Ишлери 13 - Сыйлы Инжил бла Забур

Барнаба бла Пауул къуллукъгъа салынадыла

¹ Антиохияда болгъан жамауатда бир къауум файгъамбарла бла устазла бар эдиле: Барнаба эм Нигер аталгъан Шимон, Киринейли Лукий, Ирод тетрарх бла бирге ёсген Менахем эм Шауул.

² Ала, ораза тутуп, Раббийге къуллукъ этген заманда, алагъа Сыйлы Нюр: «Барнабаны бла Шауулну Манга айырып, Мен алагъа буюргъан ишге ийигиз», – деп айтды.

³ Ол заманда ала, ораза тутуп тилек этгенден сора, аланы юслерине къолларын салып, аланы атландырдыла.

Кипрде

⁴ Алай бла Сыйлы Нюр ийген бу эки адам, Селевкиягъа келдиле, андан а кеме бла Кипрге кетдиле.

⁵ Саламисге жетип, иудей синагогалада Аллахны сёзюн билдирип башладыла. Болушургъа биргелерине Ахияны да алгъан эдиле.

⁶ Битеу айрыкамда Пафха дери айланып, ала Барйешу атлы, хыйнычы эм жалгъан файгъамбар болгъан бир иудейлиге тюбедиле.

⁷ Ол а проконсул Серги Пауулну къатында эди. Акъыллы киши, проконсул, Барнабаны бла Шауулну чакъырып, Аллахны сёзюн эшитирге сюйдю.

⁸ Хыйнычы Элима уа, (аны атыны магъанасы алай эди), проконсулну иймандан тыяргъа кюрешип, алагъа къажау сёлеше эди.

⁹ Алай а Шауул, аны экинчи аты да Пауул, Сыйлы Нюрден толуп эмда анга жютю къарап:

¹⁰ «Эй, хар тюрлю хыйладан бла хар тюрлю аманлыкъдан толгъан, ибилисни баласы, хар тюзлюкню душманы! Раббийни тюз жолларын терсине бурургъа кюрешгенинги къоярыкъ тюйюлмюсе?

¹¹ Энди уа ма, Аллахны къолу сени юсюнгдеди: сен сокъур боллукъса, бир заманнга дери кюнню кёрлюк тюйюлсе», – деди. Билмей тургъанлай, аны мутхузлукъ бла къарангылыкъ басды; сора ол, ары бла бери бурулуп, кесин жюрютюрге адам излеп башлады.

¹² Ол заманда проконсул болгъан ишни кёрюп ийнанды; нек десегиз ол Раббийни юсюнден юйретиуге бек сейирсиннген эди.

Писидиягъа жууукъ Антиохияда

¹³ Пафдан жюзюп кетип, Пауул эмда аны биргесине болгъанла Памфилияны Перги шахарына келдиле, Ахия уа аладан айырылып Иерусалимге къайтды.

¹⁴ Ала уа, Пергиден ары барып, Писидиягъа жууукъ Антиохиягъа келдиле эмда шабат кюн синагогагъа кирип олтурдула.

¹⁵ Тауратдан бла файгъамбарланы китапларындан окъугъандан сора, синагоганы башчылары, алагъа адам ийип: «Къарындашла! Сизни халкъгъа насийхат берир сёзюгюз бар эсе, айтыгъыз», – деп айтдырдыла.

¹⁶ Пауул туруп, къолу бла белги берип: «Израильни кишилери эмда Аллахдан къоркъгъанла! Тынгылагъыз!

¹⁷ Бу халкъны Аллахы бизни аталарыбызны сайлагъанды эмда ала Мисирни жеринде жашагъан заманларында бу халкъны уллу миллет этгенди; сора кётюрюлген къолу бла аланы андан чыгъаргъанды.

¹⁸ Эмда къыркъ жыл чакълы заманны ичинде къум тюзде алагъа ашарыкъ берип тургъанды.

¹⁹ Кенанны жеринде жети миллетни къурутуп, аланы жерлерин Израильлилеге жер юлюшге бергенди.

²⁰ Андан сора, тёрт жюз элли жыл чакълы заманда, Шамайыл файгъамбаргъа дери алагъа оноучула берип тургъанды.

²¹ Сора ала патчах тилегендиле, Аллах да алагъа Беняминни тукъумундан Киш улу Шауулну бергенди; алай бла къыркъ жыл озгъанды.

²² Аны тайдырып, алагъа патчахха Дауутну салгъанды; аны юсюнден а шагъатлыкъ этип: „Мен Кеси жюрегим жаратхан кишини, Ишай улу Дауутну тапханма, ол битеу Мен сюйген затланы этерикди“ дегенди.

²³ Аны туудукъларындан а Аллах ант сёзю бла айтханыча Израильге Къутхарыучугъа Иссаны салгъанды.

²⁴ Аны келирини аллында Ахия битеу Израильни халкъын тобагъа къайтышыргъа эмда сууда кёмюлдюрюлюрге чакъыргъанды.

²⁵ Ахия, кесини ишин бошагъанында: „Сиз мени кимге санайсыз? Мен Масих тюйюлме; алай а ма, мени ызымдан келеди. Мени уа, Аны аякъ кийимини бауун тешер кибик тийишлилигим да жокъду“ дегенди.

²⁶ Къарындашла, Ибрахимни тукъумуну сабийлери эмда сизни арагъызда Аллахдан къоркъгъанла! Бу къутхарыу сёз сизге ийилгенди.

²⁷ Нек десегиз Иерусалимде жашагъанла бла аланы таматалары, Иссаны танымай, Анга сюд этип, хар шабат кюн сайын файгъамбарланы китапларында окъугъанларын толтургъандыла,

²⁸ Аны юсюнде ёлтюрюрге тийишли бир терслик тапмай, Пилатдан Аны ёлтюрюрге тилегендиле.

²⁹ Аны юсюнден Сыйлы Китаплада жазылгъанланы барын да толтургъандан сора уа, Аны къачдан тюшюрюп, къабыргъа салгъандыла.

³⁰ Алай болгъанлыкъгъа Аллах Аны ёлгенледен тиргизгенди;

³¹ Ол, кёп кюнлени ичинде, Аны бла Галилеядан чыгъып Иерусалимге келген, энди уа халкъны аллында Анга шагъатлыкъ этгенлеге кёрюне тургъанды.

³² Биз да сизге хайыр хапар айтабыз: Аллах Иссаны тиргизип, бизни аталарыбызгъа ант бла берирге айтханын бизге, аланы сабийлерине толтургъанды,

³³ Забурну экинчи зикиринде да: „Сен Мени Уланымса, Мен энди Сени туудурдум“ деп жазылгъаны кибик.

³⁴ Аны ёлгенледен тиргизип, Аны чирирге къоймазлыгъыны юсюнден а: „Мен Дауутха берирге айтхан сыйлы эмда ышаннгылы ахшылыкъланы сизге берликме“ деп айтханды.

³⁵ Ол себепден Китапны башха жеринде да: „Кесинги Сыйлынга чиримекликни сынатырыкъ тюйюлсе“ деп айтады.

³⁶ Дауут кесини заманында Аллахны буйругъуна кёре къуллукъ этип, ауушханды эм кесини аталарыны жанларында асыралгъанды, чиримекликни да сынагъанды;

³⁷ Аллах тиргизген Киши уа, чиримекликни сынамагъанды.

³⁸ Ол себепден къарындашла, Иссаны хурметинден сизни гюняхларыгъыз кечилгенинден хапар берилгени сизге белгили болсун.

³⁹ Мусаны Таурат Закону бла сиз кесигизни ариулап болалмагъан хар затыгъыздан, Иссагъа ийнаннган хар адам Аны юсю бла ариуланады.

⁴⁰ Алай а сакъ болугъуз, файгъамбарланы бу айтханлары сизни башыгъызгъа тюшмесин:

⁴¹ „Къарагъыз, хыликкя этгенле, сейирсинигиз эм тас болугъуз; нек десегиз Мен сизни заманыгъызда бир иш этеме, ол ишге уа, сизге ким айтса да, ийнанмаз эдигиз“ деп айтханлары сизни башыгъызгъа тюшмесин», – деди.

⁴² Пауул бла Барнаба иудей синагогадан чыкъгъан заманда, халкъ келлик шабат кюн да ол сёзлени айтырларын аладан тиледи.

⁴³ Жыйылыу чачылгъандан сора уа, кёп иудейлиле да, иудей диннге къайтышып, Аллахха табыннган башха миллетлиле да Пауулну бла Барнабаны ызындан бардыла; ала уа, бу адамла бла ушакъ этип аланы, таймай Аллахны шафауатында турургъа ийнандырдыла.

⁴⁴ Экинчи шабат кюн хазна къалмай битеу шахар Аллахны сёзюн эшитирге жыйылгъан эди.

⁴⁵ Алай а иудейлиле, халкъны кёргенде, зарлыкъдан толуп, Пауул айтхан сёзле бла келишмей, къажау туруп, анга аман айта эдиле.

⁴⁶ Ол заманда Пауул бла Барнаба таукеллик бла алагъа: «Аллахны сёзю бек алгъа сизге билдирилирге керек эди; алай а сиз аны къабыл этмей, кесигиз-кесигизни ёмюрлюк жашаугъа тийишли болмазча этгенигиз ючюн, ма, биз башха миллетлилеге айланып айтабыз.

⁴⁷ Нек десегиз Раббий: „Сен жерни этегине деричи да къутхарыу келтирир ючюн, Мен Сени башха миллетлеге жарыкълыкъгъа салгъанма“ деп бизге фарыз этгенди», – дедиле.

⁴⁸ Башха миллетлиле, муну эшитип, къууана эдиле эм Раббийни сёзюне махтау сала эдиле эмда ёмюрлюк жашаугъа буюрулгъанла барысы да ийнандыла.

⁴⁹ Аллахны сёзю битеу къыралда жайыла эди.

⁵⁰ Иудейлиле уа, Аллахха табыннган асыл тиширыуланы бла шахарны биринчи адамларын къозутуп, Пауулгъа бла Барнабагъа зорлукъ этип, аланы кеси тийрелеринден къыстадыла.

⁵¹ Пауул бла Барнаба уа алагъа шагъатлыкъгъа аякъларындан букъуну къагъып, Икониягъа кетдиле.

⁵² Сохтала уа къууанчдан эмда Сыйлы Нюрден тола эдиле.