III Ахия 1 - Сыйлы Инжил бла Забур

¹ Мен акъсакъалдан, мен аны кертилик бла сюйген, багъалы Гайгъа салам болсун!

² Сюйюлюннген! Сау-саламат болуп, сени жанынг жетишимли болгъанча, сен хар затдан да жетишимли болур ючюн тилек этеме.

³ Нек десенг, къарындашла келип, сени хакъ кертиге тюз болгъанынгдан, хакъ кертини жолунда жюрюгенингден шагъатлыкъ этген заманда мен бек къууандым.

⁴ Сабийлерими хакъ кертини жолунда жюрюгенлерин эшитгенден уллу къууанчым жокъду.

Махтау эм насийхатла

⁵ Сюйюлюннген! Сен аланы танымагъан къарындашлагъа этгенлеринги тюз ышаннгылыча этесе;

⁶ Сени сюймеклигинги юсюнден жамауатны аллында ала шагъатлыкъ этгендиле; Аллахны хатырындан сен аланы кереклисича ашырсанг, иги этериксе.

⁷ Нек десенг ала, мажюсюледен бир зат да алмагъанлай, Масихни аты ючюн, жолгъа чыкъгъандыла.

⁸ Ол себепден биз, хакъ кертини жолунда уруннганлагъа нёгер болур ючюн, аллайланы къабыл этерге керекбиз.

⁹ Мен жамауатха жазгъан эдим; алай а алада башчылыкъ этерге сюйюучю Диотреф бизни къабыл этмейди.

¹⁰ Ол себепден мен келсем, бизге къажау аман сёзле айтып, аны этген ишлерин эсгертирме эм, аны бла да къалмагъанлай, къарындашланы кеси да къабыл этмейди, къабыл этерге сюйгенлени да къоймайды эмда жамауатдан къыстайды.

¹¹ Сюйюлюннген! Аманлыкъдан юлгю алма, алай а ахшылыкъдан юлгю ал. Ахшылыкъ этиучю адам Аллахданды; аманлыкъ этиучю уа Аллахны кёрмегенди.

¹² Бары да хакъ кертини кеси да Димитрийни юсюнден иги шагъатлыкъ этгендиле; аны кибик, биз да шагъатлыкъ этебиз, бизни шагъатлыгъыбыз тюз болгъанын а сиз да билесиз.

¹³ Мени кёп жазарыгъым бар эди, алай а санга шакъы бла эм къалам бла жазаргъа сюймейме.

¹⁴ Сени къысха заманда кёрюп, бетденбетге сёлеширге умут этеме.

¹⁵ Санга ырахатлыкъ болсун. Шуёхла санга салам бередиле, шуёхлагъа атлары бла салам бер. Амин.