II Ахия 1 - Сыйлы Инжил бла Забур

Хакъ керти бла сюймеклик

¹ Мен акъсакъалдан, мен кертилик бла сюйген, сайланнган бийчеге эмда аны сабийлерине салам болсун! Жангыз мен тюйюл, алай а хакъ кертини билгенле бары да сизни сюедиле.

² Нек десегиз хакъ керти бизде жашайды эм ёмюрде да бизни бла боллукъду.

³ Аллах Атадан эм Атаны Уланы, бизни Раббийибиз Масих Иссадан келген шафауат, мархамат, ырахатлыкъ хакъ кертиде эм сюймекликде сизни бла боллукъду.

⁴ Сени сабийлерингден, биз Атадан алгъан фарызгъа кёре хакъ кертини жолунда жюрюгенлени табып, мен бек къууаннганма.

⁵ Бийче, энди уа сенден тилейме, бирбирибизни сюейик. Бу мен санга жазгъан жангы фарыз тюйюлдю, алай а биз алгъындан алгъан фарызды.

⁶ Сюймеклиг’а Аллахны фарызларына кёре жашагъаныбыздан болады. Сиз алгъындан эшитгенигиз кибик, Аны фарызы сюймекликни жолунда жюрюуюгюздю.

⁷ Нек десегиз адам чархы бла келген Масих Иссаны къабыл этмеген кёп терилтиучюле дуниягъа чыкъгъандыла. Аллай адам терилтиучюдю эм Масиххе къаршчыды.

⁸ Биз, ол урунуп кюрешгенибизни тас этмей, алай а толу саугъа алыр ючюн, кесигизге къарагъыз.

⁹ Масихни юйретиуюн бузгъан эм ол юйретиуде турмагъан ким болсада, ол адамда Аллах жокъду; Масихни юйретиуюнде тургъанда Ата да, Улан да барды.

¹⁰ Сизге келип, бу юйретиуню келтирмеген адамны юйге алмагъыз эм анга салам бермегиз.

¹¹ Нек десегиз анга салам берген аны аман ишлерине къошулады.

¹² Сизге кёп жазарыгъым барды, алай а къагъытха шакъы бла жазаргъа сюймейме; сизге келип, сизни къууанчыгъыз толу болур ючюн бетден-бетге сёлеширге уа умут этеме.

¹³ Сени сайланнган эгечинги сабийлери санга салам бередиле. Амин.