Ишлери 17 - Сыйлы Инжил бла Забур

Фесалоникада

¹ Амфиполну бла Аполонияны юсю бла барып, ала Фесалоникагъа келдиле, анда уа иудейлилени синагогалары бар эди.

² Пауул, кесини адетине кёре, алагъа барып, юч шабат кюнню Сыйлы Китапладан окъуп, ала бла сёлешди.

³ Китапланы ачып ангылата, Масихни азап чегерге эм ёлгенледен тиргизилирге керек болгъанын кёргюзте: «Масих а – мен сизге билдирген Иссады», – деди.

⁴ Аладан бир къауумлары, ийнанып, Пауулгъа бла Силагъа къошулдула, Аллахха табыннган греклиледен да бек кёп адам, асыл тиширыуладан да кёпле ийнандыла.

⁵ Ийнанмагъан иудейлиле уа, зарланып, базар майдандан бир къауум жараусуз адамланы кеслери жанлы этип, жыйын болуп шахарны къозгъадыла эм, Ясонну юйюне чабыуул этип, Пауулну бла Силаны халкъны аллына чыгъарыргъа изледиле.

⁶ Алай а аланы тапмай, Ясонну эмда бир къауум къарындашны тутуп, шахарны оноучуларына элтип: «Битеу дунияны къозгъагъан бу адамла бери да келгендиле.

⁷ Ясон а аланы къонакъгъа алгъанды. Ала барысы да кесарьны буйругъуна къажау жюрюйдюле, патчахха башханы, Иссаны санайдыла», – деп къычырып,

⁸ Халкъны да, муну эшитген оноучуланы да къозгъадыла.

⁹ Алай а Ясондан эмда башхаладан залог алгъандан сора, аланы азат этдиле.

Берияда

¹⁰ Къарындашла уа, мычымай, кече бла Пауулну бла Силаны Бериягъа ашырдыла. Ары келгенлеринде, ала иудей синагогагъа бардыла.

¹¹ Мындагъыла уа фесалоникачыладан эсе тюз оюмлу эдиле; бу алаймыды деп, хар кюн сайын Сыйлы Китаплада жазылгъанлагъа тинтип къарап, Аллахны сёзюн кёл салып къабыл этдиле.

¹² Сора иудейлиледен да, намыслы грек тиширыуладан да, эр кишиледен да кёпле ийнандыла.

¹³ Фесалоникалы иудейлиле уа, Аллахны сёзюн Пауул Берияда да жайгъанын билгенлеринде уа ары да келип халкъны къозутуп къозгъадыла.

¹⁴ Ол заманда къарындашла терк окъуна Пауулну тенгизге ашырдыла, Сила бла Тимотей а анда къалдыла.

¹⁵ Пауулну биргесине баргъанла аны Афинагъа дери ашырдыла эм Силагъа бла Тимотейге, ала Пауулгъа теркирек келсинле деген буйрукъну алып, ызларына къайтдыла.

Афинада

¹⁶ Афинада аланы сакълап, Пауул, бу шахарны идолладан толуп тургъанын кёргенинде, аны жюреги къыйналды.

¹⁷ Алай бла ол, синагогада иудейлиле бла эм Аллахха табыннганла бла эмда хар кюнден базар майданда жолукъгъанла бла сёлешип турду.

¹⁸ Сора эпикурей эм стоик философладан бир къаууму Пауул бла даулашып башладыла. Аладан бир къаууму: «Бу фана сёзлю не айтыргъа кюрешеди?» – дей эдиле, башхалары уа: «Ол тыш къыраллы тейриледен ууаз бергеннге ушайды», – дей эдиле; нек десегиз ол алагъа Иссаны юсюнден эм тиргизилиуден Хайыр Хапарны билдире эди.

¹⁹ Сора аны тутуп, Ареопагга келтирип: «Сен ууаз берген бу не жангы окъууду, биз билирге боллукъбузму?

²⁰ Нек десенг сен бизни къулакъларыбызгъа бир къужур сёзлени саласа; аны себепли быланы магъанасы не болгъанын билирге сюебиз», – дедиле.

²¹ Битеу афиналыланы эмда анда жашагъан тыш къыраллыланы уа, жангы хапар айтхандан неда эшитгенден сюйген жубанчлары жокъ эди.

²² Сора, Пауул Ареопагны арасында сюелип былай сёлешди: «Афиналыла! Мен сизни хар затларыгъызгъа къарап, диннге сакъ болгъаныгъызны кёреме.

²³ Нек десегиз мен сизни табыннган жерлеригизге къарай айланып, юсюнде: „Билинмеген Аллахха“ деп жазылгъан бир къурман ташха да тюбегенме. Ма бу, сиз Аны билмегенлей табыннган Аллахны мен сизге билдиреме.

²⁴ Дунияны эм битеу анда болгъан затланы жаратхан Аллах, кёкню да, жерни да Раббийи болгъаны себепли, къол бла ишленнген табыныучу юйледе жашамайды.

²⁵ Барына да жашауну да, солууну да, хар нени да бериучю Кеси болгъанына кёре, бир затдан кереклиси болгъанча, Анга адамла къоллары бла къуллукъ этерлерин излемейди.

²⁶ Ол битеу миллетлени бир къандан жаратханды эм битеу жерни юсюнде жашатады. Аланы жашарыкъ заманларыны эм жашар жерлерини чеклерин алгъындан белгилегенди.

²⁷ Аллах муну, ала Аны излер ючюн эм сезип табар ючюн этгенди. Болсада, Ол бизни хар бирибизден да узакъ тюйюлдю.

²⁸ Нек десегиз бизни жашатхан, жюрютген эм болдургъан Олду, сизни назмучуларыгъыздан бир къаууму: „Биз Аны тукъумубуз“ деп айтханлары кибик.

²⁹ Алай бла биз, Аллахны тукъуму болуп тургъанлай, Аллахны табийгъаты, адамны хунерлиги эм оюму бла ишленип, сыфат алгъан алтыннга, кюмюшге неда ташха ушайды деп ойлашыргъа керек тюйюлбюз.

³⁰ Алай бла Аллах билмей туруу заманлада этген терсликлерибизни боюнубузгъа салмай, энди хар жерде да битеу адамлагъа тобагъа къайтышыргъа буйрукъ этеди.

³¹ Нек десегиз Аллах битеу дуниягъа, Кеси алгъындан сайлагъан Кишини юсю бла тюзлюклю сюд этер кюнюн белгилегенди. Сюд этеригине битеу адамланы ышандырыр ючюн бу Кишини ёлгенледен тиргизгенди».

³² Ёлгенлени тиргизилиуюню юсюнден эшитгенде, бир къауумлары хыликкя этдиле, башхалары уа: «Аны юсюнден санга башха заманда тынгыларбыз», – дедиле.

³³ Алай бла Пауул аланы араларындан чыкъды.

³⁴ Бир къауум кишиле уа, анга къошулуп, ийнаннган эдиле. Аланы арасында Ареопагчы Дионисий эм Дамар атлы бир тиширыу эм ала бла башхала бар эдиле.