Эфеслилеге 6 - Сыйлы Инжил бла Забур

Юйюр келишиуле

¹ Сабийле, Раббийникиле болуп, ата-аналарыгъызны айтханларын этиучюле болугъуз, нек десегиз бу сизни борчугъузду.

² «Атанга бла ананга хурмет эт» деген бу фарыз:

³ «Алай этсенг, санга ахшылыкъ боллукъду эмда жер башында кёп жашарыкъса», – деп ант сёз берилген биринчи фарызды.

⁴ Атала, сиз да, сабийлеригизни инжитмегиз, алай а аланы Раббийни юйретиую бла эм акъыл бериую бла ёсдюрюгюз.

Къул-бий келишиуле

⁵ Къулла, бу дуниядагъы бийлеригизге хурмет бла эм къоркъуу бла, таза жюрегигизден, Масиххе бойсуннганча бойсунугъуз.

⁶ Адамлагъа кёзбау этиучюлеча, жаланда иги жумушчула кибик кёрюнюу бла тюйюл, алай а Масихни къуллары кибик, таза жюрекден Аллахны буйругъун толтуругъуз.

⁷ Адамлагъача тюйюл, Раббийге къуллукъ этгенча, къадалып къуллукъ этигиз.

⁸ Хар ким, къул эсе неда азат эсе да, этген ахшылыгъына кёре Раббийден тийишлисин аллыгъын билигиз.

⁹ Бийле, сиз да къулларыгъызгъа иги къарагъыз, алагъа къатылыкъ этиуню къоюгъуз; сизни кесигизни да, аланы да башыгъызда кёкледе Раббий болгъанын эмда Ол адамланы бирин-биринден башха этмей къарагъанын билигиз.

Аллахны нюр сауутлары

¹⁰ Ахырында, къарындашларым, Раббий бла эм Аны къудуретини кючю бла къарыуланыгъыз.

¹¹ Ибилисни хыйлаларына сиз къажау турургъа болалыр ючюн, Аллах берген битеу сауутланы юсюгюзге кийигиз.

¹² Нек десегиз бизни къазауатыбыз адамлагъа къажау къазауат тюйюлдю, алай а башчылагъа къажау, властьлагъа къажау, къарангылыкъны бу ёмюрлю дуния оноучуларына къажау, тюп кёкледеги огъурсуз нюрлеге къажау къазауатды.

¹³ Аны себепли, сиз, огъурсуз кюнде чыдап эм барын да хорлап, таймай турургъа болалыр ючюн, Аллах берген битеу сауутланы алыгъыз.

¹⁴ Алай бла, белигизге кертиликни белибауун къысып, юсюгюзге тюзлюклюлюкню кюбесин кийип

¹⁵ Эм аякъларыгъызгъа жарашыулукъну Хайыр Хапарын жаяргъа хазырлыкъны кийип, къаты туругъуз.

¹⁶ Барындан да бег’а ийманны къоруулаучу сауутун алыгъыз, аны бла уа ибилисни битеу къызгъан окъларын ёчюлтюрге болаллыкъсыз.

¹⁷ Къутхарылыуну темир бёркюн кийигиз эмда Сыйлы Нюрню къылычын, Аллахны сёзюн алыгъыз.

¹⁸ Хар тюрлю дууа этиу бла эм тилек этиу бла хар заманда Сыйлы Нюрню болушлугъу бла тилек этигиз эм ол мурат бла битеу сыйлыла ючюн да толу чыдамлылыкъ бла тилек этип, сагъайып туругъуз.

¹⁹ Эм мени ючюн да тилек этигиз; мен Хайыр Хапарны сырын таукеллик бла ачыкъ билдирирге манга сёз берилир ючюн,

²⁰ Мен аны ючюн келечилигими тутмакълыкъда толтургъан Хайыр Хапарны мен, манга тийишлисича, таукеллик бла билдирир ючюн тилек этигиз.

Ахыргъы саламла

²¹ Сиз да мени болумуму эм ишлерими халын билир ючюн, сюйюлюннген къарындаш эм Раббийге тюз къуллукъ этген Тихик сизге барындан да хапар берир.

²² Аны уа мен сизге ийгеним, сиз бизни хапарыбызны билир ючюн эмда ол сизни жюреклеригизни жапсарыр ючюндю.

²³ Къарындашлагъа Атабыз Аллахдан эм Раббийибиз Масих Иссадан ийман бла ырахатлыкъ эм сюймеклик болсун.

²⁴ Аллахны шафауаты бизни Раббийибиз Масих Иссаны таймай сюйгенлени барысы бла да болсун. Амин.