Ишлери 21 - Сыйлы Инжил бла Забур

Иерусалимге жолоучулукъ

¹ Биз, аладан айырылгъанлай, кемеге минип, тюзюнлей Косха келдик, экинчи кюн а Родосха, андан да Патарагъа келдик.

² Эм, Финикиягъа баргъан кеме табып, анга минип, тенгизге чыкъдыкъ.

³ Кипрни туурасы бла барып эмда аны сол жанында къоюп, биз, Сириягъа жюзюп, Тирде тохтадыкъ; нек десегиз анда кемеден жюкню тюшюрюрге керек эди.

⁴ Сора андагъы сохталаны табып, анда жети кюн турдукъ. Ала Сыйлы Нюр кёллерине салыу бла, Пауулгъа Иерусалимге барма деп айта эдиле.

⁵ Ол кюнледен сора биз андан чыгъып кетдик. Ала барысы да къатынлары эм сабийлери бла бирге бизни шахардан тышына дери окъуна ашырдыла; тенгиз жагъада уа, тобукъланып тилек этдик.

⁶ Сора, бир-бирибиз бла саламлашып, биз кемеге миндик, ала уа юйлерине къайтдыла.

⁷ Биз да Тирден, жолубузну бошап, Птолемаидада кемеден тюшдюк. Анда, къарындашлагъа салам берип, ала бла бир кюн турдукъ.

⁸ Экинчи кюн а Пауул бла биз, аны биргесине болгъанла, андан чыгъып, Кесариягъа келдик эм жетисинден бири болгъан, Хайыр Хапарны билдириучю Филипни юйюне барып, анда къалдыкъ.

⁹ Аны уа файгъамбарлыкъ этиучю, эрге бармагъан тёрт къызы бар эди.

¹⁰ Биз анда бир талай кюн тургъандан сора, Иудеядан, Агап атлы бир файгъамбар келди.

¹¹ Ол бизге келип, Пауулну белибауун алып, аны бла кесини къолларын байлап: «Сыйлы Нюр былай айтады: „Бу белибауну иесин, Иерусалимдеги иудейлиле былай байлап, башха миллетлилени къолларына берликдиле“», – деди.

¹² Муну эшитген заманыбызда, биз да, андагъыла да Пауулдан Иерусалимге бармазын тиледик.

¹³ Пауул а бизге жууапха: «Неди сизни бу этгенигиз? Жиляп мени жюрегими нек сындырасыз? Мен тутмакъ болгъан угъай да, Раббий Иссаны аты ючюн Иерусалимде ёлюрге да хазырма», – деди.

¹⁴ Биз аны тыялмагъаныбызда уа: «Раббий буюргъанлай болсун!» – деп тохташдыкъ.

¹⁵ Ол кюнледен сора биз, хазырланып, Иерусалимге кетдик.

¹⁶ Кесариядан да бизни бла бир къауум сохтала тебиредиле. Ала бизни эрттегили сохталадан болгъан Мынасон атлы бир Кипрлини юйюне келтирдиле. Биз аны юйюнде турлукъ эдик.

Пауул Иерусалимде

¹⁷ Иерусалимге келгенибизде, къарындашла бизни къууанып къабыл этдиле.

¹⁸ Экинчи кюн Пауул бизни бла бирге Якъупха барды. Жамауатны битеу таматалары да ары жыйылгъан эдиле.

¹⁹ Ала бла саламлашхандан сора, Пауул, аны къуллукъ этиую бла, Аллах башха миллетлени арасында этген ишлени толусунлай алагъа айтды.

²⁰ Ала да, муну эшитгенде, Аллахха махтау салып, анга: «Кёремисе, къарындаш, иудейлиледен ненча минг адам ийнаннган эсе да, ала барысы да Таурат жанлы болуп кюрешгенледиле.

²¹ Сени юсюнгден а, сен башха миллетлени арасында жашагъан битеу иудейлилени, сабийлерине сюннет этмесинле, адетлерибизни да жюрютмесинле деп айтып, Мусадан таяргъа юйретесе деп эшитгендиле.

²² Сора къалай болсун? Халкъ ишексиз жыйыллыкъ болур; нек десенг сени келгенинги эшитирле.

²³ Анга кёре, биз санга не айтсакъ, аны эт: бизде нюзюрлери болгъан тёрт адам барды.

²⁴ Аланы биргенге алып, ала бла, тазаланыу адетге къошул эм ала чачларын къыркъдырыр ючюн къурман къоранчларын тёле. Сора сени юсюнгден эшитгенлери тюз болмагъанын, алай а сен кесинг да Тауратны тутуп жашагъанынгы ала барысы да билирле.

²⁵ Башха миллетлиледен ийнаннганлагъа уа, ала ол жорукъланы тутмасынла, алай а идоллагъа этилген къурманланы этлеринден, къандан, мурдар ёлген хайыуан, этден эмда саякълыкъдан кеслерин сакъласынла деп этген бегимибизни жазып ийген эдик», – дедиле.

²⁶ Ол заманда Пауул, ол адамланы биргесине алып, ала бла тазаланыу адетге къошулуп, экинчи кюн табыныучу юйге кирип тазаланыу кюнлерини къачан бошаллыгъын, аланы хар бири ючюн къачан къурман этиллигин билдирди.

Пауул тутулады

²⁷ Ол жети кюн бошала туруб’а, асиялы иудейлиле, Пауулну табыныучу юйде кёрюп, битеу халкъны къозгъадыла эмда аны тутдула,

²⁸ Эмда: «Израильлиле! Болушугъуз! Бу адам хар жерде битеу адамланы халкъыбызгъа да, Тауратха да, бу сыйлы жерге да къажау юйретеди; греклилени да табыныучу юйге кийирип, бу сыйлы жерни харам этгенди!» – деп къычыра эдиле.

²⁹ Нек десегиз муну аллында ала, Пауулну шахарда Эфесли Трофим бла кёрюп, ол себепден Пауул аны табыныучу юйге кийирген суннган эдиле.

³⁰ Битеу шахар къозгъалып, халкъ басынды; эм Пауулну табыныучу юйден сюйреп чыгъардыла. Олсагъат эшикле этилдиле.

³¹ Ала аны ёлтюрюрге мурат этгенде уа, римли полкну башчысына, битеу Иерусалим къозгъалгъанды деген хапар жетди.

³² Ол а, олсагъатдан аскерчиле да, жюзбашчыланы да алып, аланы юслерине бошланды. Ала уа, аскер башчы бла аскерчилени кёрюп, Пауулну тюйгенлерин къойдула.

³³ Ол заманда аскер башчы, къаршы келип, Пауулну тутду эмда эки бугъоу бла бугъоуларгъа буюруп: «Бу кимди эмда не этгенди?» – деп сорду.

³⁴ Халкъда бирле бирин, башхалары башхасын айтып къычыра эдиле. Аскер башчы уа къаугъаны себебинден белгили зат билалмай, Пауулну къалагъа элтирге буюрду.

³⁵ Пауул басхычны къатына келген заманда, халкъ асыры бек басыннгандан, аскерчилеге аны кётюрюп элтирге тюшдю,

³⁶ Нек десегиз аны ызындан келген халкъ: «Анга ёлюм!» – деп къычыра эдиле.

Пауул иудейлилени аллында кесин ариулайды

³⁷ Къалагъа кирип баргъан заманда Пауул аскер башчыгъа: «Мен санга бир зат айтыргъа боллукъмуду?» – деди. Ол а: «Сен грекча билемисе?

³⁸ Сора бу кюнлени аллында къозгъалыу чыгъарып, тёрт минг террорчуну къум тюзге элтген ол Мисирли сен тюйюлмюсе?» – деди.

³⁹ Пауул а: «Мен иудейлиме, Киликияны белгили Тарс шахарыны адамыма; халкъгъа сёлеширге манга эркинлик бериринги сенден тилейме», – деди.

⁴⁰ Ол эркинлик бергенде уа, Пауул, басхычны юсюнде сюелип, халкъгъа къолу бла белги берди эмда, терен шошлукъ болгъанлай, ол чюйют тилде былай сёлешип башлады: