Ишлери 11 - Сыйлы Инжил бла Забур

Петер сюннет жанлылагъа айтып кесин ариулайды

¹ Абустолла бла Иудеяда болгъан къарындашла, башха миллетлиле да Аллахны сёзюн къабыл этгенлерин эшитген эдиле.

² Петер Иерусалимге келгенде, анга сюннетлиле гурушха этип:

³ «Сен, сюннетсиз адамланы юйлерине барып, ала бла ашагъан да этгенсе», – дедиле.

⁴ Петер а болгъан ишлени, башындан башлап, алагъа бирем-бирем айтып ангылатды:

⁵ «Яффа шахарда мен тилек эте тургъанымлай, кёлюм кётюрюлюп, бир кёрюнюу кёрдюм. Уллу жабыугъа ушаш бир зат, тёрт мюйюшюнден асылып кёкден энип мени къатыма тюшдю.

⁶ Мен кёз аралтып, анга эслеп къарагъанымда, аны ичинде, жер башында болгъан тёрт аякълыланы, кийик жаныуарланы, сюркелип жюрюучюлени эмда кёкде учуучу къанатлыланы кёрдюм.

⁷ Сора манга: „Тур, Петер, кес да аша“ деген ауазны эшитдим.

⁸ Мен а: „Угъай, Раббий, мурдар неда харам зат бир заманда да мени ауузума тиймегенди“ дедим.

⁹ Ол ауаз а кёкден манга экинчи кере: „Аллах халал этгенлени сен харамгъа санама“ деп айтды.

¹⁰ Бу юч кере да болду, сора дагъыда битеуюнлей кёкге кётюрюлдю.

¹¹ Тюз ол сагъатда, мен тургъан юйню аллында, Кесариядан манга ийилген юч адам келип тохтадыла.

¹² Сыйлы Нюр манга: „Бир арсар болмай, ала бла бар“ деди; мени бла бирге бу алты къарындаш да бардыла, сора биз ол адамны юйюне келдик.

¹³ Ол, кесини юйюнде кёрюннген сыйлы мёлекни къалай кёргенин, мёлек анга: „Яффагъа адамла ийип, Петер аталгъан Шимонну чакъырт.

¹⁴ Ол санга сёзле айтыр, ол сёзле бла кесинг да, битеу юйюрюнг да къутхарыллыкъсыз“ деп айтханын бизге айтды.

¹⁵ Мен айтып башлагъан заманда уа, Сыйлы Нюр, алгъын бизге тюшгени кибик, алагъа да тюшдю.

¹⁶ Ол заманда Раббийни: „Ахия суу бла кёмюлдюргенди, сиз а Сыйлы Нюр бла кёмюлдюрюллюксюз“ деп айтхан сёзю мени эсиме тюшдю.

¹⁷ Алай бла, Аллах бизге, Раббий Масих Иссагъа ийнаннганлагъа бергени кибик, алагъа да аллай саугъа берген эсе, мен а кимме, Аллахха къажау турургъа?» – деди.

¹⁸ Муну эшитгенде, ала тохташдыла эмда Аллахха махтау салып: «Алай эсе, Аллах башха миллетлилеге да тобагъа къайтышып ёмюрлюк жашау алыргъа онг берген болур», – дедиле.

Антиохиядагъы ийманлыла

¹⁹ Ол заманда Истефанны ёлтюргенден сора болгъан зулмулукъладан къачып чачылгъанла, айланып, Финикиягъа, Кипрге эм Антиохиягъа дери жетип, Аллахны сёзюн иудейлиледен башхалагъа айтмай эдиле.

²⁰ Аладан бир къауум Кипрлиле бла Киринейлиле уа, Антиохиягъа келип, греклилеге айтып, Раббий Иссаны юсюнден Хайыр Хапарны билдире эдиле.

²¹ Раббийни кючю ала бла эди эм бек кёп адамла ийнанып, Раббийге къайтышдыла.

²² Муну юсюнден хапар Иерусалимдеги жамауатха жетди, ала да Антиохиягъа барыргъа Барнабаны боюнуна салдыла.

²³ Сыйлы Нюрден бла иймандан толгъан, огъурлу адам Барнаба, Антиохиягъа келгенинде ол адамлада Аллахны шафауатын кёрюп къууанды.

²⁴ Эм барысына да Раббийге таза жюрекден байланыргъа таукел этдирди. Сора кёп халкъ, Раббийге ийнанып, жамауатха къошулду.

²⁵ Андан сора Барнаба, Шауулну излерге Тарсха кетди эм, аны табып, Антиохиягъа келтирди.

²⁶ Ала сау жылны жамауат бла жыйыла турдула, бек кёп адамланы да юйретдиле. Сора Масих Иссаны сохталары биринчи кере Антиохияда масихчиле деп аталып башладыла.

²⁷ Ол кюнледе Иерусалимден Антиохиягъа файгъамбарла келдиле.

²⁸ Аладан Агап атлы биреулен, туруп, битеу дунияда бек уллу ачлыкъ боллугъун Сыйлы Нюрню юсю бла билдирди, ол ачлыкъ да Клаудий кесарьны заманында болду.

²⁹ Ол заманда сохтала хар ким онгуна кёре, Иудеяда жашагъан къарындашлагъа болушлукъ иерге бегим этдиле.

³⁰ Бу бегимни толтуруп, жыйгъанларын Барнабаны бла Шауулну къоллары бла жамауатны таматаларына ийдиле.