Ишлери 16 - Сыйлы Инжил бла Забур

Тимотей Пауулгъа бла Силагъа къошулады

¹ Пауул андан Дербиге бла Листрагъа дери жетген эди. Анда Тимотей атлы бир сохта бар эди; аны анасы ийманлы иудейлиледен эди, атасы уа грекли эди.

² Аны юсюнден Листрада бла Иконияда иги шагъатлыкъ эте эдиле.

³ Аны Пауул биргесине элтирге сюйдю; эмда ол жерледе болгъан иудейлиле ючюн анга сюннет этдирди; нек десегиз аны атасы грекли болгъанын бары да биле эдиле.

⁴ Шахардан шахаргъа жюрюп, ала ийнаннганлагъа, Иерусалимдеги абустолла бла таматала бегим этген шартланы билдирип, быланы тутаргъа фарыз эте эдиле.

⁵ Жамауатла да ийманда кючлене эдиле эм кюнден кюннге ийнаннганланы саны кёпден-кёп бола эдиле.

Македониячы адамны Пауулгъа кёрюнюую

⁶ Сыйлы Нюр аланы Аллахны сёзюн Асияда билдирирге къоймагъаны себепли, Пауул бла нёгерлери, Фригияны бла Галатия къыралны юсю бла бардыла.

⁷ Мисиягъа дери жетип, андан Битиниягъа атланыргъа мурат этдиле, алай а Иссаны Нюрю алагъа эркинлик бермеди.

⁸ Мисияны бир жанында къоюп, ала Троадагъа келдиле.

⁹ Анда Пауулгъа кече кёрюнюу кёрюндю: бир Македониялы киши туруп, анга: «Македониягъа кел да бизге болуш!» – деп тилей эди.

¹⁰ Пауул кёрген бу кёрюнюуден сора, биз олсагъатдан Македониягъа барыргъа тебиредик, андагъылагъа Хайыр Хапарны билдирирге Раббий бизни чакъыргъанын ангылагъан эдик.

Лидия Масих Иссагъа ийнанады

¹¹ Алай бла, Троададан чыгъып, биз тюзюнлей Самотракиягъа келдик, экинчи кюн а Неапольгъа жетдик,

¹² Андан а Филипий шахаргъа; ол, Македонияны ол жеринде биринчи колония шахарды. Бу шахарда биз бир бёлек кюн турдукъ.

¹³ Шабат кюн а, биз шахардан чыгъып, суу боюнуна бардыкъ. Анда адет бла тилек этилиучю эди. Биз анда олтуруп, ары жыйылгъан тиширыула бла сёлешип башладыкъ.

¹⁴ Тиатира шахардан Лидия атлы, къызгъылдым къумач сатыучу, кеси да Аллахха табыныучу, бир тиширыу тынгылай эди; Пауулну не айтханына эсин бёлюрге Раббий аны жюрегин ачхан эди.

¹⁵ Ол кеси юйюрю бла бирге сууда кёмюлдюрюлгенден сора бизден: «Сиз мени Раббийге ийнаннганнга санай эсегиз, мени юйюме келип, анда туругъуз», – деп тиледи. Эмда бизни къоймай элтди.

Пауул бла Сила тюрмеде

¹⁶ Бир жолда, биз тилек этилиучю жерге бара тургъанлай, ичинде билгичлик этиучю нюрю болгъан бир къарауаш къыз бизге жолукъду. Ол а боллукъну билдириую бла кесини бийлерине уллу хайыр келтирип тура эди.

¹⁷ Ол къыз, Пауулну бла бизни ызыбыздан келип: «Бу адамла Аллаху-Тааланы къулларыдыла, была бизге къутхарылыу жолну билдиредиле!» – деп къычыра эди.

¹⁸ Ол алай кёп кюнлени этген эди. Пауул, ачыуланып, ары айланып нюрге: «Масих Иссаны аты бла санга буйрукъ этеме, чыкъ бу къыздан!» – деди. Сора нюр олсагъатдан окъуна чыкъды.

¹⁹ Ол заманда къызны бийлери, алагъа хайыр тюшюуге ышаныу къалмагъанын кёрюп, Пауулну бла Силаны, тутуп, базар майданнга, оноучуланы аллына сюйреп элтдиле.

²⁰ Сора, аланы аскер башчылагъа келтирип: «Бу адамла, кеслери иудейлиле болгъанлай, бизни шахарыбызны къозгъайдыла.

²¹ Бизге, римлилеге не къабыл этерге, не тутаргъа жарамагъан адетлени жаядыла», – дедиле.

²² Халкъ да алагъа къажау къозгъалды; аскер башчыла уа, аланы кийимлерин юслеринден тартып алып, аланы таякъла бла тюерге буйрукъ бердиле.

²³ Аланы кёп кере ургъандан сора, тюрмеге атдыла, тюрмени сакълауулуна да къаты сакъларгъа буйрукъ бердиле.

²⁴ Ол, аллай буйрукъ алып, аланы тюрмени ич бёлюмюне атды, аланы аякъларын да кепге урду.

²⁵ Кечени арасында Пауул бла Сила тилек этип, зикир айтып, Аллахха махтау сала эдиле; тутмакъла да алагъа тынгылай эдиле.

²⁶ Сора билмей тургъанлай, уллу жер тебиу болуп, тюрмени мурдоруна дери титиретди; олсагъат битеу эшикле ачылдыла эм барысыны да бугъоулары бошландыла.

²⁷ Тюрмени сакълауулу да, уянып, тюрмени эшиклери ачылып тургъанын кёрюп, тутмакъла къачхан сунуп, къылычын чыгъарып, кеси-кесин ёлтюрюрге тебиреди.

²⁸ Пауул а анга: «Кесинге аманлыкъ этме, биз барыбыз да мындабыз!» – деп уллу къычырды.

²⁹ Сакълауул, чыракъ келтиртип, чабып камераны ичине кирип, къалтырап, Пауулну бла Силаны алларында ауду.

³⁰ Сора аланы тышына чыгъарып: «Жюйюсханларым! Къутхарылыр ючюн, мен не этейим?» – деди.

³¹ Ала уа анга: «Раббий Масих Иссагъа ийнан, кесинг да къутхарылырса эм битеу юйюрюнг да къутхарылыр», – дедиле.

³² Сора анга да, аны юйюндегилени барысына да Раббийни сёзюн билдирдиле.

³³ Кечени ол заманында аланы элтип, жараларын жууду эм, мычымай, кеси да, битеу юйюрю да сууда кёмюлдюрюлдюле.

³⁴ Сора аланы кесини юйюне келтирип, алагъа аш берди эмда Аллахха ийнаннганына, битеу юйюрю бла бирге къууанды.

³⁵ Танг атханлай а, аскер башчыла, шахарны къуллукъчуларын ийип: «Ол адамланы эркин эт», – деп айтдырдыла.

³⁶ Тюрмени сакълауулу бу сёзлени Пауулгъа: «Аскер башчыла сизни эркин этдирирге ийгендиле; алай бла энди чыгъып, ырахатлыкъ бла барыгъыз», – деп билдирди.

³⁷ Пауул а къуллукъчулагъа: «Бизни, Римни инсанларын, сюдсюз, битеу халкъны аллында тюйюп тюрмеге атхандыла, энди уа бизни жашыртынмы жибередиле? Угъай, бизни кеслери келип чыгъарсынла», – деди.

³⁸ Шахарны къуллукъчулары бу сёзлени аскер башчылагъа айтдыла, ала уа, была Римни инсанлары болгъанларын эшитгенде, къоркъдула.

³⁹ Сора, келип, аладан кечгинлик тиледиле эм аланы чыгъарып, шахардан кетерлерин тиледиле.

⁴⁰ Ала уа, тюрмеден чыкъгъанлай, Лидияны юйюне келдиле эм къарындашланы кёрюп, аланы кёллендиргенден сора жолгъа чыкъдыла.