Филимоннга 1 - Сыйлы Инжил бла Забур

¹ Масих Исса ючюн тутмакъ болгъан мен Пауулдан эм Тимотей къарындашдан сюйюлюннген эм бирге уруннган нёгерибиз Филимоннга,

² Сюйюлюннген эгечибиз Афиягъа, бирге кюрешген жёнгерибиз Архипге эм сени юйюнгде жыйылгъан жамауатха салам!

³ Атабыз Аллахдан эм Раббийибиз Масих Иссадан сизге шафауат эм ырахатлыкъ болсун.

Шукур бла тилек

⁴ Сени Раббий Иссагъа ийман салгъанынгы эм битеу сыйлыланы сюйгенинги эшитип,

⁵ Хар заманда тилеклеримде сени эсиме келтирип, Аллахыма шукур этеме.

⁶ Сен ийманынгы башхала бла юлешиуде жигер болурунгу эмда Масих Иссада сизни болгъан хар ахшылыкъны билиринги Аллахдан тилейме.

⁷ Сени сюймеклигингден биз уллу къууанч эм жапсарылыу алгъанбыз; нек десенг, къарындаш, сен сыйлыланы жюреклерин ырахатландыргъанса.

Пауулну Онисим ючюн тилеги

⁸ Ол себепден, керекли затны санга буйрукъ этерге Масихде уллу таукеллигим болгъанынлай да,

⁹ Андан эсе, Масих Исса ючюн тутмакъ болгъан мен къарт Пауул санга сюймеклик бла жалбарама.

¹⁰ Мен аны тутмакълыгъымда туудургъан жашым Онисимни юсюнден сенден тилейме.

¹¹ Ол бир заманлада санга жараусуз болгъан эсе да, энди уа санга да, манга да жараулуду. Мен аны санга къайтарама,

¹² Сен а аны мени жюрегими къабыл этген кибик къабыл эт.

¹³ Мени Хайыр Хапар ючюн тутмакълыгъымда ол сени орунунга манга болушлукъ этер ючюн, мен аны кесими къатымда къояргъа сюйген эдим.

¹⁴ Алай а, сени ахшы ишинг зор бла тюйюл, ыразылыкъ бла болсун деп, сени изминг болмагъанлай, бир зат этерге да унамагъанма.

¹⁵ Онисимни бир кесек заманнга сенден айырылгъаны, сен аны хар заманнга да ызына алыр ючюн болгъан болур эди.

¹⁶ Аны энди къулнуча тюйюл, къулдан бийик, сюйюлюннген къарындашныча, ызына алырса. Ол манга бек багъалыды, санга уа кеси адамынгча да, Раббийни адамыча да, андан да бек багъалы боллукъду.

¹⁷ Ол себепден, мени нёгеринге санай эсенг, аны мени къабыл этген кибик къабыл эт.

¹⁸ Ол сени бир зат бла жанынга тийген эсе неда борчлу эсе, аны борчун манга сана.

¹⁹ Мен Пауул кеси къолум бла жазгъанма: мен тёлерме. Сен кесинг ючюн манга борчлу болгъанынгы уа айтмайма.

²⁰ Ол халда, къарындашым, Раббийни жолунда сенден хайыр кёрейим, жюрегими Раббийде ырахат эт.

²¹ Сени бойсунууунга ышанып эм сени мен айтхандан да кёп этеригинги билип, муну санга жазгъанма.

²² Аны бла бирге манга юй да хазырла, нек десенг сизни тилеклеригиз бла мен сизге берилирме деп умут этеме.

Ахыргъы саламла

^23-24 Мени бла бирге Масих Исса ючюн тутмакъ болгъан Эпафрас эм биргеме уруннган нёгерлерим Марк, Аристарх, Димас, Лука санга салам айтадыла.

²⁵ Раббийибиз Масих Иссаны шафауаты сизни нюрюгюз бла болсун. Амин.