Ишлери 24 - Сыйлы Инжил бла Забур

Пауул оноучу Феликсни аллында терсленеди

¹ Беш кюнден сора баш дин къуллукъчу Ханания, таматала бла эм Тертул атлы бир ёкюл бла келди. Была оноучугъа Пауулдан тарыкъдыла.

² Пауул чакъырылгъан заманда уа, Тертул аны терслеп, былай айтып башлады:

³ «Хурметли Феликс, сени оноуунг бла кёпден бери ырахатлыкъда жашайбыз. Этген амалларынг бла да бу миллетге хайырлы тюрлениуле болгъандыла. Этгенлеринги хар заманда эм хар жерде уллу ыразылыкъ бла эсибизде тутабыз.

⁴ Алай а сени кёп къыйнамаз ючюн, сенде болгъан мархаматлыкъ бла бизге къысха тынгыларынгы тилейме.

⁵ Бу адам дунияны хар жеринде жашагъан битеу иудейлилени арасында къозгъау чыгъаргъан заранчы эм Назаретли сектаны башчыларындан болуп тапханбыз.

⁶ Ол табыныучу юйню харам этерге окъуна кюрешгенди. Биз, аны тутуп, кеси Законубуз бла сюд этерге излеген эдик.

⁷ Алай а аскер башчы Лисий, келип, уллу зорлукъ бла аны бизни къолубуздан алып,

⁸ Бизге да, аны терслегенлеге, санга келирге буюргъанды. Сен кесинг, анга соруп къарап, биз аны терслеген затланы барын да аны кесинден билирге боллукъса», – деди.

⁹ Иудейлиле да аны айтханы тюздю деп шагъатлыкъ этдиле.

¹⁰ Пауул а, оноучу анга сёлеширге белги бергенде, былай жууап берди: «Сен кёп жылланы ичинде бу халкъгъа сюдюлюк этип тургъанынгы билгеним себепли, мен кеси ишими къууанч бла жакъларыкъма.

¹¹ Мен Аллахха табыныргъа Иерусалимге келгенли, онеки кюнден кёп болмагъанын, сен билаллыкъса.

¹² Эм не табыныучу юйде, не синагогалада, не шахарны башха жеринде, ала мени бир киши бла даулашып неда халкъны къозгъап кёрмегендиле.

¹³ Ала манга энди салгъан терсликлени менде табып кёргюзталлыкъ тюйюлдюле.

¹⁴ Алай а мен, ала секта деген Жол бла аталарымы Аллахына къуллукъ этип тургъаныма санга шагъатлыкъ этеме. Тауратда бла файгъамбарланы китапларында жазылгъанланы барына да ийнанама.

¹⁵ Бу адамла кеслери да къабыл этгенлери кибик, тюзлюклюлени да, тюзлюксюзлени да ёлгенден сора тиргизилликлерине ийнанып, Аллахха ышанама.

¹⁶ Ол себепден кесим да Аллахны эм адамланы аллында дайым жюрегими таза тутаргъа кюрешеме.

¹⁷ Кёп жылладан сора, мен халкъыма садакъа эм къурман келтирир ючюн, Иерусалимге келгенме.

¹⁸ Ала мени табыныучу юйде алай этгеними кёргенлеринде, дин адетлеге кёре тазаланнган эдим. Тёгерегимде халкъ да, дауур да жокъ эди.

¹⁹ Алайда уа асиялы иудейлиледен бир къаууму бар эди. Аланы манга къажау айтыр затлары бар эсе, ала сени аллынга келип, мени терслерге керек эдиле.

²⁰ Неда мен синедрионну аллында сюелген заманда, менде не терслик тапханларын была кеслери айтсынла.

²¹ Ала мени терслеяллыкъ жаланда, араларында сюелген заманымда, „Ёлгенледен тиргизилиу окъуу ючюн сиз бюгюн манга сюд этесиз“ деп къычыргъан сёзюмдю», – деди.

²² Иссаны жолуну юсюнден толу билими болуп, Феликс алагъа: «Сизни ишигизге аскер башчы Лисий келсе къарарма», – деп аланы ишлерини болжалын артха салды.

²³ Пауулну уа сакъларгъа, анга бираз эркинлик да берирге эм анга болушхан неда келип кёрген жууукъларын тыймазгъа жюзбашчыгъа буйрукъ этди.

²⁴ Бир бёлек кюнден сора Феликс, иудейли къатыны Друзилла бла келип, Пауулну чакъыртып, аны Масих Иссагъа ийнаныуну юсюнден айтханына тынгылады.

²⁵ Пауул тюзлюкню юсюнден, кесинги тыйыуну юсюнден эм къыямат кюн боллукъ сюдню юсюнден айтханы себепли уа, Феликсге къоркъуу тюшдю эм: «Энди бар, заман тапсам а, сени чакъыртырма», – деп жууап этди.

²⁶ Андан сора да ол, Пауул анга кесин азат этдирир ючюн ахча берир деп умут эте эди; ол себепден ол, Пауулну терк-терк чакъыртып аны бла ушакъ эте эди.

²⁷ Алай а эки жыл озгъандан сора, Феликсни орунуна Поркий Фест келди; иудейлилени ыразы этерге сюйюп, Феликс Пауулну тюрмеде къойду.