Галатиялылагъа 2 - Сыйлы Инжил бла Забур

Башха абустолла Пауулну къабыл этедиле

¹ Артда, онтёрт жылдан сора, мен Барнаба бла Титни да биргеме алып, дагъыда Иерусалимге баргъан эдим.

² Баргъанымда уа билим ачылыу бла баргъан эдим. Андагъылагъа, артыгъыракъ да, бек белгилилеге, миллетлеге Хайыр Хапарны билдириуюмю юсюнден, мен бошму кюрешеме неда бошму кюрешген болурма деп айтхан эдим.

³ Алай болгъанлыкъгъа ала мени биргеме болгъан Титге, ол грекли болсада, сюннет этдир деп къысмагъандыла.

⁴ Алай а бизни Масих Иссада болгъан азатлыгъыбызгъа къараргъа жашыртын келип, бизни къул этер ючюн, хыйлалыкъ бла келген жалгъан къарындашла бар эдиле.

⁵ Хайыр хапарны хакъ тюзлюгю сизде сакъланыр ючюн, биз алагъа бир сагъатха да хорлатмагъанбыз эм бой салмагъанбыз.

⁶ Белгилиле да не тюрлю жаны бла да къалай болгъан эселе да, манга башхалыгъы жокъду, Аллах адамны тыш сыфатына къарамайды. Белгилиле да мени айтханларыма бир зат да къошмагъандыла.

⁷ Ол угъай эсенг, Хайыр Хапарны сюннетлилеге жаяргъа Петерге ышанып берилгени кибик, манга да сюннетсизлеге жаяргъа берилгенин кёргендиле.

⁸ Нек десегиз сюннетлилеге абустол болургъа Петерге кюч берген Аллах, манга да башха миллетлилеге абустол болургъа кюч бергенди.

⁹ Жамауатны чигинжилерине саналгъан Якъуп, Кефа эм Ахия, Аллахны манга берген шафауатын билгенлеринде, бирикмеклигибизни белгисине манга бла Барнабагъа онг къолларын бергендиле. Биз башха миллетлеге, ала уа сюннетлилеге барыргъа бегим этгендиле.

¹⁰ Бизден жаланда жарлыланы унутмазыбызны тилегендиле, мен да аны тамам этерге кюрешгенме.

Пауул Антиохияда Петерге къажау турады

¹¹ Петер Антиохиягъа келген заманда уа, ол кёлкъалдыгъа тюшгени себепли, мен кесим анга къажау тургъан эдим.

¹² Нек десегиз бир къауумла Якъупдан келгинчиге дери, Петер башха миллетлиле бла бирге ашап тургъан эди. Ала келгенде уа, сюннетлиледен къоркъуп, бугъунуп эм къатышмай, бир жанына туруп башлагъан эди.

¹³ Аны бла бирге башха иудейлиле да эки бетлилик этген эдиле, алай бла аланы эки бетлилик этиулерине Барнаба окъуна къошулгъан эди.

¹⁴ Аланы, Хайыр Хапарны хакълыгъы бла тюз этмегенлерин кёргенимде уа, мен Петерге, бары да тургъанлай: «Сен, иудейли болгъанынглай, иудейлича жашамай, башха миллетлилеча жашай эсенг, сора башха миллетлилени иудейлилеча жашагъыз деп нек къысаса?

¹⁵ Биз, башха миллетлиледен болгъан гюняхлыла угъай, иудейли болуп туугъанлабыз.

¹⁶ Алай болгъанлыкъгъа уа, адам Тауратны фарызларын тутуу бла угъай, жаланда Масих Иссагъа ийнаныуу бла ариуланнганын билебиз. Аны ючюн биз да, Тауратны фарызларын тутууубуз бла тюйюл, Масиххе ийнаныуубуз бла ариуланыр ючюн Масих Иссагъа ийнаннганбыз. Нек десегиз Тауратны фарызларын тутууу бла бир адам да ариуланаллыкъ тюйюлдю.

¹⁷ Масихде ариуланыуну излеп, биз кесибиз да гюняхлы болуп чыкъгъан эсек, сора Масих гюняхны къуллукъчусумуду? Чыртда угъай!

¹⁸ Мен бузгъанымы жангыдан къурай эсем, сора мен законну бузуучу болгъанымы кёргюзтеме.

¹⁹ Мен, Аллах ючюн жашаргъа болалыр ючюн, Тауратны Законуну болушлугъу бла Тауратны Законуна ёлгенме. Мен Масих бла бирге къачха керилгенме.

²⁰ Сора энди уа мен жашамайма, алай а менде Масих жашайды. Энди чархымда жашай эсем а, сора мени сюйюп, Кесин мени ючюн берген Аллахны Уланына ийнаныуум бла жашайма.

²¹ Аллахны шафауатын къабыл этмей къоймайма. Адам Законну юсю бла ариуланала эсе уа, сора Масих керексизге ёлгенди», – деген эдим.