Галатиялылагъа 5 - Сыйлы Инжил бла Забур

Азатлыкъда туругъуз

¹ Алай бла бизге Масих берген азатлыкъда туругъуз эм энтда жангыдан къул болууну боюнсасын боюнугъузгъа такъмагъыз.

² Ма, мен Пауул сизге айтама: сиз сюннет этиле эсегиз, сизге Масихден бир тюрлю хайыр боллукъ тюйюлдю.

³ Сюннет этдирген хар адамгъа, ол Тауратны битеу фарызларын толтурургъа керекди деп энтда шагъатлыкъ этеме.

⁴ Сиз, Таурат бла кесигизни ариуларгъа кюрешгенле, Масихден къуру къалгъансыз, Аллахны шафауатындан айырылгъансыз,

⁵ Биз а ариуланнганыбыздан келген умутну толурун Сыйлы Нюрге ышанып сакълайбыз.

⁶ Нек десегиз Масих Иссада не сюннетлиликни, не сюннетсизликни кючю жокъду, алай а кюч сюймеклик бла жюрюген иймандады.

⁷ Сиз тап бара эдигиз. Сизни хакъ кертиге бойсуннганыгъызны ким тохтатды?

⁸ Аллай ийнандырыу сизни чакъыргъан Аллахдан тюйюлдю.

⁹ Аз ачытхыч битеу тылыны ачытады.

¹⁰ Мен сизни юсюгюзден, сиз башха тюрлю ойлашмазсыз деп, Раббийге базынып турама; сизни жунчутхан а, ол ким болсада, кесини айыбына тюберикди.

¹¹ Сора къарындашларым, мен энтда сюннет этилирге керекди деп ууаз бере эсем, манга энтда зулму нек этедиле? Алай болса къачны бедишлиги кетерилир эди.

¹² Ой, сизни къозгъагъанла кеслери-кеслерин бичге эдиле!

¹³ Азатлыкъгъа чакъырылгъансыз сиз, къарындашла. Сизни бу азатлыгъыгъыз гюняхлы табийгъатыгъызны сюйгенин этерге сылтау болмасын анса; алай а сюймеклик бла бир-биригизге къуллукъ этигиз.

¹⁴ Нек десегиз битеу Таурат: «Жууугъунгу кесинг-кесинги сюйгенча сюй», – деген бир сёз бла тамам болады.

¹⁵ Сиз бир-биригизни къаба эм ашай эсегиз а, сора сиз бир-биригизни жокъ этмез ючюн сакъ болугъуз.

¹⁶ Мен айтама: Сыйлы Нюрге кёре жашагъыз, сора сиз гюняхлы табийгъатыгъызны кюсегенин этмезсиз.

¹⁷ Нек десегиз адамны гюняхлы табийгъаты, Нюр кёрюп болмагъанны сюеди, Нюр да гюняхлы табийгъат кёрюп болмагъанны сюеди. Ала бир-бирлерине къажаудула, алай бла сиз этерге сюйгенигизни этмейсиз.

¹⁸ Сиз Нюр бла жюрюй эсегиз а, сора сиз Законну оноуунда тюйюлсюз.

Гюняхлы адам табийгъат эмда Сыйлы Нюр

¹⁹ Адамны гюняхлы табийгъатыны ишлери белгилидиле. Ала: зийначылыкъ, саякълыкъ, харамлыкъ, адепсизлик,

²⁰ идоллагъа табынмакълыкъ, хыйнычылыкъ, душманчылыкъ, тюйюшюу, зарлыкъ, ачыуланыу, даулашыула, келишмеулюкле, айрылыкъла,

²¹ Жутлукъ, мурдарлыкъ, ичгичилик, къутуруулукъ эмда алагъа ушагъан затла. Сизге алгъын айтханымча энтда айтама, алай этиучюле Аллахны Патчахлыгъындан юлюшлю боллукъ тюйюлдюле.

²² Сыйлы Нюрню битими уа: сюймеклик, къууанч, жарашыулукъ, тёзюмлюлюк, ахшылыкъ, огъурлулукъ, ышаннгылылыкъ,

²³ Жууашлыкъ, кесин тыймакълыкъ. Аллайлагъа къажау закон жокъду.

²⁴ Масихникиле уа, кеслерини гюняхлы табийгъатларын кюсеулери бла эм итиниулери бла бирге къачха кергендиле.

²⁵ Биз Нюр бла жашай эсек, сора Нюрню оноуунда жюрюрге керекбиз.

²⁶ Уллу кёллюлюк этмейик, бир-бирибизни къанын бузмайыкъ, бир-бирибизге зарланмайыкъ.