикирлеринги сенден эшитирге сюебиз; нек десенг бу масхапны юсюнден хар жерде да даулашханлары бизге белгилиди», – дедиле.

²³ Сора анга келир кюнлерин болжал этдиле эмда ол кюн андан да кёпле ол тургъан юйге келдиле. Ол а эрттенден ингирге дери Аллахны Патчахлыгъыны юсюнден окъууну ангылатып, анга шагъатлыкъ этип турду. Мусаны Таурат Китабындан да, файгъамбарланы китапларындан да Иссаны юсюнден жазылгъанланы кёргюзтюп аланы ийнандырыргъа кюреше эди.

²⁴ Бир къауумлары аны сёзлерине ийнана эдиле, башхалары уа ийнанмай эдиле.

²⁵ Ала бир-бирлери бла келишмей кетип башлагъан заманда Пауул алагъа бу сёзню айтды: «Сыйлы Нюр, Иешая файгъамбарны юсю бла аталарыбызгъа былай тап айтханды:

²⁶ „Бар да бу халкъгъа былай айт: ,Эшитип эшитирсиз, ангылагъан да этмезсиз, къарап къарарсыз, кёрген да этмезсиз‘.

²⁷ Нек десегиз бу халкъны жюреги сезимсиз болгъанды; къулакълары бла кючден эшитедиле, кёзлерин да жумгъандыла. Алай болмаса эди, кёзлери бла кёрюр эдиле, къулакълары бла эшитир эдиле, жюреклери бла ангылар эдиле, къайтышхан да этер эдиле, Мен да аланы сау этер эдим“.

²⁸ Алай бла сизге белгили болсун, Аллахны къутхарыуууну хапары башха миллетлилеге берилгенди; ала тынгыларыкъдыла», – деди.

²⁹ Пауул муну айтхандан сора, иудейлилебир-бирлери бла кёп даулаша кетдиле.

³⁰ Сора Пауул анда кесини къол къыйыны бла сау эки жыл жашады эмда анга келгенлени барысын да къабыл этип,

³¹ Уллу таукеллик бла чырмаусуз Аллахны Патчахлыгъын билдирип эмда Раббий Масих Иссаны юсюнден юйретип турду.