Ишлери 15 - Сыйлы Инжил бла Забур

Иерусалимдеги жыйылыу

¹ Иудеядан келген бир къауумла, къарындашлагъа: «Мусаны адети бла сюннет этдирмесегиз, къутхарыллыкъ тюйюлсюз», – деп юйрете эдиле.

² Сора келишмеулюк болуп, Пауул бла Барнаба ала бла кёп айтып кюрешген заманда, Пауулгъа бла Барнабагъа эм аладан бир къауумуна, бу ишни юсюнден, Иерусалимде абустоллагъа бла таматалагъа барыргъа оноу этдиле.

³ Алай бла жамауат аланы ашырды, ала да, Финикия бла Самарияны юсю бла барып, башха миллетлилени Аллахха къайтышханларын айтып, битеу къарындашланы уллу къууандыра эдиле.

⁴ Ала Иерусалимге келгенлей а, аланы жамауат, абустолла эм таматала къабыл этдиле, ала да Аллах аланы юсю бла неле этгенин эм башха миллетлилеге ийманны эшигин къалай ачханын айтып билдирдиле.

⁵ Ол заманда фарисей масхапдан болгъан ийманлыладан бир къаууму къобуп: «Башха миллетледен болуп ийман салгъанлагъа сюннет этерге эм Мусаны Законун тутаргъа фарыз этерге керекди», – дей эдиле.

⁶ Абустолла бла таматала бу ишге къарар ючюн жыйылдыла.

⁷ Кёпле чыгъып сёлешгенден сора, Петер туруп, алагъа: «Къарындашла! Биринчи кюнледен башлап, башха миллетлиле мени ауузумдан Хайыр Хапарны сёзюн эшитип ийнаныр ючюн бизни арабыздан Аллах мени сайлагъанын сиз билесиз.

⁸ Адамланы жюреклерин билген Аллах а, Сыйлы Нюрню бизге бергени кибик, алагъа да берип, аланы къабыл этгенин кёргюзтгенди.

⁹ Эмда аланы бла бизни арабызда бир тюрлю башхалыкъ этмей, ийман бла аланы жюреклерин тазалагъанды.

¹⁰ Энди уа сиз, не бизни аталарыбыз неда биз кесибиз кётюралмагъан жюкню сохталаны боюнларына салыргъа кюрешип, Аллахны нек сынайсыз?

¹¹ Биз а, ала кибик, Раббий Масих Иссаны шафауаты бла къутхарылырбыз деп ийнанабыз», – деп сёлешди.

¹² Сора битеу жыйылыу тохташып, Барнабаны бла Пауулну, башха миллетлени арасында, Аллах аланы юслери бла къаллай илишанла бла сейир ишле этгенин айтханларына тынгыладыла.

¹³ Ала тохтагъандан сора уа, Якъуп сёлешип башлап былай айтды: «Къарындашла! Тынгылагъыз мени сёзюме:

¹⁴ Шимон, Аллах башха миллетлиледен Кесини атына махтау келтирлик бир халкъ болдурур ючюн алагъа бек алгъа къалай эс бёлгенин ангылатханды.

¹⁵ Файгъамбарланы сёзлери да муну бла келишеди. Китапларында жазылгъаны кибик:

¹⁶ „,Андан сора къайтып, Дауутну аугъан юйюн жангыдан къурарыкъма, оюлгъан жерлерин да жангыдан ишлеп, аны тюзетирикме.

¹⁷ Къалгъан адамла, Мен Кесимики болургъа чакъыргъан битеу миллетле Мени, Раббийни излер ючюн алай этерме‘, – дейди бу ишлени барын да болдургъан Раббий“.

¹⁸ Аллахны битеу ишлери ёмюрлюкден да Кесине белгилидиле.

¹⁹ Ол себепден, мен хыйсап этгеннге кёре, башха миллетлиледен Аллахха къайтышханлагъа чырмау этмезге керекди,

²⁰ Алагъа уа, идоллагъа берилип харам болгъан ашладан, саякълыкъдан, мурдар ёлген хайуан этден эмда къандан ала кеслерин сакъласынла эмда кеслерине этилирин сюймеген затланы башхалагъа этмесинле деп жазып иерге керекди.

²¹ Нек десегиз буруннгулу туудукъланы заманындан бери, Мусаны Законундан ууаз бериучюле, битеу шахарлада бардыла, ол хар шабат кюнден синагогалада окъулады», – деди.

Чюйютлю болмагъан ийманлылагъа жазылгъан къагъыт

²² Ол заманда абустолла бла таматала битеу жамауат бла бирге кеси араларындан сайлагъан адамларын Пауул эмда Барнаба бла Антиохиягъа иерге оноу этдиле. Къарындашланы арасында башчылыкъ этгенледен Баршаба аталгъан Иуданы эм Силаны сайладыла.

²³ Сора, былай жазып, аланы къолларына берип ийдиле: «Абустолла, таматала эмда къарындашла, башха миллетледен болуп Антиохияда, Сирияда эм Киликияда жашагъан къарындашлагъа салам айтадыла.

²⁴ Бизден бир къауумла барып, сизге сюннет этилирге эм Тауратны жорукъларын тутаргъа керекди деп, сизни жунчутуп, жюреклеригизни арсар этгенлерин эшитгенбиз. Биз алагъа алай этерге буйрукъ бермеген эдик.

²⁵ Ол себепден, биз жыйылып, арабыздан сайлагъан кишилени, бизни сюйген къарындашларыбыз Барнаба бла эм Пауул бла бирге сизге иерге бир ниетде оноу этгенбиз.

²⁶ Бу эки адам Раббийибиз Масих Иссаны аты ючюн кеси жанларын аямай берген кишиледиле.

²⁷ Алай бла биз Иуданы бла Силаны сизге иебиз, ала да бу затланы сёз бла айтып сизге ангылатырла.

²⁸ Нек десегиз Сыйлы Нюрге да, бизге да сизни боюнугъузгъа бу бек керекли жорукъладан башха жюк салмазгъа тийишли кёрюнеди:

²⁹ Идоллагъа берилип харам болгъан ашладан, къандан, мурдар ёлген хайыуан этден эмда саякълыкъдан кесигизни сакъларгъа эмда кесигизге этилирин сюймеген затланы башхалагъа этмезге керексиз. Бу жорукъланы тутсагъыз, иги этериксиз. Сау болугъуз», – деп жазып ийдиле.

³⁰ Алай бла Пауул, Барнаба, Иуда эмда Сила Антиохиягъа келдиле эм, жамауатны жыйып, алагъа бу жазылгъан къагъытны бердиле.

³¹ Ала уа, муну окъугъанда, бу насийхат берген сёзлеге къууандыла.

³² Иуда бла Сила уа, кеслери да файгъамбарла болуп, кёп сёзле бла къарындашлагъа кёл этдирип, аланы ийманда кючлендирдиле.

³³ Иуда бла Сила анда бир талай заман тургъандан сора, къарындашла аланы ырахатлыкъ бла ашырып абустоллагъа ийдиле;

³⁴ Алай а Сила анда къалыргъа ыразы болду, Иуда уа Иерусалимге къайтды.

³⁵ Пауул бла Барнаба уа, дагъыда башха кёпле бла, Раббийни сёзюн билдире эм Хайыр Хапарны жая, Антиохияда къалдыла.

Пауул бла Барнабаны арасында келишмеулюк

³⁶ Бир бёлек заман озгъандан сора, Пауул Барнабагъа: «Биз, Раббийни сёзюн билдирген битеу шахарлада къарындашларыбызгъа барып, аланы къалай жашагъанларын кёрейик», – деди.

³⁷ Барнаба, Марк аталгъан Ахияны да биргелерине элтирге сюе эди.

³⁸ Алай а Пауул, Памфилияда аладан артха къалып, алагъа буюрулгъан ишге ала бла бармагъан Маркны биргелерине элтирге сюймеди.

³⁹ Аны юсюнден аланы араларында келишмеулюк болуп, ала бир-бирлеринден айырылдыла. Сора Барнаба, Маркны биргесине алып, кеме бла Кипрге кетди.

⁴⁰ Пауул а, кесине нёгерге Силаны сайлап, къарындашла аны Аллахны шафауатына аманат этгенден сора жолгъа чыкъды

⁴¹ Эмда Сирияда бла Киликияда айланып, жамауатланы кючлендирди.