Ишлери 2 - Сыйлы Инжил бла Забур

Сыйлы Нюрню келиую

¹ Эллинчи кюнню байрамы жетгенде, ийнаннганланы барысы да бир жерде бирге эдиле.

² Билмей тургъанлай, кёкден кючлю желни уруууна ушагъан таууш келип, ала тургъан юйню саулай толтурду;

³ Сора от тиллеге ушагъан затла алагъа кёрюндюле; была, юлешинип, аланы хар бирине бирери тюшдю.

⁴ Ийнаннганланы барысы да Сыйлы Нюрден толдула эм Нюр алагъа айтыргъа берген башха-башха тилледе сёлешип башладыла.

⁵ Иерусалимде уа кёкню тюбюнде хар миллетден келген, дин тутхан иудейлиле бар эдиле.

⁶ Ол таууш болгъан заманда, халкъ, жыйылып, абызыраугъа тюшдю, нек десегиз хар бири аланы кеси тили бла сёлешгенин эшите эди.

⁷ Бары да, сейирсинип, хайран болуп, бирбирлерине: «Бу сёлешгенле бары да Галилеялыла тюйюлмюдюле?

⁸ Биз хар бирибиз кесибизни ана тилибизни къалай эшитебиз?

⁹ Парфиялыла, мидиялыла, эламлыла, Месопотамияда, Иудеяда, Кападокияда, Понтда эм Асияда,

¹⁰ Фригияда эм Памфилияда, Мисирде эм Ливияны Киринеягъа жууукъ жерлеринде жашагъанла, иудейли болуп туугъан эм иудей динни къабыл этген Римден келген къонакъла,

¹¹ критлиле эм араплыла, – биз барыбыз да аланы, бизни тиллерибиз бла, Аллахны уллу ишлерини юсюнден айтханларын эшитебиз», – дей эдиле.

¹² Сора бары да, сейирсинип, не этерге билмей, бир-бирлерине: «Муну магъанасы неди?» – дей эдиле.

¹³ Бир къауумла уа хыликкя этип: «Ала асыры кёп татлы чагъыр ичгендиле», – дей эдиле.

Петер Иерусалимни халкъына айтхан сёз

¹⁴ Петер а, онбир сохта бла ёрге туруп, уллу ауаз бла алагъа былай сёлешди: «Иудейли кишиле эм битеу Иерусалимде жашагъанла! Бу сизге белгили болсун, мени сёзлериме тынгылагъыз:

¹⁵ Сиз суннганча, ала эсирип тюйюлдюле, нек десегиз энди кюнню ючюнчю сагъатыды!

¹⁶ Бу уа Йоел файгъамбарны:

¹⁷ „Ахыр кюнледе былай боллукъду дейди Аллах: Мен Нюрюмден битеу адамлагъа къуярыкъма, сизни уланларыгъыз да, къызларыгъыз да файгъамбарлыкъ этерикдиле, сизни жаш адамларыгъыз да кёрюнюуле кёрлюкдюле, къартларыгъыз да тюш кёрлюкдюле.

¹⁸ Эркегырыу эм тиширыу къулларыма ол кюнледе Мен Нюрюмден къуярыкъма, ала да файгъамбарлыкъ этерикдиле.

¹⁹ Сора кёкде огъары сейирликле, тюбюнде жерде да илишанла, къан, от эм тютюн булутла кёргюзтюрюкме.

²⁰ Раббийни уллу эм махтаулу кюню келирден алгъа, кюн къарангыгъа, ай да къан бетине айланырыкъды.

²¹ Ол заманда Раббийни атын айтып тилек этген хар адам къутхарыллыкъды“ деп айтханыды.

²² Израильли кишиле! Тынгылагъыз бу сёзлеге: кесигиз да билгенигиз кибик, Назаретли Исса, Аллах Аны юсю бла сизни арагъызда этген къудуретли ишлери, сейирликлери эм илишанлары бла белгили болгъан Кишиди.

²³ Аллахны белгилеген муратына эм алгъындан билгенине кёре, къолугъузгъа берилген бу Кишини, сиз тутуп, законсузланы къоллары бла къачха чюйлетип ёлтюргенсиз.

²⁴ Аллах а, ёлюмню бугъоуларын бузуп, Аны тиргизгенди; нек десегиз ёлюмге Аны тыяргъа амал жокъ эди.

²⁵ Дауут Иссаны юсюнден былай айтады: „Мен хар заманда да Раббийни аллымда кёргенме, Ол мени онг жанымда болгъаны ючюн тентирерик тюйюлме.

²⁶ Аны ючюн мени жюрегим къууаннганды, тилим да сюйюннгенди эм мени чархым окъуна ышаныуда тынчайырыкъды.

²⁷ Нек десенг Сен мени жанымы ахыратда къоймазса эм Сени сыйлынга чиримекликни сынатмазса.

²⁸ Сен манга жашауну жолун билдиргенсе; Сен Кесинги аллынгда мени къууанчдан толтурлукъса“ дейди.

²⁹ Къарындашла! Уллу атабыз Дауутну юсюнден сизге ачыкъ айтайым: ол ёлгенди эм асыралгъанды эм аны къабыры бюгюннге дери да биздеди.

³⁰ Ол а файгъамбар эди эм аны урлугъундан Масихни чархы бла болдуруп аны тахтасына олтуртургъа Аллахны анга ант бла сёз бергенин биле эди.

³¹ Ол себепден, ол, боллукъну кёрюп, Масихни тиргизиллигини юсюнден: „Аны жаны ахыратда къоюлмагъанды эм Аны чархы чиримекликни сынамагъанды“ деп айтханды.

³² Бу Иссаны Аллах тиргизгенди, анга биз барыбыз да шагъатлабыз.

³³ Алай бла Ол, Аллахны онг жанына чыгъарылып, Атадан, Ол берирге айтхан Сыйлы Нюрню алып, энди, сиз кёргенча эм эшитгенча, бу Нюрню юсюбюзге къуйгъанды.

³⁴ Дауут кёклеге чыкъмагъанды, алай а кеси былай айтады: „Раббий мени Бийиме:

³⁵ ,Мен душманларынгы Сени аякъ тюбюнге салгъынчыгъа дери, Мени онг жанымда олтур‘, – дегенди“.

³⁶ Алай бла битеу Израильни юйюрю, къаты билигиз, бу сиз къачха керген Иссаны, Аллах Бий эм Масих этгенди», – деп сёлешди.

³⁷ Муну эшитгенлеринде, аланы жюреклери эрип, Петерге бла къалгъан абустоллагъа: «Къарындашла, биз не этейик?» – дедиле.

³⁸ Петер а алагъа: «Гюняхларыгъыз кечилир ючюн, тобагъа къайтышыгъыз эм хар биригиз Масих Иссаны аты бла сууда кёмюлдюрюлсюн, сора саугъагъа Сыйлы Нюрню алырсыз.

³⁹ Нек десегиз Аллах берирге айтханын сизге, сабийлеригизге эм узакъдагъыланы барына да, Раббий Аллахыбыз кимни чакъырса да анга айтханды», – деди.

⁴⁰ Эм башха кёп сёзле бла шагъатлыкъ этип: «Бу бузукъ тукъумдан кесигизни къутхарыгъыз!» – деп жалбарды.

⁴¹ Алай бла аны сёзюн сюйюп алгъанла, сууда кёмюлдюрюлдюле. Ол кюн жамауатха юч минг чакълы адам къошулду.

⁴² Ала, кеслерин тохтаусуз абустолланы юйретиулерине берип, къарындашлыкъ бирликде, ётмек сындырыуда эм тилек этиуде тура эдиле.

Ийманлыланы бирликлери

⁴³ Хар бир адамда да Аллахдан къоркъуу бар эди. Абустолланы юслери бла Иерусалимде кёп сейирликле эм илишанла этиле эдиле.

⁴⁴ Ийнаннганла уа барысы да бирге эдиле эм хар нелерин да бир-бирлери бла юлеше эдиле.

⁴⁵ Мюлклерин эм болгъан затларын сатып, ахчасын барына да хар кимни кереклисине кёре юлеше эдиле.

⁴⁶ Хар кюн сайын бир ниетде табыныучу юйню арбазларында жыйыла эдиле, кеси юйлеринде да, ётмек сындырып, ашларын жарыкълыкъ бла эм таза жюреклилик бла ашай эдиле.

⁴⁷ Аллахха махтау сала, битеу халкъгъа кеслерин сюйдюре эдиле. Раббий да хар кюнден жангы къутхарылгъанланы жамауатха къоша эди.