Ишлери 27 - Сыйлы Инжил бла Забур

Пауул Римге тенгиз жолоучулугъун башлайды

¹ Бизге кеме бла Италиягъа кетерге бегим этилгенде, Пауулну да, бир къауум башха тутмакъланы да, Августусну полкундан Юлий атлы бир жюзбашчыгъа бердиле.

² Асияны жагъасындагъы портлагъа жюзерге мурат этип, бир адрамитли кемеге минип атландыкъ. Фесалоникадан болгъан Македониялы Аристарх да бизни бла эди.

³ Экинчи кюн Сидоннга жетип тохтадыкъ. Юлийни Пауулгъа жаны ауруп, анга шуёхларына барыргъа эм аланы болушлукъларындан хайырланыргъа эркинлик берди.

⁴ Андан чыгъып, желле аллыбыздан болгъаны себепли, Кипрни къыбыла жаны бла бардыкъ.

⁵ Киликияны бла Памфилияны аллары бла тенгизден ётюп, Ликияны Мира шахарына келдик.

⁶ Жюзбашчы, анда Италиягъа баргъан бир Аскендириялы кеме табып, бизни анга миндирди.

⁷ Кёп кюнлени акъыртын жюзе, Книдни тенгине кючден жетдик. Желни чырмауундан, биз, Салмонну къаты бла озуп, Критни желден къорууланнган жаны бла бардыкъ.

⁸ Критни къатындан да кючден ётюп, Ариу Портла атлы бир жерге келдик; Ласея шахар бу жерге жууукъ эди.

⁹ Заман кёп озгъаны себепли, андан ары жюзерге къоркъуулу эди, нек десегиз Ораза да озгъан эди. Ол себепден Пауул аланы тыяргъа кюрешип:

¹⁰ «Адамла! Бу жолоучулукъдан жюкге бла кемеге болуп къалмай, бизни жаныбызгъа окъуна палах эмда уллу заран тюшеригин мен кёреме», – деди.

¹¹ Алай а жюзбашчы Пауулну сёзлеринден эсе, кемени жюрютюучюге бла кемени иесине бек ышана эди.

¹² Ол жер къышны анда ашырыргъа жарамагъаны себепли уа, кемедегиледен кёбюсю, онг болса, андан да кетип, Критни къыбылакюн батхан бла шимал-кюн батхан желлеге ачыкъ болгъан, Финика атлы портуна барып, къышны анда ашырыргъа оноу этдиле.

Тенгиз толкъунланады

¹³ Къыбыла жел уруп башлагъанда, ала излегенлерин тапхан сунуп, жолгъа тебиредиле эм Критни жагъасын жууукъ тутуп жюзюп кетдиле.

¹⁴ Алай а, кёп турмай, айрыкам таба жанындан Эвракилон атлы уллу жел келди.

¹⁵ Жел аллыбыздан болгъаны себепли, кеме, баралмай къалып, толкъунла ичине тюшдю, жел бизни алып кетди.

¹⁶ Кауда атлы бир айрыкамчыкъны къыбыласына жетип, биз кемени къайыгъын кючден бегитдик.

¹⁷ Къайыкъны кётюргенден сора, жыжымланы жюрютюп, кемени тюбюнден байладыла. Сирт заливни сай жерине тюшерге къоркъуудан парусну энишге ийдиле, алай бла бизни жел алып кетди.

¹⁸ Экинчи кюн, асыры кемсиз толкъунланнгандан, кемени жюгюн тенгизге атып башладыкъ.

¹⁹ Ючюнчю кюн а биз кеси къолларыбыз бла кемени кереклерин тенгизге атдыкъ.

²⁰ Алай а кёп кюнлени ичинде не кюн, не жулдузла кёрюнмей, ол уллу жел уруп тургъаны себепли, ахырында бизге къутулургъа бир тюрлю умут да къалмады.

²¹ Сора, кёпден бери ашамай тургъанлары ючюн, Пауул аланы араларындан туруп: «Адамла! Мен айтханны этип, Критден чыкъмасакъ эди, бу палахха бла бу зараннга тюшерик тюйюл эдик.

²² Энди уа сизден таукел этеригизни тилейме; нек десегиз сизден бир жан да жоюллукъ тюйюлдю, жангыз кеме жоюллукъду.

²³ Нек десегиз мени Ием болгъан эм мен Анга къуллукъ этген Аллахымы мёлеги бюгече манга кёрюнюп:

²⁴ „Къоркъма Пауул! Сен кесарьны аллына барыргъа керексе, сора ма, сени бла кемеде болгъанланы барысын да Аллах санга саугъагъа бергенди“ деп айтханды.

²⁵ Ол себепден, адамла, таукел этигиз! Нек десегиз манга айтылгъаныча боллугъуна, мен Аллахха ийнанама.

²⁶ Болсада, биз бир айрыкамгъа атылыргъа керекбиз», – деди.

Кеме сай жерге тюшеди

²⁷ Адриатик тенгизде толкъунла бизни алып кетип айландыргъан заманны онтёртюнчю кечесинде, кечени арасына жууукъ кезиуде, кемечиле не эсе да бир жерге жууукълашханларын сездиле.

²⁸ Тенгизни теренлигин ёлчелегенде, жыйырма сажна болгъанын кёрдюле; андан сора узакъ бармай дагъыда ёлчелегенде, онбеш сажна болду.

²⁹ Ташлы жерге тюшербиз деп къоркъуп, кемени арт жанындан тёрт якорь атдыла эмда танг къачан атады деп сакълай эдиле.

³⁰ Кемечиле кемеден къачаргъа мурат этип, тенгизге къайыкъ тюшюрюп, ала кеслерин, кемени бурунундан якорь атаргъа кюрешген кибик кёргюзтгенде уа,

³¹ Пауул жюзбашчыгъа бла аскерчилеге: «Была кемеде къалмасала, сиз къутулаллыкъ тюйюлсюз», – деди.

³² Ол заманда аскерчиле къайыкъны жыжымларын уруп кесип, къайыкъны тенгизге тюшюрдюле.

³³ Танг атарны аллында Пауул, аланы барысын да бир зат ашаргъа чакъырып: «Сиз боллукъну сакълап, зат ашамай, ашсыз къалып тургъанлы бюгюн онтёрт кюн болады.

³⁴ Ол себепли бир зат ашарыгъызны тилейме. Бу сизни жаныгъызны сакълар ючюндю; нек десегиз сизни биригизни да башындан тюгю да къорарыкъ тюйюлдю», – деди.

³⁵ Муну айтханлай, ётмек алып, барысыны да аллында Аллахха шукур этди эм ётмекни сындырып, ашап башлады.

³⁶ Барысы да, кёл этип, аш ашадыла.

³⁷ Кемедегиле барыбыз да эки жюз жетмиш алты жан эдик.

³⁸ Ашдан тойгъандан сора уа, будайны тенгизге атып, кемени женгил этип башладыла.

³⁹ Танг атханда, жерни не жер болгъанын танымадыла; жаланда юзмезли жагъасы болгъан бир заливни эслеп, онг болса кемени алайгъа сюрюрге мурат этдиле.

⁴⁰ Якорьланы кесип, тенгизде къойдула. Ол заманда рульланы жыжымларын тешип, гитче парусну да желге кётюрюп, жагъагъа жол тутдула.

⁴¹ Кемени, юзмезли сай жерге сюрюп, ары чёкдюрдюле. Кемени буруну юзмезге батып, къымылдамай къалды, арт жаны уа толкъунланы кючюнден сына башлады.

⁴² Тутмакъладан бири да жюзюп къачмаз ючюн, аскерчиле аланы ёлтюрюрге оноулашхан эдиле.

⁴³ Алай а жюзбашчы, Пауулну къутхарыргъа сюйюп, аланы ол акъылдан тыйды эмда жюзе билгенлеге биринчи болуп секирип, жюзюп жерге чыгъаргъа буюрду.

⁴⁴ Къалгъанлагъа уа, кимине къангала юсюнде, кимине кемени сыныкъларыны юсюнде къутулургъа буюрду. Алай бла барысы да, къутулуп, жер юсюне чыкъдыла.